অসম লাইভ২৪ঃ মহাকাশলৈ যাবলৈ সাঁজু হৈছে আমেৰিকাৰ বায়ুসেনাৰ ৰহস্যময় মহাকাশযান এক্স-৩৭ বি। এই যান পৰিচিত চুপাৰ চিক্ৰেট বিমান হিচাপেও। আমেৰিকাৰ বায়ুসেনা আৰু বেচৰকাৰী মহাকাশ গৱেষণা সংস্থা স্পেছ এক্সৰ তৰফৰ পৰা যৌথভাৱে এই বিমান মহাকাশলৈ পঠিওৱা হৈছে। আগন্তুক ২৮ ডিচেম্বৰত আমেৰিকাৰ ৰহস্যময় বিমানখন মহাকাশৰ উদ্দেশ্যে ৰাওনা হ’ব। ফ্লোৰিডাত থকা নাছাৰ মহাকাশ বিমান উৎক্ষেপণ কেন্দ্ৰ ‘কেনেডি স্পেছ চেণ্টাৰ’ৰ পৰা এটা হেভি ৰকেটেৰে এই মহাকাশ যানখনে যাত্ৰা কৰিব। আমেৰিকাৰ বিমানবাহিনীৰ এই মানৱবিহীন যানৰ আছে বহু অজানা ৰহস্য।
পৃথিৱীৰ কক্ষপথত বৰ্তমান পৰ্যন্ত ৫বাৰ দীৰ্ঘম্যাদি অভিযান চলাইছে এক্স-৩৭ বিয়ে। প্ৰতিবাৰেই মহাকাশযানখনৰ সৈতে পঠিওৱা হয় গোপন পেলোড। কিন্তু সেই পেলোডত কি থাকে বৰ্তমান পৰ্যন্ত জানিব পৰা হোৱা নাই। নাছাৰ ৰোবোটিক মহাকাশযানখনে নাছাৰ বিখ্যাত স্পেছ ছাটলৰ দৰেই আকাৰত খুবেই সৰু। যানখন প্ৰায় ২৯ ফুট দীঘল আৰু ৯.৫ ফুট বহল। পাংখাৰ দৈৰ্ঘ্য প্ৰায় ১৫ ফুট।
যি পেলোড সেই বিমানৰ সৈতে পঠিওৱা হয় সেই পেলোড প্ৰায় ৭ ফুট দীঘল আৰু ৪ফুট ডাঙৰ। প্ৰতি অভিযানৰ সময়ত মহাকাশযানখনৰ ওজন থাকে ৫হাজাৰ কিঃগ্ৰাঃৰ ওপৰত। এই মহাকাশ অভিযানক লৈ এসময়ত বহু প্রশ্নও উঠিছিল আমেৰিকাৰ বায়ুসেনাৰ বিৰুদ্ধে। আমেৰিকান বায়ুসেনাৰ তৰফৰ পৰা দিয়া এক বিবৃত্তিত কোৱা হৈছে, ‘এক্স ৩৭ বিৰ প্ৰাথমিক উদ্দেশ্য হৈছে মহাকাশত ভৱিষ্যতৰ বাবে পুনৰ্ব্যৱহাৰযোগ্য প্ৰযুক্তি পৰীক্ষা কৰি মানুহ থকাৰ বাবে উপযোগী হ’বনে সেই গৱেষণা চলোৱা।’
১৯৯৯ চনত আমেৰিকাৰ গৱেষণা সংস্থা নাছাই প্ৰথম এক্স-৩৭ অভিযান আৰম্ভ কৰিছিল। যিয়ে প্রাথমিকভাৱে দুখন মহাকাশযান তৈয়াৰৰ পৰিকল্পনা কৰিছিল। এটা আপ্ৰোছ এণ্ড লেণ্ডিং টেষ্ট ভেহিকল আৰু অন্যখন অৰবিটেল যান। ইয়াৰ পাছতেই ২০০৪ চনত আমেৰিকাৰ বায়ুসেনাক এই প্ৰকল্প হস্তান্তৰ কৰে নাছাই। বায়ুসেনাৰ ডিফেন্স এডভাঞ্চড ৰিচাৰ্ছ প্ৰজেক্টছ এজেন্সিৰ হাতত তুলি দিয়া হয় এই প্ৰকল্প।
আমেৰিকাৰ ‘এটলাছ ভি’ ৰকেটৰ পিঠিত উটি প্ৰথম ৪টা অভিযান চলাইছিল এক্স-৩৭ বি। পঞ্চম অভিযানৰ সময়ত ব্যৱহাৰ কৰা হৈছিল আমেৰিকাৰ ধনকুবেৰ এলন মাক্সৰ মহাকাশ সংস্থা ‘স্পেছ এক্সৰ ফেলকন-৯ ৰকেটখন। অটিভি-১ অভিযান চলিছিল ২০১০ চনৰ এপ্ৰিলত। ২২৪ দিন মহাকাশত থাকি উভতি আহিছিল যানখন। অটিভি-২ অভিযান চলিছিল প্ৰথমটোতকৈ দ্বিগুণ সময় ধৰি। উৎক্ষেপণৰ পাছত প্ৰায় ৪৬৮ দিন মহাকাশত কটাইছিল এক্স-৩৭ বিয়ে। ২০১২ চনৰ জুনত সেই যান পৃথিৱীলৈ উভতি আহে। ইয়াৰ পাছতেই অটিভি-৩ আৰু অটিভি-৪ অভিযানৰ সময়ত মহাকাশযানখনে আৰু বেছি সময় মহাকাশত কটাই উভতি আহে। চতুৰ্থ অভিযানৰ সময়ত যানখনে মহাকাশত ৭১৮ দিন কটায়। ২০১৭ চনৰ ৭ ছেপ্টেম্বৰত পঞ্চম অভিযান চলাইছিল এক্স-৩৭ বিয়ে। ৭৮০ দিন মহাকাশত কটাই উভতি আহে সেই যান।
এই বিমান কিয় ৰহস্যজনক?
এক্স-৩৭ বিৰ পেলোডসমূহক লৈ বাৰে বাৰে সাৱধান হৈছে নাছা। এই মহাকাশযানখনক লৈ বহু চৰ্চা প্ৰতিসময়তে চলি থাকে। এক্স ৩৭ বি বিমানখনত থাকে এটা বিশেষ অস্ত্ৰ। এই যন্ত্ৰত আছে অন্যান্য দেশৰ উপগ্ৰহসমূহৰ ছবি তোলা আৰু ক্ষতি কৰাৰ ক্ষমতা। এই মহাকাশযানখনে ক্ষুদ্ৰতম উপগ্ৰহৰ ওপৰতো নজৰদাৰী কৰিব পাৰে। বিজ্ঞানীৰ দাবী যে অত্যন্ত সৰু উপগ্ৰহক চিনাক্ত কৰিলেও এই উপগ্ৰহক ধ্বংস কৰিব নোৱাৰে এক্স-৩৭বিয়ে। প্ৰত্যেকবাৰ মহাকাশলৈ গৈ বহুদিন কটাই কি কি কাম কৰে এই মহাকাশযানে তাৰো কাৰণ একাংশ বিজ্ঞানীয়ে জনাইছে। বিজ্ঞানীৰ দাবী যে মহাকাশত থাকি মহাকাশত থকা বিশেষ পদাৰ্থসমূহৰ সন্ধান কৰে এক্স ৩৭-বিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
