ব্যয়বহুল হ’ল আমেৰিকাৰ ভিছা, কেতিয়াৰ পৰা আৰম্ভ হ’ব এই নিয়ম? কিমান ভৰিব লাগিব টকা?
পূৰ্বতকৈ অধিক ব্যৱবহুল হৈ পৰিল আমেৰিকাৰ ভিছা। এতিয়াৰ পৰা আমেৰিকা ভ্ৰমণৰ বাবদ নাইবা শিক্ষা গ্ৰহণেই হওক কিম্বা ব্যৱসায়, ভিছাৰ বাবে অধিক টকা ভৰিব লাগিব।
ট্ৰাম্প চৰকাৰৰ নতুন এক্ট ‘বিগ বিউটিফুল এক্ট’ৰ অধিনত এতিয়াৰ পৰা ভিছাৰ মাচুল প্ৰৱৰ্তন হব। নতুন নিয়ম অনুসৰি সকলো নন-ইমিগ্ৰেণ্ট ভিছাৰ বাবে ২৫০ ডলাৰ (ভাৰতীয় হিচাপত ২১,৫৪৬ টকা) নতুন ভিছা ইন্টিগ্ৰিটি মাচুল প্ৰৱৰ্তন কৰিছে, যিটো বৰ্তমানৰ ভিছা মাচুলৰ তুলনাত ১৫,৯৪৪ টকা অধিক হ’ব।
অৱশ্যে কেতিয়াৰ পৰা এই ব্যৱস্থাটো আৰম্ভ হ’ব সেই সন্দৰ্ভত জানিব পৰা মতে, অহা বিত্তীয় বৰ্ষৰ পৰা কাৰ্যকৰী হ’ব এই দুগুণ ভিছা মাচুল। অৱশ্যে এই দুগুণ মাচুলৰ ক্ষেত্ৰত আছে এক অন্য নিয়মো। সম্পূৰ্ণ নিয়ম মানি চলিলে আমেৰিকা এৰাৰ সময়ত উভতাই পাব অতিৰিক্ত মাচুল।
নতুন নিৰ্দেশনা অনুসৰি যিসকল আবেদনকাৰীয়ে ভিছা লাভ কৰাৰ পিছত নিয়ম সম্পূৰ্ণৰূপে মানি চলি সময়মতে আমেৰিকা ত্যাগ কৰে সেই সকল লোকক ভিছাৰ অতিৰিক্ত মাচুল ঘূৰাই দিয়া হ’ব।
এই সিদ্ধান্তই ভাৰতকে ধৰি সকলো দেশকে প্ৰভাৱিত কৰিব, বিশেষকৈ যিসকল লোকে পঢ়া-শুনা, চাকৰি বা পৰ্যটন ভিছাৰ বাবে আমেৰিকালৈ আহে।
উল্লেখ্য যে আমেৰিকাই তেঁওলোকৰ দেশলৈ যোৱা মানুহক দু-প্ৰকাৰৰ ভিছা প্ৰদান কৰে। এটা হ’ল নন-ইমিগ্ৰেণ্ট ভিছা, যিটো অস্থায়ীভাৱে থকাৰ বাবে দিয়া হয়। দ্বিতীয়টো ইমিগ্ৰেণ্ট ভিছা, যিটো স্থায়ী বাসস্থানৰ বাবে দিয়া হয়।
আমেৰিকাই ইয়াৰে নন-ইমিগ্ৰেণ্ট ভিছাৰ মাচুল বৃদ্ধি কৰিছে। নন-ইমিগ্ৰেণ্ট ভিছা পৰ্যটন, ব্যৱসায়, অধ্যয়ন বা আন কামৰ বাবদ দিয়া হয়। পৰ্যটন, ব্যৱসায় আৰু চিকিৎসাৰ বাবে বি-১/বি-২ ভিছা উপলব্ধ। আমেৰিকাই অধ্যয়নৰ বাবে এফ-১ ভিছা, চাকৰৰ বাবে এইচ-১বি ভিছা, যিকোনো ধৰণৰ বিনিময় কাৰ্যসূচীৰ বাবে জে-১ ভিছা আৰু কৃষি আৰু অকৃষি কামৰ বাবে এইচ-২এ/এইচ-২বি ভিছা দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
