এবাৰ চালে আপুনি চকু আঁতৰাই আনিব নোৱাৰিব৷ কান্ধ খোলা কলা গাউনেৰে মেট গালাৰ দলিছাত খোজ পেলালে বলীউড অভিনেত্ৰী কিয়াৰা আদৱানীয়ে৷ তেওঁ বৰ্তমান অন্তঃসত্ত্বা৷ ২০২৫ চনৰ ফেব্ৰুৱাৰী মাহত তেওঁ আৰু স্বামী সিদ্ধাৰ্থ মলহোত্ৰাই ইনষ্টাগ্ৰাম একাউণ্টযোগে এই সুখবৰ শ্বেয়াৰ কৰিছিল৷ এইবাৰ প্ৰথমবাৰৰ বাবে মেট গালাত নিজৰ বেবি বাম্প দেখুৱালে কিয়াৰাই৷ বাম্পত হাত থৈ কেমেৰাৰ সন্মুখত হাঁহিমুখে পজ দিছে কিয়াৰাই৷ তেওঁৰ হাঁহিত দেখা গৈছে প্ৰাপ্তিৰ এচমকা পোহৰো৷
কেৱল কিয়াৰাই নহয় আৰু এগৰাকী অন্তঃসত্ত্বা তাৰকাই মেট গালাৰ নীলা কাৰ্পেটত খোজ দিছে৷ তেওঁ আন্তৰ্জাতিক খ্যাতি সম্পন্ন গায়িকা তথা অভিনেত্ৰী ৰিহানা৷ মূৰৰ সৈতে কলা পোছাক পিন্ধি মেট গালাত খোজ পেলাইছে ৰিহানাই৷ কলা গাউনৰ সৈতে কলা কোট আৰু মূৰত গোলাকাৰ কৰা টুপি পৰিধান কৰিছে তেওঁ৷ ৰিহানা তৃতীয়বাৰৰ বাবে মাতৃ হব ওলাইছে৷ সেই খবৰ কেইমাহমান পূৰ্বেই তেওঁ ঘোষণা কৰিছিল৷ ইয়াৰ পূৰ্বেও মেট গালাত খোজ দিছে ৰিহানাই৷ কিন্তু এইবাৰ প্ৰথমবাৰৰ বাবে অন্তঃসত্ত্বা অৱস্থাৰে মেট গালালৈ গৈছে ৰিহানা৷
মেট গালাত খোজ দিয়াৰ পূৰ্বে সংবাদমাধ্যমৰ সন্মুখত দিয়া সাক্ষাৎকাৰত কিয়াৰাই কয়, ‘অন্তঃসত্ত্বা অৱস্থাত মেট গালাত খোজ কঢ়াটো আমাৰ অৰ্থাৎ শিল্পীৰ বাবে খুবেই স্পেছিয়েল মুহূৰ্ত৷ মোৰ ষ্টাইলিষ্ট অনৈতাক ধন্যবাদ জনাব খুজিছো৷ গৌৰৱকো এই পোছাকৰ বাবে ধন্যবাদ৷ টেলৰ্ড ফৰ ইউ থিমক মূৰত ৰাখিয়েই ব্ৰেভহাৰ্ট বিষয়টোক কেন্দ্ৰ কৰি পোছাকৰ পৰিকল্পনা কৰিছিল গৌৰৱে৷ এই পোছাক আন্দ্ৰে লিয়ন টেলিক সন্মান জনাই তৈয়াৰ কৰা হৈছে৷ পোছাকে শক্তি, উদ্দেশ্য আৰু ব্যক্তিত্বক তুলি ধৰে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
