জৰায়ু মুখৰ কৰ্কট আৰু স্তন কৰ্কটৰ লগতে বাঢ়িছে মহিলাৰ ডিম্বাশয়ৰ কৰ্কটৰ আশংকা৷ অভেৰিয়ান বা ডিম্বাশয়ৰ কৰ্কট ধৰা পৰিলে সেই ব্যক্তিয়ে আগন্তুক পাঁচ বছৰ বাচি থকাৰ সম্ভাৱনা মাত্ৰ ৫০-৫৪ শতাংশ৷ প্ৰাথমিক পৰ্যায়ত ধৰা পৰিলে ৯০-৯৫শতাংশ ক্ষেত্ৰত ৰোগীৰ প্ৰাণ ৰক্ষা কৰিব পাৰি৷ কিন্তু ঘটনাক্ৰমে বহু মহিলাই ডিম্বাশয়ৰ কৰ্কটৰ লক্ষণসমূহ এৰাই চলে৷ ইয়াৰ প্ৰধান কাৰণ হৈছে সচেতনতাৰ অভাৱ৷ ৰোগ সম্পৰ্কে অজ্ঞতা আৰু সঠিক সময়ত স্বাস্থ্য পৰীক্ষা নকৰিলে ডিম্বাশয়ৰ কৰ্কটৰ আশংকা বাঢ়ে৷ সেয়ে সচেতনতা বঢ়াবলৈ প্ৰতি বছৰ ৮ মে’ত বিশ্ব অভেৰিয়ান কেন্সাৰ দিৱস পালিত হয়৷
কিমান বছৰ বয়সৰ পৰা সচেতন হোৱা জৰুৰী?
বয়স ৩০ পাৰ হলেই আলট্ৰাচাউণ্ড, আলট্ৰাছনগ্ৰাফি, লিপিড প্ৰফাইল, H1bcৰ দৰে কিছু সাধাৰণ টেষ্ট নিয়মিত কৰোৱাটো জৰুৰী৷ যিসমূহ মহিলাই মেনোপজৰ সময় পাইগৈ তেতিয়া তেওঁলোক আৰু বেছি সচেতন হোৱাটো দৰকাৰ৷ বয়স ৪০ৰ পৰা ৫০ পালেগৈ গাইনোকোলজিকেল সমস্যাসমূহ সম্পৰ্কে আৰু সচেতন হোৱা দৰকাৰ৷ মেনোপজৰ সময়ত বা মেনোপজৰ পাছত বেছিকৈ সচেতন থাকিলেই হ’ল৷ আৰু যদি পৰিয়ালত কৰ্কটৰ ইতিহাস থাকে তেতিয়া নিয়মিত চেকআপৰ দৰকাৰ৷
কি কি স্বাস্থ্য পৰীক্ষা কৰিব?
CA125 ৰক্ত পৰীক্ষা কৰিব পাৰে৷ এই ৰক্ত পৰীক্ষাৰ মাধ্যমেৰে ডিম্বাশয়ৰ কৰ্কটৰ কোষৰ উপস্থিতি ধৰা পৰে৷ CA125-ৰ মাত্ৰা বেছি হ’লে দ্ৰুত চিকিৎসকৰ সৈতে যোগাযোগ কৰক৷
বহু সময়ত CA125 টেষ্টটো কেন্সাৰৰ উপস্থিতি চিনাক্ত কৰিব পাৰি৷ বিশেষকৈ শৰীৰত কোনো উপসৰ্গ প্ৰকাশ নাপায়৷ এই অৱস্থাত ট্ৰেন্সভেজাইনেল আলট্ৰাচাউণ্ড স্কেন, পেলভিক এক্সাম আৰু চিটি স্কেন, আলট্ৰাচনোগ্ৰাফি, হিষ্টেৰোস্কপি আৰু বয়োপচিও কৰিব লগা হ’ব পাৰে৷
কি কি লক্ষণ দেখিলে সতৰ্ক হ’ব?
ঋতুস্ৰাৱৰ সময়ত তলপেট, ককাল, পেলভিছ অঞ্চলত বিষ হোৱাটো স্বাভাৱিক৷ কিন্তু ঋতুস্ৰাৱ শেষ হৈ যোৱাৰ পাছতো যদি বিষ হয় তেতিয়া স্কিনিং কৰক৷ বিশেষকৈ মেনোপজৰ সময়ত এই ধৰণৰ শাৰীৰিক অস্বস্তি পাতলকৈ লোৱাটো উচিত নহয়৷
পানী নোখোৱাকৈয়ো ঘনে ঘনে প্ৰস্ৰাৱ হোৱা, অলপ খালেই পেট ভৰি যোৱা, সকলো সময়তে ক্লান্ত লগা, ওজন কমি যোৱা, মূৰঘুৰোৱা, পৰ্যাপ্ত বিশ্ৰাম লৈয়ো দুৰ্বলতা দূৰ নোহোৱা, কিবা খালেই গেছ হোৱা, বমি বমি ভাৱ, পেটত অস্বস্তি ইত্যাদিও অভেৰিয়ান কেন্সাৰৰ লক্ষণ হব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
