শ্বাস-প্রশ্বাসত কষ্ট, কথা কোৱাটো কষ্ট, চকু মেলি থাকিব পৰা নাই দিল্লী বাসী, ভয়ংকৰ পৰিস্থিতি
ৰাজধানীত তাপমাত্ৰা বৃদ্ধি পোৱাৰ লগে লগে অগ্নিকাণ্ডৰ ঘটনা বাঢ়ি যায়। দেওবাৰে পূব দিল্লীৰ গাজীপুৰত অৱস্থিত জাবৰ পাহাৰত অগ্নিকাণ্ড সংঘটিত হয়। কিছু সময়ৰ ভিতৰতে জুইয়ে জাবৰ পাহাৰৰ এক বৃহৎ অংশ আগুৰি ধৰিলে। পাছলৈ আৰু অধিক বিয়পি পৰে জুই। এতিয়াও নিয়ন্ত্ৰণ কৰিব পৰা নাই অগ্নিকাণ্ড।
জাবৰৰ জুইৰ পৰা নিৰ্গত ধোঁৱা ওচৰৰ কলনীবোৰলৈ বিয়পি পৰে। এনে পৰিস্থিতিত গাজীপুৰৰ আশে-পাশে বাস কৰা লোকসকলৰ চকুত জ্বলা-পোৰা কৰাৰ লগতে শ্বাসৰুদ্ধকৰ পৰিস্থিতি কৰি পেলাইছে। তথ্য পোৱাৰ লগে লগে আৰক্ষীৰ বাহিৰেও অগ্নিনিৰ্বাপক বাহিনীৰ ৯খন বাহন সেই স্থানলৈ প্ৰেৰণ কৰা হয়। জুই নিয়ন্ত্ৰণৰ প্ৰচেষ্টা এতিয়াও অব্যাহত আছে।
ঘটনাক লৈ এজন স্থানীয় ব্যক্তিয়ে কয় যে জুইৰ ধোঁৱাৰ বাবে তেওঁলোকে উশাহ লোৱাত অসুবিধাৰ সন্মুখীন হৈছে। প্ৰদূষণৰ বাবে তেওঁলোকে কথা পাতিব পৰা নাই। কালি পুৱাৰে পৰা অগ্নিকাণ্ড সংঘটিত হৈ আছে। প্ৰশাসনে একো কৰা নাই। সেয়ে অতি সোনকালে চৰকাৰে এই সমস্যা সমাধান কৰক বুলি আশা সকলোৰে।
গাজীপুৰ লেণ্ডফিল স্থানত অব্যাহত আছে অগ্নিকাণ্ড। জুই নিৰ্বাপনৰ প্ৰচেষ্টা এতিয়াও অব্যাহত আছে। দিল্লী অগ্নিনিৰ্বাপক বাহিনীৰ এছ অ’ নৰেশ কুমাৰে জনোৱা মতে, লেণ্ডফিলত উৎপন্ন হোৱা গেছৰ ফলত এই অগ্নিকাণ্ড সংঘটিত হৈছে। কোনো লোক হতাহতিৰ খবৰ পোৱা নাই।
জাবৰৰ পাহাৰৰ ওপৰৰ অংশত সংঘটিত হয় অগ্নিকাণ্ড। ইয়াৰ বাবেই অগ্নিনিৰ্বাপক বাহিনীৰ লোকসকলে তাত উপস্থিত হোৱাত যথেষ্ট অসুবিধাৰ সন্মুখীন হ’বলগীয়া হৈছিল। গভীৰ নিশালৈকে নিয়ন্ত্ৰণ কৰিব পৰা নগ’ল অগ্নিকাণ্ড। অগ্নিনিৰ্বাপক বাহিনীয়ে জনোৱা মতে, বৰ্তমান জুই নিয়ন্ত্ৰণৰ বাবে প্ৰচেষ্টা চলোৱা হৈছে। কিন্তু এঠাইত জুই নুমুৱালে আন ঠাইত জুই জ্বলি উঠে। লেণ্ড ফিল ছাইটৰ ওচৰত বাস কৰা স্থানীয় লোকসকলে কয় যে ইয়াত গ্ৰীষ্মকালত প্ৰায়ে জুই লাগে।
আৰক্ষীৰ মতে, দেওবাৰে সন্ধিয়া প্ৰায় ৫.২২ বজাত গাজীপুৰৰ ভূমি ভৰোৱা স্থানত অগ্নিকাণ্ড সংঘটিত হোৱাৰ তথ্য লাভ কৰে। তথ্য লাভ কৰাৰ লগে লগে অগ্নিনিৰ্বাপক বাহিনীৰ গাড়ীসমূহ সেই স্থানলৈ প্ৰেৰণ কৰা হৈছিল। পানী ঢালি দিলে জুই কমে যদিও ধোঁৱা বাঢ়ি যায়। পানী শুকাই গলে লগে লগে পুনৰ জুই জ্বলি উঠে। সেয়ে কিছু অসুবিধাৰ সন্মুখিন হৈছে সকলো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
