অসম লাইভ২৪ঃ বৃহস্পতিবাৰৰ সন্ধিয়াৰ পৰা ধ্যানত আছে দেশৰ প্ৰধানমন্ত্ৰী নৰেন্দ্ৰ মোদী। ধ্যানত বহাৰ ৪৫ঘণ্টা সময় ধ্যানত বহাৰ অন্তত শনিবাৰে অৰ্থাৎ আজি ধ্যান ভংগ কৰিব প্ৰধানমন্ত্ৰী মোদীয়ে। প্ৰচাৰৰ সময় শেষ হোৱাৰ পাছৰে পৰাই ধ্য়ানত মগ্ন হৈ আছে প্ৰধানমন্ত্ৰী মোদী। শনিবাৰে পুৱা গোৰখপুৰত নিজৰ বুথ ভোটদানৰ পাছতেই এই বিষয়টোক লৈ মুখ খুলিছে উত্তৰপ্ৰদেশৰ মুখ্যমন্ত্ৰী যোগী আদিত্যনাথে।
বিৰোধী শিৱিৰে মোদীক লেথাৰিকৈ সমালোচনা কৰি থকাৰ সময়তে যোগী আদিত্যনাথে মোদী প্ৰসংগত কয়, ‘মোদীৰ ধ্যানৰ সুফল দেশে পাবই।’ শনিবাৰে গোৰক্ষপুৰৰ এটা বুথত ভোটদান কৰি যোগী আদিত্যনাথে এই মন্তব্য কৰিছে। যোগীয়ে ভোটদান কৰা সমষ্টিৰ প্ৰাৰ্থী হৈছে ৰবি কিষাণ। ৰবি কিষাণক কাষত লৈ যোগীয়ে কয় যে, প্ৰধানমন্ত্ৰী মোদীয়ে তেওঁৰ আঢ়ৈমহিয়া কাৰ্যসূচী সামৰি নিজৰ বাবে কিছু সময় উলিয়াইছে। তেওঁ নিজৰ সকলো সময়ে দেশৰ নামত উৎসৰ্গাই কৰি আহিছে। প্ৰধানমন্ত্ৰীৰ এই উপাসনাই দেশৰেই উৎকৰ্ষ সাধিব। দুৰ্নীতিমুক্ত এখন সমাজ গঢ়াত এই ধ্যানৰ গুৰুত্ব আছে। ভাৰতীয় মুল্যবোধৰ প্ৰতি বিশ্বাস থকা লোকেহে এই কথা বুজিব পাৰিব। আমি আত্মবিশ্বাসী যে মোদীৰ এই ধ্যানৰ সুফল সমগ্ৰ দেশৰ জনতাই লাভ কৰিব।
উল্লেখ্য যে ১৩১ বছৰ পূৰ্বে নৰেন্দ্ৰনাথ দত্ত অৰ্থাৎ স্বামী বিবেকানন্দই যি স্থানত ধ্যানত বহিছিল সেই স্থানতেই মোদীয়েও ধ্যানত বহিছে। ধ্যানত থকাৰ ৪৫ঘণ্টা সময় কেৱল তৰল পদাৰ্থহে খাইছে মোদীয়ে। ডায়েটত আছে ডাবৰ পানী, আঙুৰৰ ৰস আদি। ইতিমধ্য়েই কন্যাকুমাৰীৰ পৰা একাধিক ফটো, ভিডিঅ ভাইৰেল হৈছে। ফটোত নৰেন্দ্ৰ মোদীক দেখা গৈছে গেৰুৱা সাজত। হাতত ৰুদ্ৰাক্ষৰ মালা আৰু কঁপালত তিলক। ওম শব্দ উচ্চাৰণ কৰি সাধনা অব্যাহত ৰাখিছে মোদীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
