অসম লাইভ২৪ঃ হাস্পতাল নে বিয়াৰ মঞ্চ! দেখিলে ধৰিবই নোৱাৰি। গোটেই হাস্পতালখনেই সজাই তোলা হৈছে। হাস্পতালৰ চৌপাশে ৰোগীৰ সলনি দেখা গৈছে নতুন পোছাক পিন্ধা অতিথি। তাৰ মাজতেই হাঁহিমুখে হুইলচেয়াৰত বহি সকলোকে মাত লগাই ফুৰিছে এগৰাকী সুন্দৰী যুৱতীয়ে। এয়া কোনো চিনেমাৰ শ্বুটিঙো নহয়। নিজৰ প্ৰিয়তমা প্ৰেয়সীৰ শেষ ইচ্ছা পূৰণৰ চেষ্টাহে চলাইছে প্ৰেমিকে।
দক্ষিণ লণ্ডনৰ ক্ৰিষ্টি আৰু এলেক্স দুয়ো সৰুৰে পৰাই বন্ধু আছিল। কৈশোৰত সেই বন্ধুত্বত পোখা মেলিলে প্ৰেমে। তাৰ পিছতেই যৌবন, দুয়ো দেখিবলৈ আৰম্ভ কৰিলে যুৰীয়া জীৱনৰ সপোন। সুদীৰ্ঘ ১০ বছৰ ধৰি দুয়ো একেলগে আছে। কোলা শুৱাই দুয়োৰে মাজলৈ আহিছে এটি কণমানিও। কিন্তু বিধিৰ বিপাক খণ্ডাব কোনে? দুয়োৰে সুখৰ সংসাৰলৈ নামি আহিল অমানিশা।
হঠাতেই ক্ৰিষ্টিৰ হাতৰ তলত এটা সৰু ফোঁহা উঠিল। প্ৰাথমিক পৰ্যায়ত ক্ৰিষ্টিয়ে সেয়া অৱহেলা কৰি আছিল। কিছুদিন পিছত ফোঁহাটো বাঢ়ি থকাত চিকিৎসকৰ কাষ চাপে ক্ৰিষ্টি। চিকিৎসকে পৰীক্ষা কৰি টিউমাৰ বুলি কোৱাৰ লগতে ছাৰ্জাৰীৰ জৰিয়তে সেয়া ঠিক হৈ যাব বুলি জনায়। কিন্তু শেষলৈ গম পালে সেয়া ক্ৰিষ্টিৰ সাধাৰণ ফোঁহা নহয় তেওৰ শৰীৰত বাঢ়ি আহিছে মাৰাত্মক কৰ্কট। তথাপিও চিকিৎসকে জনালে যে চিকিৎসাৰ জৰিয়তে ইয়াক নিৰ্মূল কৰিব পৰা যাব। কিন্তু চিকিৎসা চলি থাকিল যদিও দিনকদিনে ভাঙি আহিল ক্ৰিষ্টিৰ দেহ। হয়তো ক্ৰিষ্টি আৰু খুব দিনৰ অতিথি এই পৃথিৱীত। সেয়ে প্ৰেমিক এলেক্সে সিদ্ধান্ত লয় দুয়োৰে বাকদান সম্পন্ন কৰাৰ। অসুস্থ ক্ৰিষ্টিক লৈ বিখ্যাত পাৰ্ক ডিজনিলেণ্ডলৈ যায় এলেক্স। কিয়নো প্ৰেয়সীৰ আশা এই বিখ্যাত পাৰ্কতেই বাকদান সম্পন্ন কৰাৰ। তাতেই দুয়োৱে বাকদান সম্পন্ন কৰিছে। দুয়োৰে বাকদানৰ ফটো নেট দুনীয়াত ভাইৰেলো হৈ পৰিছে।
উল্লেখ্য যে বাকদানৰ মাজতেই অসুস্থ হৈ পৰা ক্ৰিষ্টিক হাস্পতাললৈ লৈ অহা হয়। চিকিৎসকে জনোৱা অনুসৰি হাতত সময় বহুত কম। ক্ৰিষ্টিয়েও বিদায় ল’ব বুলি বুজি উঠিছে। শেষ ইচ্ছা বিয়াখনহে। সেয়ে এলেক্সে সিদ্ধান্ত লয় বিয়াখনো পাতি লোৱাৰ। ভৱামতেই হাস্পতালতেই বিয়াৰ আয়োজন কৰে এলেক্সে। অসুস্থ প্ৰেয়সীক হাস্পতালৰ পৰা বাহিৰলৈ লৈ যাবলৈও অপাৰগ কিয়নো চিকিৎসকে কোনো কাৰণতে লৈ যোৱাৰ অনুমতি নিদিয়ে। সেয়ে হাস্পতালৰ ৰোগীসকলৰ উপস্থিতিতেই দুয়োৰে বিবাহ সম্পন্ন হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
