মহিলা ভোটাৰ আছে, নাই মহিলা নেতৃত্বহে, ১২৬ সমষ্টিৰ পৰা মাত্ৰ ৭গৰাকী মহিলা আহিল বিধানসভালৈ, অসম বিধানসভাত কিয় কমিছে মহিলাৰ সংখ্যা?

অসমত আকৌ এবাৰ বিজেপি চৰকাক৷ হেটট্ৰিক কৰিলে বিজেপিয়ে৷ হিমন্ত ২.০ গঠনৰ পূৰ্বেই চৰ্চালৈ আহিছে ১২৬টা সমষ্টিৰ কথা৷ কোন সমষ্টিত কোনে জয়লাভ কৰিলে সকলোৱে এবাৰ জুঁকিয়াই চাইছে সমষ্টিসমূহ৷ নিৰ্বাচনত বিজেপি দলৰ ফলাফল পূৰ্বতকৈ উন্নতহে হ’ল যদিও নাবাঢ়িল মহিলাৰ সংখ্যা৷ এইবাৰো বিধানসভাত থাকিব মাত্ৰ ৭গৰাকী মহিলা বিধায়কহে৷

২০২১ চনৰ বিধানসভা নিৰ্বাচনতো মহিলাৰ সংখ্যা আছিল মাত্ৰ ৭গৰাকী৷ এইবাৰো সেই সংখ্যা বৃদ্ধি নহ’ল৷ ১২৬জন বিধায়কৰ ভিতৰত ১১৯জনেই পুৰুষ বিধায়ক আহিল বিধানসভালৈ৷ বিৰোধী, শাসক মিলি মাত্ৰ ৭গৰাকী মহিলা বিধায়কহে আহিল বিধায়ক হৈ৷ মন কৰিবলগীয়া কথা এয়াই যে অসমৰ ২.৫ কোটি ভোটাৰৰ ভিতৰত মহিলা ভোটাৰৰ সংখ্যা প্ৰায় ৫০ শতাংশ৷ তেনেক্ষেত্ৰতো মহিলা নেতৃত্ব কিয় ইমান কম সেয়াও ৰাষ্ট্ৰীয় প্ৰেক্ষাপটত চৰ্চাৰ বিষয় হৈ পৰিছে৷

মনকৰিবলগীয়া কথা এয়াই যে অসমত পূৰ্বতকৈ কমিছে মহিলা ৰাজনীতিকৰ সংখ্যা৷ ২০১৬চনত ৯১ গৰাকী মহিলাই নিৰ্বাচনত প্ৰতিদ্বন্দ্বিতা কৰিছিল৷ তাৰপিছত ২০২১ চনত এই সংখ্যা ৭৪লৈ হ্ৰাস পায়৷ আৰু এইবাৰ অৰ্থাৎ ২০২৬ চনত মাত্ৰ ৫৯ গৰাকী মহিলাই নিৰ্বাচনত প্ৰতিদ্বন্দ্বিতা কৰিছে৷

পূৰ্বৰ পৰিসংখ্যা যদি খুচৰি চোৱা যায় তেন্তে ২০১১ চনত বিধানসভাত নিৰ্বাচিত হৈ অহা মহিলা বিধায়কৰ সংখ্যা আছিল ১৪গৰাকী৷ এইবাৰ অৰ্থাৎ ২০২৬ চনৰ নিৰ্বাচনত ৬গৰাকী NDA সমৰ্থীত মহিলা প্ৰাৰ্থী জয়ী হৈ বিধানসভালৈ আহিছে৷ বিৰোধী দলৰ অৰ্থাৎ কংগ্ৰেছৰ পৰা এগৰাকী মহিলা বিধায়িকা জয়ী হৈছে৷

উল্লেখ কৰা প্ৰয়োজন যে এইবাৰৰ নিৰ্বাচনত ১২৬ টা সমষ্টিৰ ১০২খন আসনেই NDA মিত্ৰজোঁটৰ হাতলৈ আহিছে৷ ইয়াৰে বিজেপিয়ে লাভ কৰিছে ৮২খন আসন, বিপিএফে ১০খন আসন, অগপই ১০খন আসন লাভ কৰিছে৷ এইবাৰৰ নিৰ্বাচনত জয়লাভ কৰা মহিলা বিধায়কৰ তালিকাত আছে গোলাঘাটৰ বিধায়ক অজন্তা নেওগ, মংগলদৈৰ পৰা জয়ী হৈছে নিলীমা দেৱী, ডিফুৰ পৰা নিছু তেৰাংপি, হাফলঙৰ পৰা ৰূপালী লাংথাচা, বঙাইগাওঁৰ পৰা দীপ্তিমা চৌধুৰী, কোকৰাঝাৰৰ পৰা ছেউলি বসুমতাৰীয়ে জয়লাভ কৰিছে৷ ইফালে বিৰোধীৰ মুখ্য ভূমিকাত থকা কংগ্ৰেছ দলৰ পৰা মাত্ৰ এগৰাকী মহিলা বিধায়ক বিধানসভালৈ আহিছে৷ ধুবৰী সমষ্টিৰ পৰা কংগ্ৰেছৰ হৈ জয়ী হৈছে বেবী বেগম৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ