সদৌ অসম ছাত্ৰ সন্থাৰ সাধাৰণ সম্পাদক পদৰ পৰা অব্যাহতি লোৱাৰ পাছতেই এইবাৰ শংকৰজ্যোতি বৰুৱাই অব্যাহতি লৈছে প্ৰাথমিক সদস্য পদৰ পৰাও৷ আজি গুৱাহাটী বিশ্ববিদ্যালয়স্থিত আছুৰ মুখ্য কাৰ্যালয়ত অনুষ্ঠিত কেন্দ্ৰীয় কাৰ্যনিৰ্বাহক সভাৰ পূৰ্বে শংকৰজ্যোতি বৰুৱাই প্ৰাথমিক সদস্য পদৰ পৰাও অব্যাহতি লৈছে৷
আছুৰ কেন্দ্ৰীয় কাৰ্যনিৰ্বাহকে প্ৰাক্তন সাধাৰণ সম্পাদকগৰাকীক বহিষ্কাৰ কৰাৰ সন্দেহ বহুতেই প্ৰকাশ কৰি আছিল৷ তাৰমাজতেই আজি প্ৰাথমিক সদস্যপদ ত্যাগ কৰিছে শংকৰজ্যোতি বৰুৱাই৷ বিগত ১৩ ছেপ্টেম্বৰত আছুৰ সাধাৰণ সম্পাদক পদৰ স্বইচ্ছাই অব্যাহতি লোৱাৰ কথা জনাইছিল শংকৰজ্যোতিয়ে৷ কেন্দ্ৰীয় নেতৃত্বলৈ তেওঁ পত্ৰ প্ৰেৰণ কৰি অব্যাহতি লোৱাৰ কথা ঘোষণা কৰিছিল৷ সাধাৰণ সম্পাদক পদত্যাগ কৰিলেও ছাত্ৰ সংগঠনটোৰ সাংবিধানিক বিধি অনুসৰি আছুৰ ৰাজ্যিক কাৰ্যনিৰ্বাহক সদস্য হৈ আছিল।
এক সূত্ৰই প্ৰকাশ কৰা অনুসৰি ১৫ ছেপ্টেম্বৰতে কাৰ্যনিৰ্বাহক সভাৰ দিন ঘোষণা হৈছিল৷ আৰু কাৰ্যনিৰ্বাহক সভাৰ দিন ঘোষণাৰ লগে লগেই আছুৰ সভাপতি উৎপল শৰ্মালৈ প্ৰাথমিক সদস্য পদ ত্যাগ কৰি আন এখন পত্র প্ৰেৰণ কৰিছিল শংকৰজ্যোতি বৰুৱাই। আৰু সেই পত্ৰখনেই উৎপল শৰ্মাই কেন্দ্ৰীয় কাৰ্যনিৰ্বাহক সভাত দাখিল কৰাৰ সম্ভাৱনা আছে৷
উল্লেখ্য যে, আজি অনুষ্ঠিত হ’ব সদৌ অসম ছাত্ৰ সন্থাৰ গুৰুত্বপূৰ্ণ কাৰ্যনিৰ্বাহক সভা। গুৱাহাটী বিশ্ববিদ্যালয়স্থিত আছুৰ মুখ্য কাৰ্যালয়ত অনুষ্ঠিত হ’বলগীয়া কাৰ্যনিৰ্বাহক সভাখনতে ঘোষণা হ’ব ভাৰপ্ৰাপ্ত সাধাৰণ সম্পাদকৰ নাম। আছুৰ পাঁচগৰাকী সহকাৰী সাধাৰণ সম্পাদকৰ মাজৰ পৰা এগৰাকীক দিয়া হ’ব ভাৰপ্ৰাপ্ত সাধাৰণ সম্পাদকৰ দায়িত্ব। কাৰ্বি আংলঙৰ পৰা প্ৰথম এগৰাকী জনজাতীয় যুৱক তথা বৰ্তমান আছুৰ সহকাৰী সাধাৰণ সম্পাদক হিচাপে কাৰ্যনিৰ্বাহ কৰি থকা চৰ্জুন হাঞ্চে আছুৰ ভাৰপ্ৰাপ্ত সাধাৰণ সম্পাদক হিচাপে নিৰ্বাচিত হোৱাৰ পূৰ্ণ সম্ভাৱনা থকাৰ কথাও জনাইছে আছুৰ ভিতৰুৱা সূত্ৰই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
