এসপ্তাহতকৈয়ো বেছি সময় নিখোঁজ হৈ থকাৰ পাছত অৱশেষত মেঘালয়ৰ পৰা উদ্ধাৰ হল মধ্যপ্ৰদেশৰ দম্পতিৰ এগৰাকীৰ দেহ৷ সংবাদসংস্থা পি টি আইৰ খবৰ অনুসৰি সোমবাৰে ৰাজা ৰঘুবংশীৰ দেহ উদ্ধাৰ কৰিছে আৰক্ষীয়ে৷ ইতিমধ্যেই সেই দেহ চিহ্নিত কৰিছে মৃতকৰ ভাতৃ বিপিন ৰঘুবংশীয়ে৷ এতিয়াও নিখোঁজ হৈ আছে ৰাজা ৰঘুবংশীৰ পত্নী সোনম৷
মধ্যপ্ৰদেশৰ ইন্দোৰৰ বাসিন্দা ৰাজা আৰু সোনমে বিবাহৰ পাছতেই বিগত ২০ মে’ত মেঘালয়লৈ মধুচন্দ্ৰিমা কটাবলৈ ৰাওনা হৈছিল৷ বিগত ২৩ মেত চেৰাপুঞ্জীলৈ ফুৰিবলৈ যোৱাৰ সময়তে ৰহস্যজনকভাৱে নিখোঁজ হৈ যায় দুয়ো৷ তেওঁলোকৰ বেগ, ভাড়া কৰা স্কুটি তালাচিত উদ্ধাৰ হলেও সোনম আৰু ৰাজাৰ কোনো সন্ধান লাভ কৰা হোৱা নাছিল৷
ইন্দোৰৰ ডেপুটি আৰক্ষী কমিছনাৰ ৰাজেশ কুমাৰ ত্ৰিপাঠীয়ে সংবাদসংস্থা পিটিআইক জনাইছে যে মেঘালয় আৰক্ষীয়ে সোমবাৰে ৰাজা ৰঘুবংশীৰ দেহ উদ্ধাৰ কৰিছে৷ ৰাজাৰ ভাতৃ বিপিন ৰঘুবংশীয়ে ককায়েকৰ দেহ চিনাক্ত কৰিছে৷ কেনেকৈ ৰাজা ৰঘুবংশীৰ মৃত্যু হল সেই কথা এতিয়াও স্পষ্ট হোৱা নাই৷ মৰোনোত্তৰ পৰীক্ষাৰ পাছতহে এই তথ্য স্পষ্ট হব বুলিও জনাইছে মেঘালয় আৰক্ষীয়ে৷
ৰাজা ৰঘুবংশীৰ পৰিয়ালৰ প্ৰায়সকল লোকেই পৰিবহণ ব্যৱসায়ৰ সৈতে যুক্ত৷ বিগত ১১ মেত ৰাজা আৰু সোনমৰ বিবাহ হৈছিল৷ ২০ মেত মেঘালয়ৰ উদ্দেশ্যে ৰাওনা হৈছিল তেওঁলোক৷ তাৰপিছতেই দুয়ো নিখোঁজ হোৱাত পৰিয়ালৰ লোকে সন্দেহ কৰিছিল যে তেওঁলোকক অপহৰণ কৰা হৈছে৷ দম্পতিক উদ্ধাৰৰ বাবে সেয়ে সেনাৰ সাহায্য লোৱাৰো দাবী জনাইছে ৰাজা আৰু সোনমৰ পৰিয়ালে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
