শীঘ্ৰে ছবিগৃহলৈ আহি আছে নতুন অসমীয়া ছবি ‘চুপা চুপি’। ৱেব ছিৰিজ হিচাপে সফলতা লাভ কৰাৰ পিছত এইবাৰ পূৰ্ণ দৈৰ্ঘৰ ছবি হিচাপে দৰ্শকৰ মাজলৈ আহি আছে ছবিখন। আজি আনুষ্ঠানিকভাৱে মুকলি কৰা হয় ছবিখনৰ গীত আৰু পোষ্টাৰ। এতিয়া ‘চুপা চুপি’ক লৈ সকলোৰে অপেক্ষা, উৎকণ্ঠা।
পোষ্টাৰ মুকলিৰ পিছতে ছবিখনকলৈ অসম লাইভ 24ৰ অধ্যক্ষ নৃপেন দাসে কয়, “‘চুপা চুপি চিনেমাখন অতি বিগ বাজেটৰ এখন চিনেমা। অহা ১২জুনত অসমৰ প্ৰতিগৰাকী দৰ্শকলৈ আমি চিনেমাখন উপহাৰ দিবলৈ ওলাইছো। আশা কৰো অসমবাসীয়ে চিনেমাখনক আঁকোৱালি ল’ব।”
‘চুপা চুপি’ ছবিৰ প্ৰথমটো গীত ‘গুঠি ল’লো’ৰ শুভ মুক্তি হোৱাৰ পিছতেই দৰ্শকৰ যথেষ্ঠ সমাদৰ লাভ কৰিছিল। এই গীতটো বিশ্ৰুত শইকীয়াই কণ্ঠ নিগৰাইছিল। এটলাছ ক্ৰিয়েশ্যন আৰু ডি জে এন্টাৰটেইনমেন্টৰ বেনাৰত নৱ-প্ৰজন্মৰ পৰিচালক প্ৰণৱ ভৰালীৰ পৰিচালনাৰে নিৰ্মাণ কৰা হৈছে ছবিখন। এতিয়া নিৰ্মাতাগোষ্ঠীয়ে ১২ জুনত মুক্তি দিব ছবিখন।
ৱেব ছিৰিজখনৰ দৰে পূৰ্ণ দৈৰ্ঘৰ ছবিখনৰ জৰিয়তে পুনৰ দৰ্শকৰ ওচৰলৈ উভতি আহিব উৰ্মিলা বৌ, জয়ন্ত চালফা, দীপক, ৰূপ, চাণক্য, ৰমা আদি চৰিত্ৰসমূহ। প্ৰণৱ ভৰালীৰ ৰচনা আৰু পৰিচালনাত নিৰ্মাণ হোৱা এই ছবিখন প্ৰযোজনা কৰিছে নৃপেন দাস আৰু হৃষিকেশ পাটগিৰিয়ে। আনহাতে ছবিখনত অভিনয় কৰিছে কমল লোচন, ৰাগিনী কৌশিক, কৌশিক ভৰদ্বাজ, হিমাংশু প্ৰসাদ দাস, স্নিগ্ধা গগৈ, বৈভৱী গোস্বামী, জিণ্টু কুমাৰ কাশ্যপ আদি বহুকেইগৰাকী শিল্পীয়ে । কাল্পনিক আৰু বাস্তৱৰ সংমিশ্ৰণৰ আধাৰত নিৰ্মিত এটি সুন্দৰ কাহিনী দেখিব দৰ্শকে।
উল্লেখ্য যে, ৱেব ছিৰিজখনৰ প্ৰতিটো চৰিত্ৰই যিদৰে দৰ্শকৰ হৃদয়ত এক সুকীয়া স্থান লাভ কৰিছে, ঠিক একেদৰে ছবিখনেও সকলোৰে হৃদয় জিনিব বুলি আশা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
