অসম লাইভ২৪ঃ বৈদিক জ্যোতিষশাস্ত্ৰ অনুসৰি গ্ৰহণ আমাৰ জীৱনৰ অত্যন্ত মাহাত্ম্যপূৰ্ণ ঘটনা। ইয়াৰোপৰি বৈজ্ঞানিক আৰু ভৌগোলিক দিশৰ পৰাও গ্ৰহণৰ বিশেষ গুৰুত্ব আছে। সনাতন ধৰ্মত সূৰ্য আৰু চন্দ্ৰ গ্ৰহণৰ বিশেষ মাহাত্ম্য আছে। সেয়ে গ্ৰহণৰ সময়ত বেছ কিছু সাবধানতা অৱলম্বন কৰাৰ পৰামৰ্শ দিয়া হৈছে। নিজৰ কক্ষপথত ঘুৰি থাকোতে চন্দ্ৰই যেতিয়া পৃথিৱী আৰু সূৰ্যৰ মাজলৈ আহে তেতিয়াই চন্দ্ৰৰ ছায়া পৃথিৱীৰ ওপৰত পৰে। এই অৱস্থাকেই সূৰ্যগ্ৰহণ বুলি কোৱা হয়। আকৌ যেতিয়া পৃথিৱীৰ ছায়া চন্দ্ৰৰ ওপৰত পৰে তেতিয়াই চন্দ্ৰগ্ৰহণ হয়। গ্ৰহণৰ ৯ঘণ্টা আগৰ পৰাই আৰম্ভ হয় সূতক কাল। এই সময়ত কোনো শুভ কাম কৰাটো নিষেধ বুলি শাস্ত্ৰত উল্লেখ আছে। আনকি সূতক কাল চলি থাকোতে মন্দিৰৰ দুৱাৰো বন্ধ কৰি ৰাখিব লাগে।
সূৰ্যগ্ৰহণ সদায়ে অমাবস্যা তিথিত আৰু চন্দ্ৰগ্ৰহণ সদায়ে পূৰ্ণিমা তিথিত হয়। নতুন বছৰত কেইটা সূৰ্যগ্ৰহণ আৰু কেইটা চন্দ্ৰগ্ৰহণ আছে?
সূৰ্যগ্ৰহণ ২০২৪
আগন্তুক বছৰৰ প্ৰথম সূৰ্যগ্ৰহণ হ’ব ৮ এপ্ৰিল সোমবাৰে। এই গ্ৰহণ ভাৰতৰ পৰা দৃশ্যমান নহ’ব।
২০২৪ চনৰ দ্বিতীয় সূৰ্যগ্ৰহণ হ’ব ২ অক্টোবৰ ২০২৪ৰ বুধবাৰে। এই গ্ৰহণো ভাৰতৰ পৰা দেখা নাযাব। সেই কাৰণে কোনো সূতক কাল কাৰ্যকৰী নহ’ব।
চন্দ্ৰগ্ৰহণ ২০২৪
আগন্তুক বছৰৰ প্ৰথম চন্দ্ৰগ্ৰহণ হ’ব ২৫মাৰ্চ ২০২৪ৰ সোমবাৰে। বছৰৰ প্ৰথম চন্দ্ৰগ্ৰহণো ভাৰতৰ পৰা দেখা নাযাব। সেয়ে এই গ্ৰহণৰো কোনো সূতক কাল নাথাকে। গ্ৰহণ থাকিব মুঠ ৪ঘণ্টা ৩৬ মিনিট পৰ্যন্ত।
পঞ্জিকা অনুসৰি নতুন বছৰৰ দ্বিতীয় চন্দ্ৰগ্ৰহণ হ’ব আগন্তুক ১৮ ছেপ্টেম্বৰ ২০২৪ ৰ বুধবাৰে। এই গ্ৰহণ থাকিব ৪ঘণ্টা ৪ মিনিটলৈ। ভাৰতৰ পৰা গ্ৰহণ দেখা নাযাব বাবে ইয়াৰো সূতক কাল নাথাকিব।
অৰ্থাৎ নতুন বছৰত সূৰ্য আৰু চন্দ্ৰ মিলি মুঠ ৪বাৰ গ্ৰহণ হ’লেও এইবাৰ আমাৰ দেশৰ পৰা কোনো এটা গ্ৰহণেই দৃশ্যমান নহয়। সেয়ে গ্ৰহণ সম্পৰ্কীয় কোনো সাৱধানতা বা বিধিনিষেধ ভাৰতীয় লোকে পালন কৰিব নালাগে। গ্ৰহণ দেখা গ’লেহে নিয়মসমূহ মানি চলাটো জৰুৰী।
পুৰাণ অনুসৰি সমুদ্ৰ মন্থনৰ সময়ত উত্থিত অমৃতৰ ভাগক লৈ দেৱতা আৰু দানৱৰ মাজত যুঁজ চলিছিল। মোহিনী ৰূপ ধাৰণ কৰি বিষ্ণুয়ে অসুৰসকলৰ পৰা অমৃতৰ ভাণ্ডাৰ হৰণ কৰি আনে। তেতিয়াই ৰাহু আৰু কেতু নামৰ দুই অসুৰে দেৱতাৰ ৰূপ ধৰি অমৃত পান কৰিবলৈ আহে। চন্দ্ৰ আৰু সূৰ্যই তেওঁলোক দুয়োকে চিনি পায় বিষ্ণুক সেই কথা জনাই। তেতিয়াই বিষ্ণুৱে তেওঁৰ সুদৰ্শন চক্ৰ দি ৰাহু আৰু কেতুৰ ডিঙি চিঙি পেলাই। কিন্তু সেই সময়ত অমৃত তেওঁলোকৰ ডিঙিলৈকে পাইছিল সেয়ে তেওঁলোকৰ দেহৰ মৃত্যু হ’লেও মূৰ দুটা অমৰ হৈ ৰয়। তেতিয়াৰ পৰাই ৰাহু আৰু কেতুৱে সূৰ্য আৰু চন্দ্ৰৰ কক্ষপথত লুকাই বসবাস কৰি আছে। চন্দ্ৰ আৰু সূৰ্য একে সৰলৰেখালৈ আহিলেই ৰাহু আৰু কেতুৱে দুটাকে গিলি পেলাই। এই সময়কেই গ্ৰহণ বুলি কোৱা হয়। ৰাহু কেতুৱে গিলি দিলেও ডিঙি কাটি দিয়াৰ বাবে ক্ষন্তেকতেই বাহিৰলৈ ওলাই আহে চন্দ্ৰ আৰু সূৰ্য।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
