অসম লাইভ২৪ঃ হোলা মুখৰ খোলা হাঁহিটো আৰু কাহানিও নেদেখিব অসমবাসীয়ে৷ কলিজা আইতা গ’লগৈ৷ গুৱাহাটী চিকিৎসা মহাবিদ্যালয় হাস্পাতালত শেষ নিশ্বাস ত্যাগ কৰে সুভদ্ৰা ওৰফে কলিজা আইতাই৷ বাৰ্ধক্যজনিত কাৰণতেই দীৰ্ঘদিন ধৰি চিকিৎসাধীন হৈ আছিল কলিজা আইতাই৷
প্ৰমোদ তালুকদাৰ মেম’ৰিয়েল অ’ল্ড এজ হোমৰ বাসিন্দা কলিজা আইতা কাৰনো আপোন নাছিল। আইতাৰ মৰমসনা কথাই সকলোকে সন্মোহিত কৰিছিল। সকলো সময়তে আইতাৰ মুখত জিলিকি আছিল এটা মৰমসনা হাঁহি। বৃদ্ধাশ্ৰমখনলৈ অহা প্ৰতিজন লোককে মৰম কৰিছিল, আশীৰ্বাদ দিছিল আইতাই। প্ৰমোদ তালুকদাৰ মেম’ৰিয়েল অ’ল্ড এজ হোমৰ অন্যতম আকৰ্ষণেই আছিল কলিজা আইতা।
অ’ল্ড এজন হোমলৈ অহা প্ৰতিজন লোকেই আইতাৰ মৰম–আদৰত মুগ্ধ হৈছিল। আশ্ৰমলৈ অহা লোকসকলক সম্বৰ্ধনা জনোৱা, জন্মদিন পালন কৰিবলৈ অহাসকলৰ জন্মদিনৰ কেক কটা এই সকলো দায়িত্বই সূচাৰুৰূপে কৰি আহিছিল আইতাই। কেতিয়াবা যদি অতীত সোঁৱৰি আইতা আৱেগিক হৈছিল কেতিয়াবা আকৌ আইতাই উলাহতে জুৰিছিল একোটা বিয়ানাম৷ কোনোৱে এফাকি বিহুনাম জুৰিবলৈ ক’লেই আইতাই হোলা মুুখৰ এমোকোৰা হাঁহিৰে জুৰিছিল এফাঁকি বিহুনাম৷ আইতাৰ ৰসাল কথাবোৰে কাকনো মুগ্ধ কৰা নাছিল৷
আইতাই বৃহস্পতিবাৰে পুৱাৰভাগতেই সকলোে পৰা চিৰবিদায় মাগিলে৷ ১০৮ বছৰীয়া আইতাৰ দেহত বাৰ্ধক্যজনিত সমস্যাই দেখা দিছিল। জিএমচিএইচৰ চিকিৎসকে যৎপৰোনাস্তি চেষ্টা কৰিছিল যদিও অৱশেষত নিয়তিৰ ওচৰত হাৰ মানিলে কলিজা আইতাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
