ভাৰতবৰ্ষৰ এক সুপৰিচিত উৎসৱ হৈছে মহাশিৱৰাত্ৰি৷ ভগৱান শিৱৰ মহান নিশা হিচাপে এই নিশাটোক পালন কৰা হয়৷ দেৱাদিদেৱ মহাদেৱ আৰু মা পাৰ্বতীৰ চিৰন্তন প্ৰেম উদযাপন কৰাৰ বাবে প্ৰতি বছৰে পালিত হয় মহাশিৱৰাত্ৰি৷ ই মহাবিশ্বৰ দুটা সৰ্বশ্ৰেষ্ঠ শক্তিৰ পবিত্ৰ মিলনক স্মৰণ কৰা হয় এই তিথিত৷ এই শুভ দিনত মা পাৰ্বতী আৰু মহাদেৱৰ বিয়া হৈছিল আৰু মহাদেৱে তাণ্ডৱ নামৰ ঐশ্বৰিক নৃত্যও পৰিবেশন কৰিছিল বুলি বৰ্ণিত আছে শিৱপুৰাণত৷
ভোলানাথক বিয়া কৰাৰ বাবে দেৱী পাৰ্বতীয়েও কঠোৰ তপস্যা কৰিছিল৷ ধাৰণা কৰা হয় যে মহাদেৱক বিয়া কৰাবৰ বাবে মা পাৰ্বতীয়ে ৭বাৰ জন্ম ল’ব লগা হৈছিল৷ আৰু অৱশেষত ফাগুন মাহৰ কৃষ্ণপক্ষৰ ১৩তম দিনত মহাদেৱ আৰু মা পাৰ্বতীৰ বিয়া হৈছিল৷ কথিত আছে যে পাৰ্বতীৰ পিতৃ হিমবানে মহাদেৱৰ তপস্বী আৰু খেয়ালী জীৱনযাপনৰ কাৰণে তেওঁ নিজ কন্যাক শিৱৰ সৈতে বিয়া দিব খোজা নাছিল৷ তেওঁ তৈছিল যে তেওঁ এজন ৰজা আৰু কোনো ঋষিৰ সৈতে নিজৰ কন্যাক তেওঁ বিয়া নিদিয়ে৷ কিন্তু মাতৃ পাৰ্বতীয়ে মহাদেৱকেই নিজৰ স্বামী হিচাপে মানি লৈছিল আৰু তেওঁ প্ৰতিজ্ঞা কৰিছিল যে তেওঁ কেৱল মহাদেৱকেই বিয়া কৰাব৷ অন্যথা তেওঁ কাৰো সৈতে বিবাহপাশত আৱদ্ধ নহয়৷ সেয়ে মাতৃ পাৰ্বতীয়ে মহাদেৱক ৰাজি কৰোৱাৰ বাবে কঠোৰ তপস্যা আৰম্ভ কৰে৷
পাৰ্বতীয়ে এই কঠোৰ তপস্যাৰ কাৰণে মহাশিৱৰাত্ৰিৰ দিনা মা পাৰ্বতী আৰু মহাদেৱৰ পূজা কৰিলে অবিবাহিত নাৰীয়ে কাঙ্খিত পুৰুষক স্বামী হিচাপে পায়৷ মহাশিৱৰাত্ৰিয়ে আমাক এই বাৰ্তাও দিয়ে যে, কোনোৱে যদি নিজৰ ভালপোৱা মানুহজনক বিয়া কৰাব খোজে তেন্তে মা পাৰ্বতীৰ দৰে সমস্ত গুণ আৰু অপূৰ্ণতাসহ এজন সংগীক গ্ৰহণ কৰিব পৰাকৈ শক্তিশালী হব লাগিব৷
মহাদেৱক বিয়া কৰোৱাক বাদ দি তেওঁৰ আন কোনো বাসনা নাছিল৷ তেওঁ এগৰাকী ৰাজকন্যা আছিল৷ কিন্তু ভালপোৱাৰ টানতেই এজন ঋষিক বিয়া কৰাই কৈলাস পৰ্বতত থাকিবলৈ ৰাজি হৈছিল মহাদেৱেও পাৰ্বতীৰ ভালপোৱাক শ্ৰদ্ধা কৰিছিল৷ ভগৱান শিৱ আৰু দেৱী শক্তিৰ এই পৰিপূৰ্ণতাই নাৰী আৰু পুৰুষৰ মিলনক আদৰ্শময় কৰি তোলে৷ সেয়ে মহাশিৱৰাত্ৰি এক প্ৰেমময় তিথিও৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
