অসম লাইভ২৪ঃ বয়স আঢ়ৈ বছৰ। উচ্চাৰণ একেবাৰেই স্পষ্ট নহয়। ইউটিউব সম্পৰ্কে জ্ঞান কিন্তু ভৰপূৰ। ফোনৰ ক’ত স্পৰ্শ কৰিলে কি পোৱা যাব সকলো জানে। কিন্তু এয়াই সমস্যা যে শিশুটোৱে সকলো সময়তে মোবাইল বিচাৰে। বহু অভিভাৱকেই এতিয়া সন্তানৰ মোবাইল মেনিয়াক লৈ সমস্যাত পৰিছে। সাম্প্ৰতিক এক গৱেষণাত পোৱা গৈছে যে শিশুৰ মোবাইল আসক্তি কভিডৰ সময়ৰ পৰাই বৃদ্ধি পাইছে। কিন্তু এই স্বভাৱ কেনেকৈ এৰুৱাব শিশুৰ?
মোহ ত্যাগ কৰিব লাগিব
সন্তানক লৈ অলপ কঠোৰো হ’ব লাগিব। অভিভাৱক বা পৰিয়ালৰ আন সদস্যসকলেও এইক্ষেত্ৰত সতৰ্ক হ’ব লাগে। দিনটোত সময়ে সময়ে ফোনটো শিশুটিৰ পৰা আঁতৰাই থব লাগে।
সময় নিৰ্ধাৰণ কৰি দিয়ক
সন্তানে কিমান সময় মোবাইল চাব তাৰ এটা সময় বান্ধি দিয়ক। টেলিভিছন বা কম্পিউটাৰত অত্যাধিক সময় অতিবাহিত কৰিবলৈ নিদিব। অভিভাৱকে শিশুটিয়ে কোন সময়ত মোবাইল চাব তাৰ সীমা নিৰ্ধাৰণ কৰি দিব পাৰে।
সকলো আব্দাৰত প্ৰশ্ৰয় নিদিব
কন্দাকটা কৰা, খোৱাবোৱা বন্ধ কৰা আদি কৰিলেই সন্তানৰ সকলো আব্দাৰ পূৰণ কৰি দিব তেনে নহয়। অবান্তৰ চাহিদা, খোৱাবোৱা বন্ধ কৰা আদি কৰিবলৈ আৰম্ভ কৰিলে সন্তানক পোনতে ভালধৰণে বুজাবলৈ যত্ন কৰিব।
অন্য কামত ব্যস্ত ৰাখক
পঢ়াশুনাৰ ওপৰিও অন্যান্য সৃজনশীল কামত সন্তানক ব্যস্ত ৰাখিব লাগে। এনেকৈ ৰাখিলে শিশুৰ মগজুৰ বিকাশ ভাল হয়। ঘৰৰ পৰা ওলাই বন্ধুৰ সৈতে খেলাধুলা কৰাৰো অভ্যাস গঢ়ি তুলিব পাৰে। যিয়ে শিশু এটাক সামাজিক হোৱাত সহায় কৰিব।
ফোনত একাধিক এপ নাৰাখিব
লাগতীয়াল এপৰ বাদে বহু পৰিমানে গেমিং এপ আপোনাৰ ফোনত ইনষ্টল নকৰিব। ফোনত একাধিক ডিভাইছ থাকিলে শিশুৱে নতুন নতুন এপসমূহ চাই সময় কটাই। তেনেকৈ তেওঁলোকৰ ফোনৰ ব্যৱহাৰৰ সীমা দিনক দিনে বাঢ়ি গৈ থাকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
