শীঘ্ৰেই প্ৰধানমন্ত্ৰী নৰেন্দ্ৰ মোদীৰ সৈতে সাক্ষাৎ কৰিব ডোনাল্ড ট্ৰাম্পে৷ আগন্তুক সপ্তাহতেই মাৰ্কিন যুক্তৰাষ্ট্ৰলৈ যাত্ৰা কৰিব ভাৰতৰ প্ৰধানমন্ত্ৰী নৰেন্দ্ৰ মোদীয়ে৷ আৰু এই ভ্ৰমণকালতেই মোদীৰ সৈতে সাক্ষাৎ কৰিবলৈ ইচ্ছাপ্ৰকাশ কৰিছে আমেৰিকাৰ প্ৰাক্তন প্ৰেছিডেণ্ট ডোনাল্ড ট্ৰাম্পে৷ ডোনাল্ড ট্ৰাম্পে কয়, ‘প্ৰধানমন্ত্ৰী নৰেন্দ্ৰ মোদী ফেন্টাষ্টিক মানুহ৷’ এই কথাৰেই ট্ৰাম্পে আসন্ন নিৰ্বাচনৰ পূৰ্বে ভাৰতৰ তেওঁৰ সমৰ্থন লাভ কৰিবলৈকে প্ৰশংসা কৰিছে বুলি দাবী এতিয়া বহুকেইজন আন্তৰ্জাতিক বিশ্লেষকৰ৷
সদ্য দ্বিতীয়বাৰৰ বাবে হত্যাৰ চেষ্টা চলিছিল ডোনাল্ড ট্ৰাম্পৰ ওপৰত৷ গল্ফ খেলাৰ সময়ত তেওঁক টাৰ্গেট কৰি চাৰি ৰাউণ্ড গুলি চলাইছিল এগৰাকী প্ৰৌঢ়ই৷ কথমপি এই আক্ৰমণৰ পৰা ৰক্ষা পৰে ৰিপাব্লিকান প্ৰেছিডেণ্ট প্ৰাৰ্থী ট্ৰাম্প৷ তাৰপাছতেই প্ৰথমবাৰ সমৰ্থকসকলৰ সন্মুখলৈ আহে ডোনাল্ড ট্ৰাম্প৷ এখন জনসভা সম্বোধন কৰে ট্ৰাম্পে৷ ট্ৰাম্পে কয়, ‘আগন্তুক সপ্তাহত আমেৰিকালৈ ভাৰতৰ প্ৰধানমন্ত্ৰী মোদী আহি আছে৷ প্ৰধানমন্ত্ৰী মোদী ফেণ্টাষ্টিক মানুহ৷’
মঙলবাৰে বিদেশ মন্ত্ৰণালয়ৰ তৰফৰ পৰা জনোৱা হৈছে যে তিনিদিনৰ বাবে আমেৰিকা যাত্ৰা কৰিব প্ৰধানমন্ত্ৰী নৰেন্দ্ৰ মোদীয়ে৷ আগন্তুক ২১ৰ পৰা ২৩ ছেপ্টেম্বৰত কেইবাটাও অনুষ্ঠানত যোগ দিব প্ৰধানমন্ত্ৰীগৰাকীয়ে৷ এই ভ্ৰমণকালত আমেৰিকাত প্ৰধানমন্ত্ৰী মোদীৰ সৈতে থাকিব অষ্ট্ৰেলিয়া আৰু জাপানৰ ৰাষ্ট্ৰপ্ৰধানো৷ তাৰ উপৰিও কোয়াড লিডাৰ চামিটতো অংশগ্ৰহণ কৰিব প্ৰধানমন্ত্ৰী মোদীয়ে৷
উইলমিংটন আৰু ডেলাৱাৰত এই চামিটৰ আয়োজন কৰিছে প্ৰেছিডেণ্ট জো বাইডেনে৷ নিউৱৰ্কলৈকো যাব নৰেন্দ্ৰ মোদী৷ ২২ ছেপ্টেম্বৰত লং আইলেণ্ডত ভাৰতীয় কমিউনিটিৰ সৈতে এক মেগা ইভেণ্টত যোগ দিব প্ৰধানমন্ত্ৰী মোদীয়ে৷ ঠিক তাৰপাছৰ দিনটোত ৰাষ্ট্ৰসংঘৰ হেডকোৱাৰ্টাৰতো এক চামিটত বক্তব্য ৰাখিব মোদীয়ে৷
মাৰ্কিন প্ৰেছিডেণ্ট নিৰ্বাচনৰ পূৰ্বে নৰেন্দ্ৰ মোদীৰ এই যাত্ৰা তাৎপৰ্যপূৰ্ণ বুলি সকলো ৰাজনৈতিক বিশেষজ্ঞই ধাৰণা কৰিছে৷ চলিত মাহৰ আৰম্ভনিতেই এক সমীক্ষাত মাৰ্কিন প্ৰেছিডেণ্ট জ’ বাইডেন আৰু সদ্য নিৰ্বাচিত ব্ৰিটেইনৰ প্ৰধানমন্ত্ৰী কায়াৰ ষ্টাৰ্মাৰক পিছপেলাই শক্তিশালী প্ৰভাৱশালী নেতাৰ উপাধি লাভ কৰিছে মোদীয়ে৷ মৰ্ণিং কনচাল্ট সংস্থাৰ তৰফৰ পৰা সেই সমীক্ষাৰ ৰিপৰ্ট প্ৰকাশ কৰা হৈছে৷ জুলাই মাহৰ ৮ৰ পৰা ১৪ তাৰিখৰ ভিতৰত এই সমীক্ষা কৰা হয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
