অসম লাইভ২৪ঃ ২৬ জানুৱাৰী, শুকুৰবাৰে দেশজুৰি পালন কৰা হ’ব গণতন্ত্ৰ দিৱস। ২০০ বছৰীয়া ইংৰাজৰ শাসনৰ অৱসানৰ পাছতেই ১৯৪৭ চনৰ ১৫ আগষ্টত এই দেশ স্বাধীন হৈছিল। স্বাধীনতাৰ ঠিক ১১ মাহ ১৮ দিনৰ পাছত ভাৰতৰ সংবিধান ৰচনা কৰা হয়। ১৯৫০ চনৰ ২৬ জানুৱাৰীৰ পৰা ভাৰতত সংবিধানখন প্ৰযোজ্য হয়। সেই দিনটোৰ পৰাই ভাৰতবাসীয়ে ২৬ জানুৱাৰীৰ দিনটোক গণতন্ত্ৰ দিৱস হিচাপে পালন কৰি আহিছে। এদিন দুদিন ভাৰতে স্বাধীনতাৰ ৭৫টা বছৰ অতিক্ৰমো কৰিছে। কিন্তু এতিয়াও বহুতৰ মনৰ বিশেষ সন্দেহ হৈছে গণতন্ত্ৰ দিৱস এইবাৰ ৭৪সংখ্যক নে ৭৫ সংখ্যক?
প্ৰত্যেক বছৰেই গণতন্ত্ৰ দিৱসত দিল্লীত ৰাষ্ট্ৰপতিয়ে পতাকা উত্তোলন কৰে। এই দিনটোত সেনা, স্কুল কলেজৰ ছাত্ৰ ছাত্ৰীয়ে পেৰেডতো অংশগ্ৰহণ কৰে। ভাৰতৰ ইতিহাসত এই দিনটোৰ গুৰুত্ব অপৰিসীম। ১৯৫০ চনৰ ২৬ জানুৱাৰীৰ পুৱা ১০ বাজি ১৮ মিনিটত ভাৰতে গণতান্ত্ৰিক ৰাষ্ট্ৰৰ মৰ্যাদা লাভ কৰে। ইয়াৰ ঠিক ৬মিনিট পাছতেই দেশৰ প্ৰথমগৰাকী ৰাষ্ট্ৰপতি ডঃ ৰাজেন্দ্ৰ প্ৰসাদে শপতগ্ৰহণ কৰে। ১৯৫০ চনৰ ২৬ জানুৱাৰীত দেশত প্ৰথমবাৰৰ বাবে গণতন্ত্ৰ দিৱসো পালন কৰা হয়। ইয়াৰপাছতেই ১৯৫১ চনৰ ২৬ জানুৱাৰীত দ্বিতীয়বাৰৰ বাবে গণতন্ত্ৰ দিৱস পালন কৰা হয়। ১৯৫৯ চনত দশম আৰু ১৯৬৯ চনত ২০তম, ১৯৯৯ চনত ৫০ তম গণতন্ত্ৰ দিৱস পালন কৰা হয়। সেই হিচাপমতে ২০২৪ চনত দেশত পালন কৰা হ’ব ৭৫তম গণতন্ত্ৰ দিৱস।
এই দিনটোত বৰ্ণাঢ্য অনুষ্ঠানৰ কুচকাৱাজৰ মাজেৰে দেশৰ সংস্কৃতি আৰু স্বাধীনতা সংগ্ৰামৰ ইতিহাস উদযাপিত হ’ব সমগ্ৰ দেশত। নতুন দিল্লীৰ পৰা অসম, কাশ্মীৰৰ পৰা কন্যাকুমাৰী সকলোতে পালন কৰা হ’ব গণতন্ত্ৰ দিৱস।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
