এন ডি এৰ মিত্ৰশক্তিৰ অন্য এক দল জনশক্তি পাৰ্টী(ৰামবিলাস)ৰ নেতা চিৰাগ পাছোৱানে তৃতীয়বাৰৰ বাবে মন্ত্ৰিত্ব লাভ কৰিলে মোদী ৩.০ত৷ তিনিবাৰ মোদী মন্ত্ৰীসভাত স্থান পালেও এইবাৰহে কেন্দ্ৰীয় মন্ত্ৰিত্ব লাভ কৰিছে চিৰাগে৷ বিহাৰৰ হাজিপুৰ লোকসভা প্ৰাৰ্থী হিচাপে জয়ী হৈছিল চিৰাগ৷  চিৰাগৰ নেতৃত্বতেই বিহাৰৰ মুঠ ৫খন আসনত জয়ী হৈছে LJP দল৷

হাজিপুৰ কেন্দ্ৰৰ পৰা চিৰাগে ৬লাখতকৈয়ো অধিক ভোটত জয়লাভ কৰিছে৷ আৰজেডিৰ প্ৰাৰ্থীক প্ৰায় ১লাখ ৭০হাজাৰ ভোটত হৰুৱাইছে চিৰাগে৷ প্ৰথমে জাতীয় ৰাজনীতিত পিতৃ ৰামবিলাসৰ দৰে ইমানো সক্ৰিয় নাছিল চিৰাগ৷ কিন্তু নিজৰ ভাগ্য নিজেই সলাই পেলাইছে চিৰাগে৷ কঁপালৰ লিখন নহয় এই কঁপাল কষ্টেৰে বনাইছে চিৰাগে৷ বিহাৰৰ ৰাজনীতিত দোপতদোপে উত্থান চিৰাগৰ৷

২০২৪ ৰ লোকসভাত চিৰাগৰ ৰাজনৈতিক যাত্ৰা এক গুৰুত্বপূৰ্ণ মাইলফলক লৈ উঠিছে৷ চিৰাগে যি হাজিপুৰ কেন্দ্ৰৰ পৰা জয়ী হৈছে সেই কেন্দ্ৰৰ পৰা পূৰ্বে ৮বাৰ লোকসভা নিৰ্বাচনত জয়ী হৈছিল তেওঁ পিতৃ তথা দলিতৰ এগৰাকী অন্যতম নেতা ৰামবিলাস পাছোৱান৷ সেই ৰামবিলাস পাছোৱানৰ আদৰ্শকে সৰোগত কৰি আগুৱাইছে চিৰাগ৷

চিৰাগৰ অৱশ্যে আৰম্ভনিতে ৰাজনীতিৰ পৰা বহু দূৰৈত আছিল৷ চিৰাগে সপোন দেখিছিল অভিনেতা হ’ব৷ মুম্বাইত গৈ ডাঙৰ ডাঙৰ চিনেমা কৰিব৷ ২০১১ চনত অভিনেত্ৰী তথা বৰ্তমানৰ সাংসদ কংগনা ৰানাউটৰ সৈতে এখন ছবিত অভিনয় কৰিছিল চিৰাগে৷ ‘মিলে না মিলে হাম’ নামৰ ছবিত মুখ্য চৰিত্ৰত দেখা গৈছিল চিৰাগক৷ ছবিখনে বক্স অফিচত মুখঠেকেচা খালে৷ আৰম্ভণিতেই কেৰিয়াৰতো যতিয়েই পৰিল চিৰাগৰ৷ ফ্লপ হিৰোৰ ফোঁট যেন কঁপালত আঁকি দিয়া হ’ল চিৰাগৰ৷

সেই ছবিৰ পাছত প্ৰায় ৩বছৰ বলীউডত সংগ্ৰাম কৰি ঘৰৰ লৰা ঘৰলৈ ঘূৰি আহিল৷ মুম্বাই এৰি আকৌ বিহাৰেই হ’ল চিৰাগৰ ঠিকনা৷ তাৰপিছতেই ঘৰতে বহি থকা দেখি পিতৃয়ে চিৰাগক দলীয় কামকাজলৈ ওলিয়াই আনিলে৷ ৰামবিলাসৰ পৰামৰ্শেই ২০১৪ ৰ নিৰ্বাচনত জামুইৰ পৰা লোকসভা নিৰ্বাচনত প্ৰতিদ্বন্দিতা কৰে চিৰাগে৷ জয়ীও হয় চিৰাগ৷ এই বিজয়েই চিৰাগৰ মনত সোমোৱাই দিলে ৰাজনীতিৰ নিচা৷ ৰাজনীতিয়েই তেওঁৰ বাবে উপযুক্ত ক্ষেত্ৰ সেই কথাত দ্বিমত নাই৷ চিৰাগে নিজেও বুজি পালে সেই কথা৷

২০১৯ত চিৰাগে আকৌ নিৰ্বাচন খেলিলে একেটা সমষ্টিৰ পৰাই৷ জামুইৰ পৰা ২০১৯তো পুনৰ জয়ী হ’ল চিৰাগ৷ কিন্তু তেতিয়াই হঠাৎ ৰামবিলাস পাছোৱানৰ মৃত্যু৷ ৰামবিলাসৰ মৃত্যুৰ পাছতেই দুভাগ হৈ পৰে এলজেপি৷ ২০২০ চনত চিৰাগ আৰু পশুপতিৰ পাৰিবাৰিত আৰু ৰাজনৈতিক সম্পৰ্কত ফাঁট মেলে৷ ৰামবিলাসৰ ৰাজনৈতিক উত্তৰাধিকাৰক লৈ চিৰাগ আৰু তেওঁৰ খুৰাক পশুপতিৰ মাজত মতবিৰোধ দেখা গৈছিল৷ সেই চেলেঞ্জ স্বীকাৰ কৰিয়েই ২০২০ ৰ বিধানসভা নিৰ্বাচনত দলৰ নেতৃত্ব দিছিল চিৰাগে৷ নীতিশ কুমাৰৰ জেডিইউ দলৰ আধিপত্য থকা প্ৰত্যেকটো আসনত প্ৰাৰ্থী দিয়ে এল জে পি আৰে৷

২০১৫ চনৰ তুলনাত ২০২০ চনত ২৭খন বিধানসভা আসন হাতৰ পৰা হেৰুৱাই নীতিশৰ দলে৷ ইয়াৰ পাছতেই ৰাজনীতিবিদ তথা দলিত নেতা হিচাপে চিৰাগৰ প্ৰভাৱ বৃদ্ধি পাই থাকে৷ ২০২১ চনত এল জে পিৰ ভাঙোনৰ সময়ত বিজেপি দল থিয় হৈছিল পশুপতিৰ ওচৰত৷ সেই সময়ত পশুপতিসহ লোকসভাত দলৰ পাঁচ সাংসদ এফলীয়া হৈছিল৷ অন্যহাতে আছিল চিৰাগ৷ সেই পৰিস্থিতিত লোকসভাৰ অধ্যক্ষ ওম বিৰালাইয়ো পশুপতি গোষ্ঠীকেই এলজেপি সংসদীয় দল বুলি স্বীকৃতিও দিছিল৷ এন ডি এ জোঁটতো পশুপতি গোষ্ঠীক স্থান দিছিল বিজেপিয়ে৷

প্ৰধানমন্ত্ৰী নৰেন্দ্ৰ মোদীয়েও চিৰাগক দেখুৱাইয়ে পশুপতিক কেন্দ্ৰীয় ৰাজ্যিকমন্ত্ৰীও কৰিছিল৷ ৰামবিলাসৰ যি দলিত ভোটবেংক সেয়া চিৰাগৰ সৈতে আছে সেই ইংগিত লাভ কৰিছিল কেন্দ্ৰৰ বিজেপিয়ে যাৰবাবে আকৌ গুৰুত্ব বাঢ়িছিল চিৰাগৰ৷ তাৰপিছতেই পশুপতিক এৰি আকৌ চিৰাগক আঁকোৱালি ল’লে পদ্মশিৱিৰে৷ চিৰাগেও আনুষ্ঠানিকভাৱে এন ডি এলৈ উভতিল৷ অভিমানত আনফালে কেন্দ্ৰীয় মন্ত্ৰিত্ব এৰিলে পশুপতিয়ে৷ কিন্তু এইবোৰ কথাক আওকান কৰি চিৰাগ আগুৱাই থাকিল৷

২০২১ চনত চিৰাগে আশীৰ্বাদ যাত্ৰা নামেৰে এক মিছিল উলিয়াইছিল সেই মিছিলৰ পৰাই চিৰাগৰ সমৰ্থকৰ সংখ্যা আৰু বৃদ্ধি পালে৷ চিৰাগৰ ক্ৰমবৰ্ধমান জনপ্ৰিয়তাক স্বীকৃতি দি ২০২৩ চনত বিজেপিয়ে তেওঁক স্বাগত জনাই৷ বিহাৰৰ লোকসভা নিৰ্বাচনত আসনো ভাগ বটোৱাৰা কৰে চিৰাগৰ সৈতে৷ চিৰাগৰ দলে হাজিপুৰসহ বিহাৰ লোকসভাৰ পাঁচখন আসন লাভ কৰিছে৷ এই বিজয়ৰ পাছতেই মোদী ৩.০ৰ মন্ত্ৰী হিচাপে স্বীকৃতিও লাভ কৰিছে চিৰাগ পাছোৱানে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ