আপুনি চৰকাৰী কাৰ্যালয়ত সোমাওঁতে নিশ্চয় এটা কথা মন কৰিছে৷ প্ৰায়সমূহ চৰকাৰী অফিচত থকা চকীত বগা টাৱেল পাৰি থোৱা থাকে৷ সৰু যেন লগা এই বিষয়টোৰ আঁৰতো আছে কিন্তু বিশেষ কাৰণ৷ এই টাৱেলে বহন কৰে বিশেষ ইতিহাস৷ শেহতীয়াকৈ এই বিষয়ক কেন্দ্ৰ কৰি হোৱা বাৰ্তালাপ ভাইৰেল হৈ পৰিছে সামাজিক মাধ্যমত৷ ৰাজনীতিবিদ গুৰদ্বীপ সিং ছপ্পলে এক্সত এটা বিশদ পোষ্ট শ্বেয়াৰ কৰাৰ পিছতে বিষয়টো চৰ্চা হৈছে৷ এই প্ৰথাই ভাৰতত আমোলাতন্ত্ৰিক সংস্কৃতি কেনেদৰে গভীৰভাৱে শিপাই আছে সেই বিষয়ে ব্যাখ্যা কৰিছে বুলিও লিখিছে ছপ্পলে৷
এই কাহিনী ব্ৰিটিছৰ যুগৰ পৰাই আৰম্ভ হোৱা৷ যেতিয়া বিষয়াসকলে ঘোঁৰাত উঠি বহু দূৰ যাত্ৰা কৰিছিল। ধূলি, ঘাম আৰু এয়াৰ কণ্ডিচনাৰ নথকাৰ বাবে বগা টাৱেল পৰিষ্কাৰ-পৰিচ্ছন্নতাৰ মৌলিক প্ৰয়োজনেই হৈ পৰিছিল৷ কামৰ সময়ত ঘাম মচি কিছু আৰামদায়ক হৈ থাকিবলৈ টাৱেল ব্যৱহাৰ কৰা হৈছিল।
স্বাধীনতাৰ পিছত ঘোঁৰা নোহোৱা হ’ল৷ অফিচবোৰৰ আধুনিকীকৰণ হ’ল, এয়াৰ কণ্ডিচনাৰ ৰুম আহিল, কিন্তু টাৱেলবোৰ থাকি গ’ল৷ কেৱল চকীত পাৰি থোৱা হ’ল বগা টাৱেল৷ ব্যৱহাৰতকৈ এয়া এক আভিজাত্য তথা পৰম্পৰালৈ ৰূপান্তৰিত হল৷
ছাপ্পালে এই কথাও আঙুলিয়াই দিছে যে টাৱেলখন বৃহত্তৰ ব্যৱস্থাৰ এটা অংশ মাত্ৰ। “কেৱল টাৱেল নহয়, টেবুলৰ আকাৰ আৰু চিয়াঁহীৰ ৰংও ক্লাছ অনুসৰি নিৰ্ধাৰণ কৰা হয়।” বহু কাৰ্যালয়ত আনকি আচবাব আৰু বিন্যাসেও সূক্ষ্মভাৱে ৰেংক আৰু শক্তিৰ সংকেত দিয়ে। তেওঁ শ্বেয়াৰ কৰা এটা আকৰ্ষণীয় উদাহৰণ আছিল চিয়াঁহীৰ ৰং।
তেওঁ কৈছে, “ভাৰতৰ আমোলাতন্ত্ৰই ১৩ মাহ ধৰি বিতৰ্ক কৰিছিল কোন ৰঙৰ চিয়াঁহী বিষয়াই ফাইলত ব্যৱহাৰ কৰিব পাৰিব। নিয়ম নিৰ্ধাৰণ কৰাৰ আগতেই বিষয়টো একাধিক বিভাগৰ মাজেৰে গৈছিল৷ কনিষ্ঠ বিষয়াসকলে নীলা বা ক’লা চিয়াঁহী ব্যৱহাৰ কৰিছিল৷ আনহাতে জ্যেষ্ঠ বিষয়াসকলে ৰঙা আৰু সেউজীয়া ৰং ব্যৱহাৰ কৰিছিল৷ বগা টাৱেলখন, ডেস্কত ৰঙা টেলিফোন এটা আৰু দুৱাৰত থিয় হৈ থকা এজন পিয়ন। এইবোৰে একেলগে এনে এক পৰিৱেশৰ সৃষ্টি কৰে য’ত ক্ষমতা কেৱল ব্যৱহাৰ কৰা নহয়, আভিজাত্য দেখাও যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
