কোনে কয় ৰাজনীতি খুব কঠোৰ মনৰ মানুহেহে কৰিব পাৰে! অথৱা ৰাজনীতিলৈ গ’লেই মানুহে আৱেগক হত্যা কৰে? এই ৰাজনৈতিক ক্ষেত্ৰতো এনে মধুৰ কিছু প্ৰেম কাহিনী আছে যি প্ৰেম কাহিনীয়ে চিনেমাৰ কাহিনীকো তল পেলাই দিয়ে৷ তেনে কাহিনীয়েই আছে অটল বিহাৰী বাজপেয়ীৰ৷ তেনে কাহিনীয়েই আছে ৰাজীৱ আৰু ছোনীয়া গান্ধীৰ মাজতো৷ এই কাহিনী প্ৰয়াত প্ৰাক্ত প্ৰধানমন্ত্ৰী ৰাজীৱ গান্ধী আৰু ছোনীয়া গান্ধীৰ৷ যি প্ৰেমত আছিল এখন দেশ এৰি আনখন দেশলৈ গুচি অহাৰ আঁৰৰ বহু অলিখিত কাহিনী৷
ইটালীৰ জীয়াৰী ছোনীয়াৰ প্ৰেমত পৰি তেওঁৰ সৈতে আজীৱন কটোৱাৰ বাবে অংগীকাৰবদ্ধ হোৱা ইন্দিৰা পুত্ৰ ৰাজীৱৰ এই প্ৰেম কাহিনী জানো মসৃণ আছিল৷ ভালপোৱাৰ টানে নুবুজে ধৰ্ম, নুবুজে সংস্কৃতিৰ পাৰ্থক্য, নুবুজে ভাষা বুজে কেৱল হৃদয়ে হৃদয়ে বাগৰিব ধৰা মিঠা মিঠা অনুভৱৰ আকুলতা৷ সেই আকুলতাৰেই ৰাজীৱ গান্ধীয়ে ভাৰতলৈ লৈ আনিছিল ছোনীয়া গান্ধীক৷ ৰাজীৱৰ প্ৰেমতেই দেশ এৰি ভাৰতত ভৰি দিছিল ছোনীয়াই৷ প্ৰেমৰ বাবেই সকলো ত্যাগী ভাৰতলৈ গুচি অহা ছোনীয়াৰ এই প্ৰেমো বেছিদিন তেওঁৰ কাষত নাথাকিল৷
জীৱনটো পৰিকল্পনা কৰাৰ দৰে মসৃণ নহ’ল৷ খুব কম সময়তে ছোনীয়াক নিথৰুৱা কৰি গুচি গ’ল ৰাজীৱ গান্ধী৷ স্বামীৰ মৃত্যুৰ পাছতেই ভাৰতীয় ৰাজনীতিৰ সৈতে ওতপ্ৰোতভাৱে জড়িত হৈ পৰে ছোনীয়া গান্ধী৷ কিন্তু দুয়োৰে মাজত প্ৰেমৰ সূত্ৰপাত কেনেকৈ হৈছিল? ছোনীয়া ৰাজীৱৰ প্ৰথম সাক্ষাৎ ক’ত হৈছিল? একাংশ সূত্ৰই প্ৰকাশ কৰা অনুসৰি কেমব্ৰিজ বিশ্ববিদ্যালয়ৰ এখন গ্ৰীক ৰেস্তোৰাত প্ৰথম দেখা হৈছিল ৰাজীৱ-ছোনীয়াৰ৷ সেই সময়ত কেমব্ৰিজত পঢ়িবৰ বাবে গৈছিল ইন্দিৰা পুত্ৰ ৰাজীৱ৷ ৰেস্তোৰাতেই ৰাজীৱে প্ৰথমে দেখা পায় ছোনীয়াক৷ প্ৰথম দেখাতেই ছোনীয়াক পছন্দ হয় ৰাজীৱ গান্ধীৰ৷ হোটেলৰ মালিকৰ হাতত নেপকিনত এটা কবিতা লিখি ৱাইনৰ বটলত মেৰিয়াই ছোনীয়াক দিবলৈ কয় ৰাজীৱ গান্ধীয়ে৷
সেয়াই প্ৰেমৰ আৰম্ভণী৷ দুজনৰ সম্পৰ্ক আৰম্ভ হ’বলৈ বেছি সময়ো নালাগিল৷ নিজৰ মাতৃ ইন্দিৰা গান্ধীৰ সৈতেও ৰাজীৱ গান্ধীয়ে ছোনীয়াক চিনাকী কৰাই দিলে৷ দেখা মাত্ৰকেই ছোনীয়াক পছন্দ কৰে ইন্দিৰা গান্ধীয়েও৷ তেতিয়াই ইন্দিৰা গান্ধীয়ে এটা প্ৰস্তাৱ ৰাখে ছোনীয়াৰ সন্মুখত৷ ছোনীয়া গান্ধীক ইন্দিৰা গান্ধীয়ে কৈছিল, ‘জীৱনটোলৈ য’ত যাম বুলি ভাৱিছা সেই দেশক এবাৰ কাষৰ পৰা চাই যোৱাহি৷ যাৰ সৈতে জীৱনটো কটাম ভাৱিছা তেওঁৰ সংস্কৃতি সম্পৰ্কেও কিছু বুজ লৈ যোৱা৷’ অৱশ্যে ছোনীয়াৰ পিতৃয়ে এই সম্পৰ্কক মানি ল’ব খোজা নাছিল৷ ৰাজনৈতিক এটা পৰিয়ালৰ সৈতে সম্পৰ্ক গঢ়াত আগ্ৰহী নাছিল ছোনীয়াৰ পিতৃ৷
পিতৃয়ে নিবিচাৰিলেও প্ৰেমে নুবুজে এইসমূহ কথা৷ ৰাজীৱ-ছোনীয়া দৃঢ় প্ৰতিজ্ঞ হৈ আছিল৷ এজনে আনজনৰ সৈতে একেলগে জীৱনটো চলাই নিবই৷ পঢ়াশুনা মাজতে এৰি হঠাৎ দেশলৈ ঘূৰি আহে ৰাজীৱ গান্ধী৷ তাৰ কিছুদিন পাছতেই ছোনীয়াও ভাৰতলৈ আহে৷ তেওঁলোকৰ বিবাহো আছিল নভৱাকৈ ঘটি যোৱা ঘটনাই৷ নতুন দিল্লীৰ বচ্চন হাউছত অনুষ্ঠিত হৈছিল ৰাজীৱ-ছোনীয়াৰ প্ৰি ৱেডিং অনুষ্ঠান৷ ১৯৬৮ চনৰ ফেব্ৰুৱাৰীত বিবাহপাশত আৱদ্ধ হয় ছোনীয়া-ৰাজীৱ৷ ছোনীয়াৰ ওপৰত ইমানেই মুগ্ধ আছিল যে বহুবাৰ ৰাজহুৱাকৈ তেওঁ পত্নী ছোনীয়াৰ প্ৰশংসা কৰা দেখা গৈছিল৷ ছোনীয়াই ৰাজীৱ গান্ধীৰ দৃষ্টিত সবাতোকৈ সুন্দৰী নাৰী৷
সেই সময় আছিল এখিনি সোণালী সময়৷ দুই পুত্ৰ কন্যা ৰাহুল আৰু প্ৰিয়ংকাক সামৰি ছোনীয়াই চলাই গৈছিল সংসাৰ ৰথ৷ কিন্তু এই সুখ কিমানদিনলৈ? ১৯৯১ চনত আহে মৰ্মান্তিক দিনটো৷ বোমা বিস্ফোৰণত নিহত হয় ৰাজীৱ গান্ধী৷ কিন্তু স্বামীৰ মৃত্যুৰ পাছত সৰু সৰু সন্তান দুটিক লৈ ইটালীলৈ ঘূৰি যোৱাৰ ৰাস্তা মুকলি হৈ থাকিলেও ছোনীয়া আৰু উভতি নগ’ল৷ ৰাজীৱৰ প্ৰেমৰ বাবেই এই দেশক আঁকোৱালি লোৱা ছোনীয়া ৰৈ গ’ল যুদ্ধক্ষেত্ৰত৷ পলোৱাৰ সলনি তেওঁ সমুখৰ পৰা যুঁজ নামি পৰিল৷ হাতত তুলি ল’লে গধুৰ ৰাজনৈতিক দায়িত্ব৷ শেষ কৰি দিব খোজা কংগ্ৰেছ দলটোক তেওঁ ধৰি ৰাখিল৷ সন্তানক দিলে পিতৃয়ে দিব নোৱাৰা ৰাজনৈতিক শিক্ষা৷ যি শিক্ষাৰে আজি আগবাঢ়িছে ৰাহুল আৰু প্ৰিয়ংকা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
