উচ্চ স্তৰত ডিজে মিউজিক বজোৱাৰ বাবে মগজুৰ ৰক্তক্ষৰণ এজন ব্যক্তিৰ, আচৰিত হৈ পৰিছে চিকিৎসক
এক বিৰল আৰু কুটিল পৰিঘটনাত ছত্তীশগড়ৰ সুৰগুজাত ডিজে সংগীতৰ হাই ডেচিবেল শব্দৰ বাবে এজন লোকৰ মগজুৰ ৰক্তক্ষৰণ হোৱাৰ অভিযোগ উত্থাপন হৈছে।
ৰাজ্যৰ সুৰগুজা সংমণ্ডলৰ বলৰামপুৰ জিলাত এই ঘটনা পোহৰলৈ আহিছে। জানিব পৰা মতে, জিলাখনৰ সনাৱল অঞ্চলৰ বাসিন্দা সঞ্জয় জয়ছৱালে দুদিন পূৰ্বে হঠাতে মূৰ ঘূৰোৱা আৰু বমি হোৱাৰ অভিযোগ উত্থাপন কৰিছিল। লগে লগে সঞ্জয়ে চিকিৎসাৰ বাবে অম্বিকাপুৰৰ চিকিৎসকৰ ওচৰলৈ যায়।
চৰকাৰী জিলা চিকিৎসালয়ত ই এন টি বিশেষজ্ঞ ডাঃ শৈলেন্দ্ৰ গুপ্তাই যেতিয়া ৰোগীজনৰ চিটি স্কেন কৰাইছিল, তেতিয়া তেওঁ আচৰিত হৈ পৰে, কাৰণ লোকজনৰ মূৰৰ পিছফালৰ অংশত এডাল শিৰা ফাটি যোৱাৰ বাবে তেজ জমা হৈছিল, যিটো সাধাৰণতে উচ্চ ৰক্তচাপ, দুৰ্ঘটনা বা যুঁজৰ ফলকত হোৱা দেখা যায়। কিন্তু সঞ্জয় জয়ছৱালৰ কোনোদিনে বি পি বেছি হোৱা নাছিল তথা কোনো দুৰ্ঘটনাৰো ঘটনা সংঘটিত হোৱা নাছিল, যাৰ বাবে চিকিৎসকসকলক অধিক বিমোৰত পৰে।
জানিব পৰা মতে চিকিৎসাৰ সময়তো সঞ্জয়ৰ বি পি স্বাভাৱিক আছিল। সঞ্জয় আৰু তেওঁৰ পৰিয়ালৰ লোকে ডাক্তৰক জনাই যে তেওঁৰ ঘৰৰ ওচৰতে এক ডিজে অনুষ্ঠান আছিল। অনুষ্ঠানটোত বিকট শব্দৰে ডিজে বজাই থকাৰ সময়তে তেওঁৰ মূৰ ঘূৰোৱা যেন লাগিছিল।
পাছত সংকটজনক অৱস্থাৰ পৰিপ্ৰেক্ষিতত সঞ্জয়ক বিশেষ চিকিৎসাৰ বাবে ৰায়পুৰলৈ প্ৰেৰণ কৰা হৈছে। ডাঃ গুপ্তাই কয় যে প্ৰাথমিক নিদানৰ পৰা অনুমান কৰিব পাৰি যে ডিজে সংগীতৰ বিকট শব্দৰ বাবে ৰোগীজনৰ মগজুৰ ৰক্তক্ষৰণ হৈছে।
ডাঃ গুপ্তাই কয় যে যদি ডিজে বা যিকোনো শব্দ উচ্চ ভলিউমত বজোৱা হয় তেন্তে ইয়াৰ বেয়া প্ৰভাৱ পৰে। বধিৰতাৰ সমস্যাও আহি পৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
