অসম বিধানসভা নিৰ্বাচন ২০২৬-ত কংগ্ৰেছৰ বিপৰ্যয়ৰ পাছত ৰাজ্যিক নেতৃত্বত আলোড়নৰ সৃষ্টি হৈছে। অসম প্ৰদেশ কংগ্ৰেছৰ সভাপতি গৌৰৱ গগৈয়ে নিজে যোৰহাট সমষ্টিত প্ৰায় ২৩,০০০ ভোটৰ ব্যৱধানত পৰাজিত হৈছে। নিৰ্বাচনৰ ফলাফল ঘোষণাৰ পাছতেই অসম কংগ্ৰেছৰ প্ৰভাৰী জিতেন্দ্ৰ সিঙে এআইচিচি (AICC)-ৰ সাধাৰণ সম্পাদকৰ পদৰ পৰা পদত্যাগ কৰে। তেওঁ অসম কংগ্ৰেছৰ দায়িত্বৰ পৰা আঁতৰি যায়।
ইয়াৰ মাজতে ৰিপুন বৰাৰ মন্তব্যই সৃষ্টি কৰিছে চাঞ্চল্যৰ। তেওঁ কয়, ‘গৌৰৱ গগৈ পদত্যাগ কৰিব লাগে নে নালাগে সেয়া কংগ্ৰেছে চাব। কোনোবাই এই বিষয়ে কলেই নহ’ব। এই সকলো কথা দিল্লীত থকা আমাৰ হাইকামাণ্ডে চোৱা-চিতা কৰি আছে আৰু তেওঁলোকে যদি দেখে প্ৰয়োজন আছে তেতিয়া কৰিব আৰু যদি নাই তেন্তে নকৰে।’
লগতে ২০২১ৰ নিৰ্বাচনত পৰাজয়ৰ পাছত পদত্যাগ কৰা ৰিপুন বৰাই হঠাৎ কয়, ‘বিৰোধীয়ে ৫১ খন আসন পোৱাৰ পাছতো যোৱাবাৰ মই পদত্যাগ কৰিছিলো। গৌৰৱ গগৈয়ে পদত্যাগ কৰে নে নকৰে সেয়া নিজৰ কথা। ২০২১ৰ ফলাফল ২০২৬তকৈ ভাল আছিল কংগ্ৰেছৰ।’
গৌৰৱ গগৈক লৈ পৰ্যালোচনা চলাই আছে কংগ্ৰেছ হাইকমাণ্ডে। এতিয়া সভাপতি হিচাপে গৌৰৱক ৰাখিব নে নাৰাখে সিদ্ধান্ত ল’ব হাইকমাণ্ডে। ৰাজ্যিক নেতৃত্ব সলনিৰ বিষয়টো এতিয়া সম্পূৰ্ণৰূপে হাই কামাণ্ডৰ সিদ্ধান্তৰ ওপৰত নিৰ্ভৰ কৰিছে। অহা ৯ মে’ত গুৱাহাটীত জিলা সভাপতি আৰু বিষয়ববীয়াসকলৰ উপস্থিতিত এক গুৰুত্বপূৰ্ণ পৰ্যালোচনা বৈঠক অনুষ্ঠিত হ’ব।
লগতে চাওক এই ভিডিঅ’- অসমত কংগ্ৰেছৰ শোচনীয় পৰাজয়ৰ পাছতেই সলনি হ’ব পাৰে সভাপতি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
