অসম লাইভ২৪ঃ থ্ৰী ইডিয়ট চিনেমাখনত আমিৰ খানৰ এটা সংলাপ আছিল, ‘বচ্চে কাবিন বনৌ! কাময়াবী ঝক মাৰকে তুমহাৰে পিছে আয়েগি!’ এখন প্ৰান্তীয় পাহাৰীয়া গাওঁত জনজাতীয় কন্যা কাৰ্মা মুদুলিও আমিৰ খানৰ সেই ভাৱধাৰাৰে অনুপ্ৰাণিত৷ কাৰ্মাই কাবিল হ’বলৈ যৎপৰোনাস্তি চেষ্টা কৰিছে৷ দুচকুত আই এ এছ বিষয়া হোৱাৰ সপোন কাৰ্মাৰ৷ চহৰৰ পৰা বহু দূৰৰ এখন গাওঁ মালকানগিৰি৷ এই গাওঁত মূলত জনজাতিসকলেই বাস কৰে৷ প্ৰায়সংখ্যকেই দিনহাজিৰা কৰি পেট প্ৰৱৰ্তায়৷ পঢ়া শুনাৰ পৰা গাওঁখনৰ বেছিভাগ লোকেই দূৰত অৱস্থান কৰে৷ পঢ়া শুনাৰ প্ৰতি আগ্ৰহ প্ৰায়েই নাই বুলিব পাৰি এই গাওঁৰ লোকসকলৰ৷ বছৰ বছৰ ধৰি অনাটনত ভোগা গাওঁবাসীয়ে দুবেলা দুমুঠি উপাৰ্জন কৰাটোতেই সৰ্বাধিক গুৰুত্ব দিয়ে৷ শিক্ষাৰ প্ৰতি বিশেষ আকৰ্ষণ নথকা এই গাওঁত শিক্ষিতৰ সংখ্যা মাত্ৰ ৬ শতাংশ৷ ছাত্ৰতকৈ ছাত্ৰীৰ শিক্ষিতৰ হাৰ আৰু কম৷ কিন্তু কাৰ্মা ব্যতিক্ৰম৷ কাৰ্মা কেৱল শিক্ষিতই নহয়, এগৰাকী মেধাৱী ছাত্ৰীও৷ দ্বাদশ শ্ৰেণীৰ পৰীক্ষাত জিলাখনৰ ভিতৰতেই শীৰ্ষ স্থান অধিকাৰ কৰিছিল কাৰ্মাই৷
কাৰ্মা উজলি উঠা ঘৰখনৰ প্ৰায়সংখ্যকেই অষ্টম শ্ৰেণীৰ পৰা নৱম শ্ৰেণীলৈকে পঢ়া৷ সমগ্ৰ দেশজুৰি উজ্বলিছে মেধাৱী কন্যা কাৰ্মাৰ নাম৷ কাৰ্মাই বাণিজ্য শাখাত ৮৮.৬৬ শতাংশ নম্বৰ লৈ উত্তীৰ্ণ হৈছে৷ কাৰ্মাৰ এই সফলতাই এবছৰ অতিক্ৰম কৰিছে৷ সকলোৱেই ধাৰণা কৰি লৈছে যে কাৰ্মাই নিশ্চয় কোনো কলেজত পঢ়াশুনা কৰি আছে৷ সকলোৱে ভৱাধৰণেই স্বাভাৱিকভাৱে আগবঢ়া নাই কাৰ্মাৰ শৈক্ষিক পথ৷ সম্প্ৰতি এখন গাওঁত দিনহাজিৰা কৰা দেখা গৈছে কাৰ্মাক৷ গাওঁখনৰ অন্য মহিলাৰ সৈতে দৈনিক হাজিৰা কৰিবলৈ ওলাই যায় কাৰ্মা৷ কেতিয়াবা যদি মূৰত ইটা বালি কঢ়িয়াইছে, কেতিয়াবা আকৌ কয়লাখনিত কাম কৰিছে কাৰ্মাই৷ পিতৃ-মাতৃয়ে কাৰ্মাক পঢ়োৱাবলৈ অৰ্থৰ যোগান ধৰিব নোৱাৰিলে৷
কাৰ্মাই সফলতা অৰ্জন কৰাৰ পাছতেই দেশৰ কেইবাটাও স্বেচ্ছাসেৱী সংস্থা কাৰ্মাক সহায় কৰিবলৈ আগবাঢ়ি আহিছিল৷ উচ্চশিক্ষাৰ বাবে কাৰ্মাক সাহায্য আগবঢ়াবলৈ আহিছিল এইকেইটা সংস্থা৷ ভুৱনেশ্বৰৰ ৰমাদেৱী বিশ্ববিদ্যালয়ত নামভৰ্তী কৰিছিল কাৰ্মাই৷ কিন্তু উচ্চশিক্ষাৰ খৰচ মূৰত তুলি লোৱা সহজ কথা নহয়৷ এটা সাক্ষাৎকাৰত কাৰ্মাই কৈছিল, ‘পঢ়া শুনা কৰিবলৈ মোৰ ঘৰৰ পৰা অৰ্থ যোগান ধৰা সম্ভৱ নহয়৷ মই কলম কাগজৰ অভাৱত এনেকৈ পৰিছো যে মই কাঠ পেঞ্চিলেৰে লিখো যাতে আকৌ মোহাৰি তাত লিখিব পাৰো৷ কিন্তু কাগজ আৰু জীৱন একেই নহয়৷ জীৱনৰ পৃষ্ঠাত এবাৰ মোহাৰি আকৌ লিখিব নোৱাৰি৷ সেয়ে মই জীৱনৰ এটা মুহূৰ্তও অপব্যয় কৰিব নোৱাৰো৷ মই জানো টকা থাকিলে সপোনপূৰণ কৰিবলৈ সহজ৷ কিন্তু আমি দৰিদ্ৰ পৰিয়ালৰ মানুহ৷ দিনহাজিৰা কৰিয়েই আমি পেট প্ৰৱৰ্তাই আছো৷ মোৰ পঢ়াৰ খৰচ মা দেউতাক কি বুলি খুজিম! সেয়ে কলেজ নথকা দিনত মই হাজিৰা কৰিবলৈ ওলাই যাও৷’
আৰ্থিক দৈনতাৰ মাজতো কাৰ্মাই পঢ়া শুনাত গাফিলতি কৰা নাই৷ সপোনৰ সন্মুখত দাৰিদ্ৰতাক হেঙাৰ হ’বলৈ দিব নোখোজে কাৰ্মাই৷ কাৰ্মাৰ সপোন এগৰাকী আই এএছ বিষয়া হোৱাৰ৷ দিনহাজিৰা কৰি আহিও দৈনিক ৬-৭ ঘণ্টা পঢ়াশুনা কৰে কাৰ্মাই৷ বাণিজ্য শাখাৰ স্নাতকৰ দ্বিতীয় বৰ্ষৰ ছাত্ৰী কাৰ্মা আত্মবিশ্বাসেৰে ভৰপুৰ এগৰাকী নাৰী৷ স্বেচ্ছাসেৱী সংস্থাৰ পৰা লাভ কৰা ধন অন্য কোনো কামত খৰচ নকৰি শিক্ষাৰ ক্ষেত্ৰতেই খৰচ কৰিব খোজে বুলিও সাক্ষাৎকাৰটোত প্ৰকাশ কৰিছে কাৰ্মাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
