অসম লাইভ২৪ঃ হিন্দুধৰ্মাৱলম্বীৰ ওচৰত কাশী অথৱা বেনাৰছ অত্যন্ত পবিত্ৰ এটি চহৰ৷ প্ৰচলিত বিশ্বাস অনুসৰি মহাদেৱৰ ত্ৰিশূলৰ মূৰত কাশীৰ অৱস্থান৷ এই চহৰক শিৱৰ চহৰ বুলি কোৱা হয়৷ প্ৰাচীন ভাৰতৰ ছবি ধৰা পৰে কাশীৰ বিভিন্ন গংগা ঘাটত৷ গংগাৰ ধাৰত অৱস্থিত এই চহৰ মহাদেৱৰ উদ্দেশ্যে নিবেদিত৷ ইয়াতেই আছে মহাদেৱৰ দ্বাদশ জ্যোতিৰ্লিংগৰ অন্যতম এটাও৷ কাশীত মহাদেৱ বাবা বিশ্বনাথ ধাম নামেৰে পৰিচিত এই জ্যোতিৰ্লিংগ৷ বিশ্বনাথৰ মন্দিৰত মহাদেৱৰ দৰ্শন পাবলৈ প্ৰতিদিনে হাজাৰ হাজাৰ ভক্তৰ সমাগম হয় এই স্থানত৷

কাশীত মহাদেৱৰ বাসস্তান

কাশীত মহাদেৱৰ যিমান মন্দিৰ আছে পৃথিৱীৰ অন্য কোনো চহৰতেই মহাদেৱৰ ইমান মন্দিৰ নাই৷ কাশীৰ বিশ্বনাথ মন্দিৰ সমগ্ৰ বিশ্বৰ বিখ্যাত মন্দিৰসমূহৰ ভিতৰত অন্যতম৷ কথিত আছে যে মহাদেৱ আৰু পাৰ্বতীৰ বিবাহৰ পাছতেই তেওঁলোকে কৈলাশ ত্যাগ কৰি কোনো সিদ্ধ স্থানত বাস কৰাৰ সিদ্ধান্ত লয়? মৰ্ত্যৰ ক’ত বাস কৰিব, সেয়া ভাৱোতে ভাৱোতেই শেষ পৰ্যন্ত কাশীত থকাৰ বাবে মনস্থিৰ কৰে৷ কাশীত আহি জ্যোতিৰ্লিংগৰ ৰূপ ধৰি অৱস্থান কৰে মহাদেৱে৷ সেয়ে কাশী হৈছে মহাদেৱৰ অত্যন্ত প্ৰিয় চহৰ৷ মহাদেৱৰ দ্বাদশ জ্যোতিৰ্লিংগৰ ভিতৰত অন্যতম হৈছে কাশী বিশ্বনাথ৷

কাশীত মৃত্যু হ’লে মুক্তিলাভ

বাবা বিশ্বনাথৰ আৰু এক নাম হৈছে বিশ্বেশ্বৰ৷ যাৰ অৰ্থ পৃথিৱীৰ ঈশ্বৰ৷ বিবাহৰ পাছতেই দেবী পাৰ্বতীক লৈ গংগাৰ তীৰবৰ্তী এই স্থানলৈ আহিছিল মহাদেৱ৷ হিন্দু ধৰ্মৰ মানুহৰ মনত কাশী অত্যন্ত পবিত্ৰ স্থান৷ ইয়াত মৃত্যু হ’লে চিধাই স্বৰ্গাৰোহণ হয় বুলি প্ৰচলিত বিশ্বাস৷ মৃত্যুৰ পাছত মৃতদেহ দাহ কৰি সেই ছাই গংগাত উটোৱাই দিয়া হয়৷ গংগা নদীৰ তীৰত অৱস্থিত বিশ্বনাথৰ মন্দিৰ বহু প্ৰাচীন৷ ইয়াত যাৰ মৃত্যু হয় তেওঁলোকৰ কানত মহাদেৱে তাৰক মন্ত্ৰ দিয়ে বুলি ভক্তসকলৰ বিশ্বাস৷ বিশ্বনাথ মন্দিৰত প্ৰাৰ্থনা কৰিলে মনৰ সকলো ইচ্ছা পূৰণ হয় বুলি প্ৰচলিত বিশ্বাস৷

পৌৰাণিক কাহিনী

পুৰাণ অনুসৰি স্বয়ং মহাদেৱে এবাৰ ব্ৰহ্মা আৰু বিষ্ণুৰ মাজত বিতৰ্ক কমাবলৈকে পোহৰৰ শিখাৰে স্বৰ্গ, মৰ্ত্য আৰু ,পৃথিৱীক বিদ্ধ কৰিছিল৷ সেই শিখাৰ পৰাই কাশীত অৱস্থিত জ্যোতিৰ্লিংগৰ সৃষ্টি৷ এই জ্যোতিৰ্লিংগৰ সৃষ্টি কৰি মহাদেৱে প্ৰমাণ কৰিছিল যে তেওঁ সকলো দেৱতাতকৈ পৃথক, তেওঁ সকলোৰে উৰ্ধত, তেৱেই দেৱাদিদেৱ৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ