অসম লাইভ২৪ঃ টি-২০ বিশ্বকাপৰ ফাইনেলত প্ৰৱেশ কৰিলে পাকিস্তানে। যোৱাটো টি-২০ বিশ্বকাপত ছেমিফাইনেলৰ পৰাই বাহিৰ হৈছিল পাকিস্তানৰ দলটো। এইবাৰ পাকিস্তানে পূৰ্বৰ ত্ৰুতিসমূহ আঁতৰাই খেলত মনোনিৱেশ কৰিছে বুলি খেল সমালোচকসকলে মন্তব্য কৰিছে। চলিত টি-২০ৰ ফাইনেলত প্ৰৱেশ কৰা প্ৰথম দল হৈছে পাকিস্তান। পাকিস্তানে ফাইনেলত প্ৰৱেশ কৰাৰ লগে লগেই ক্ৰিকেট অনুৰাগীৰ মাজত এটাই চৰ্চা। ফাইনেল এইবাৰ ভাৰত-পাকিস্তানৰ মাজতেই হ’ব নেকি?
ছেমিফাইনেলত ইংলেণ্ডক পৰাস্ত কৰিব পাৰিলেই ভাৰতে ফাইনেলত প্ৰৱেশ কৰিব। মেলবৰ্ণ আকৌ এবাৰ মহাৰণৰ সাক্ষী হ’ব! কিন্তু একাংশ খেল সমালোচকে দাবী কৰা অনুযায়ী ভাৰতৰ সৈতে ফাইনেল খেলিব লাগিব বুলি শংকিতও হৈছে পাকিস্তানৰ দলটো। বিশেষকৈ বিৰাটৰ ফৰ্মক লৈ শংকিত বাবৰ আজম বাহিনী। চলিত টি-২০ ত সৰ্বাধিক ৰান কৰি শীৰ্ষত আছে বিৰাট। পাকিস্তানৰ বিৰুদ্ধে হোৱা খেলতো বিৰাটৰ প্ৰদৰ্শন লেখত ল’বলগীয়া। সেয়ে এই ফৰ্ম অটুট থাকিলে ৰোহিতবাহিনীয়ে পাকিস্তানৰ স্বপ্ন ভাঙিব বুলিও শংকিত পাকিস্তানৰ খেল অনুৰাগীসকল।
২০০৭ চনৰ টি-২০ত দ্বিতীয়বাৰৰ বাবে মুখামুখি হৈছিল ভাৰত-পাকিস্তান। দুবাৰেই ভাৰতৰ হাতত পৰাস্ত হৈছিল পাকিস্তান। ২০০৭ চনত মহেন্দ্ৰ সিঙৰ নেতৃত্বত আছিল ভাৰতীয় দলটো। সেইবাৰো পাকিস্তান ধৰাশায়ী হৈছিল ভাৰতীয় দলটোৰ হাতত। এইবাৰো ছোৱেইব আখতাৰকে ধৰি পাকিস্তানৰ বহু খেলুৱৈয়ে ভাৰতীয় দলটোৰে ফাইনেলত দেখাদেখি হ’বলৈ আমন্ত্ৰণ জনাইছে।
সামাজিক মাধ্যমতো ভাইৰেল হৈছে এটা বিশেষ ভিডিঅ’। ছিডনী ক্ৰিকেট গ্ৰাউণ্ডৰ বাহিৰত কৰা ভিডিঅ’টোত পাকিস্তানৰ এগৰাকী মহিলা সমৰ্থকে কৈছে, ‘বিৰাট কোহলিকহে ভয় লাগে। তেওঁ যেনেকৈহে খেলত আক্ৰমণাত্মক হৈ পৰে। আমি নিবিচাৰো ভাৰতে ছেমিফাইনেলত জিকক। আমাৰ এইবাৰ বিশ্বকাপ জিকাৰ সপোন আছে। ভাৰতীয় দলে ফাইনেলত প্ৰৱেশ কৰিলেই আমাৰ সপোনত বাধা আহিব। ইংলেণ্ডক আমাৰ দৰে ফাইনেলত আৰামত হৰুৱাব পাৰিব। কিন্তু ভাৰতৰ হৰুওৱাটো আমাৰ দলৰ বাবেও সহজ কথা নহয়।’
ইপিনে ছোৱেইব আখতাৰেও ফাইনেল খেলক লৈ মন্তব্য কৰিছে। মেলবৰ্ণত ভাৰতৰ বিজয় সম্ভৱ নহয় বুলি মন্তব্য কৰিছে পাকিস্তানৰ খেলুৱৈগৰাকীয়ে। মহম্মদ ৰিজুৱান আৰু মাথু হেডেন দুজনেই ভাৰতৰ সৈতে পাকিস্তানৰ ফাইনেল খেল চাবলৈ আগ্ৰহী বুলি মন্তব্য কৰিছে। ১৩ নৱেম্বৰত অনুষ্ঠিত হ’ব ফাইনেল খেল। আজি ভাৰত-ইংলেণ্ড মুখামুখি হৈছে ছেমিফাইনেলত। যদি ছেমিফাইনেলত ভাৰতে জয়লাভ কৰে তেন্তে পাকিস্তানৰ বিৰুদ্ধে ১৩ তাৰিখে ভাৰত মুখামুখি হ’ব ফাইনেলত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
