সীমা-ছুইটী-সৰস্বতীঃ ভোটাৰ তালিকাত ভিন্ন নাম, ছবিত ব্ৰাজিলৰ মডেল, বিজেপি দলৰ বিৰুদ্ধে ডাঙৰ অভিযোগ আনি কি প্ৰমাণ দিছে ৰাহুল গান্ধীয়ে?

কেতিয়াবা সীমা, কেতিয়াবা ছুইটী, কেতিয়াবা আকৌ সৰস্বতী! ভোটাৰ তালিকাত ভিন্ন ভিন্ন নাম৷ সকলো নামৰ বিপৰীতে কিন্তু এগৰাকী নাৰীৰেই ছবি? কোন সেই ৰহস্যময়ী নাৰী? কংগ্ৰেছ নেতা তথা লোকসভাৰ বিৰোধী দলনেতা ৰাহুল গান্ধীৰ দাবী, সেই ছবি ব্ৰাজিলৰ এগৰাকী মডেলৰ৷ দিল্লীত সাংবাদিক সন্মিলনত হাৰিয়ানা বিধানসভা নিৰ্বাচনত ভোটচুৰিৰ অভিযোগ তুলিছে ৰাহুল গান্ধীয়ে৷

২০২৪ চনত হাৰিয়ানাৰ বিধানসভা নিৰ্বাচনত কংগ্ৰেছক হৰুৱাই ক্ষমতালৈ আহিছে বিজেপি৷ ৰাহুলৰ অভিযোগ ভোটচুৰি কৰি সেই নিৰ্বাচনত জয়ী হৈছে পদ্মশিৱিৰ৷ কেৱল অভিযোগ তোলাই নহয় উদাহৰণো দাঙি ধৰিছে ৰাহুলে৷ ৰাহুল গান্ধীৰ দাবী হাৰিয়ানাৰ ভোটাৰ তালিকাত এগৰাকী ব্ৰাজিলিয়ান মডেলৰ ছবি ভিন্ন ভিন্ন নামৰ সৈতে ব্যৱহাৰ কৰা হৈছে৷ অন্তত ২২খন ভুৱা ভোটাৰ কাৰ্ডত সেই মডেলৰ ছবি ব্যৱহাৰ কৰি জালিয়াতি কৰিছে বিজেপিয়ে৷

কংগ্ৰেছ নেতাৰ এই দাবী যে হাৰিয়ানাত মুঠ দুই কোটি ভোটাৰ আছে৷ তাৰ মাজত ২৫ লাখেই ভুৱা৷ এই পৰিসংখ্যা তুলি ধৰি ৰাহুলৰ দাবী, হাৰিয়ানাৰ মুঠ ভোটাৰৰ প্ৰায় ১২ শতাংশই জালভোটাৰ৷ বিজেপিয়ে সেই ভুৱা ভোটাৰক কামত লগাই হাৰিয়ানাত জয়লাভ কৰিছে৷ তেওঁ কয়, হাৰিয়ানাৰ বিধানসভা নিৰ্বাচনত ডাঙৰ জালিয়াতি হৈছে৷ ৰাহুলৰ অভিযোগ, গণতান্ত্ৰিক প্ৰক্ৰিয়া নষ্ট কৰিবলৈ বিজেপিয়ে পৰিকল্পিত কৌশল ব্যৱহাৰ কৰিছে হাৰিয়ানাত৷ আৰু সকলো জানে নিৰ্বাচন কমিছনে৷ ৰাহুলৰ দাবী, ‘কংগ্ৰেছক হৰুৱাবলৈ হাৰিয়ানাত বিজেপি কমিছনৰ সৈতে বুজাপৰা হৈছে৷’ কংগ্ৰেছ নেতাগৰাকীয়ে কয়, ‘হাৰিয়ানাৰ বিধানসভা নিৰ্বাচনৰ প্ৰায় সকলো বুথফেৰত সমীক্ষাত নিশ্চিতভাৱে কোৱা হৈছিল কংগ্ৰেছ জিকিছে৷ কিন্তু ফলপ্ৰকাসৰ পাছত দেখা গৈছে ওলোটা ছবি৷ এয়া কেনেকৈ সম্ভৱ? ৰাহুলৰ দাবী, ‘হাৰিয়ানাৰ ইতিহাসত প্ৰথমবাৰ পোষ্টেল বেলটসমূহ প্ৰকৃত ভোটৰ সৈতে মিলা নাই৷’

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ