সাংবিধানিক শিষ্টাচাৰ নামানিলে মমতা বেনাৰ্জীয়ে! মমতা বেনাৰ্জীয়ে শেষপৰ্যন্ত পদত্যাগ নকৰিলে কেনেকৈ শপত ল’ব নতুন চৰকাৰে?

পশ্চিমবংগ বিধানসভাৰ ম্যাদ শেষ হ’ব আগন্তুক ৭ মে বৃহস্পতিবাৰে৷ পদত্যাগ নকৰিলে আনুষ্ঠানিকভাৱে সেই দিন পৰ্যন্ত মমতা বেনাৰ্জী পশ্চিমবংগৰ মুখ্যমন্ত্ৰী হৈ থাকিব৷ কিন্তু ৭ মে পাৰ হলেই মুখ্যমন্ত্ৰী পদ নাথাকে৷ ইস্তাফা নিদিলেও তেওঁৰ নামৰ আগত প্ৰাক্তন মুখ্যমন্ত্ৰী শব্দটো লিখা হ’ব৷ নিৰ্বাচনত হৰা-জিকা যিয়েই নহওক পূৰ্বৰ কাৰ্যকাল শেষ হোৱাৰ সময়ত ৰাজ্যপালৰ ওচৰত গৈ ইস্তাফা দিয়াটো নিয়ম৷ ই এক ৰীতি বা সাংবিধানিক শিষ্টাচাৰ৷

১৫ বছৰৰ পূৰ্বে ২০১১ চনৰ ১৩ মে দুপৰীয়া ১ বজাত ভোটৰ ফলাফল স্পষ্ট হৈ অহাৰ সময়তে তৎকালীন মুখ্যমন্ত্ৰী বুদ্ধদেৱ ভট্টাচাৰ্যই ৰাজভৱনলৈ গৈ তৎকালীন ৰাজ্যপাল গোপালকৃষ্ণ গান্ধীৰ সৈতে দেখা কৰি পদত্যাগপত্ৰ হাতত তুলি দিছিল৷ সেয়াই নহয় তেওঁ ত্যাগ কৰিছিল চৰকাৰী বাহনো৷ ৰাজ্যপালৰ ভৱনৰ পৰা অন্য এখন বাহনেৰে তেওঁ পাৰ্টী অফিচলৈ গুচি গৈছিল৷

উল্লেখ কৰা প্ৰয়োজন যে বিজেপি দলে পশ্চিমবংগত নতুন চৰকাৰ গঠন কৰিব৷ ৭ মেত পুৰণি চৰকাৰৰ ম্যাদ উকলিব আৰু তাৰপিছতেই বিজেপি দলে নতুন চৰকাৰ গঠন কৰিব৷ প্ৰধানমন্ত্ৰীৰ ভাষণত সোমবাৰে এটা কথা স্পষ্ট হৈছে যে ৯ মেত নতুন চৰকাৰ গঠন কৰিব বিজেপি দলে৷ সেই দিনটো বাচি লোৱাৰ আন এক কাৰণ হৈছে সেই দিনটোত ৰবীন্দ্ৰ জয়ন্তীও৷

বুধবাৰে নিশা পশ্চিমবংগলৈ আহিব পাৰে কেন্দ্ৰীয় গৃহমন্ত্ৰী অমিত শ্বাহ৷ আৰু অমিত শ্বাহৰ উপস্থিতিতেই বিজেপিৰ পৰিষদীয় দলৰ সৈতে বৈঠক অনুষ্ঠিত কৰি মুখ্যমন্ত্ৰীৰ নাম ঘোষণা হব পাৰে৷ যি পৰিষদীয় দলৰ নেতা হব তেঁৱেই ৰাজ্যখনৰ মুখ্যমন্ত্ৰীও হব৷ তেওঁৱেই ৰাজ্যপালৰ ওচৰলৈ গৈ চৰকাৰ গঠনৰ আনুষ্ঠানিক আৰ্জিও জনাব৷ তাৰপাছতহে অনুষ্ঠিত হব শপতগ্ৰহণ অনুষ্ঠান৷