বৰ্তমান আমৰ বতৰ। বিভিন্ন প্ৰজাতিৰ আমেৰে ভৰি পৰিছে বজাৰ। কিন্তু গাঁঠিৰ ধন ভাঙি বজাৰৰ পৰা ঘৰলৈ আম কিনোতে সাৱধান হ’ব। কিয়নো কম সময়তে অধিক লাভৰ আশাত বহু অসাধু ব্যৱসায়ীয়ে বিভিন্ন কেমিকেল ব্যৱহাৰ কৰি ওলিয়াই দিয়ে বজাৰত। যিবোৰ খাই আপোনাৰ লগতে আপোনাৰ পৰিয়ালে আক্ৰান্ত হব পাৰে বিভিন্ন ৰোগত। হায়দৰাবাদ, চেন্নাই, দিল্লীকে ধৰি দেশৰ কেইবাখনো চহৰত মাৰাত্মক কেমিকেল ব্যৱহাৰ কৰি কৃত্ৰিমভাৱে আম পকোৱা অসাধু ব্যৱসায়ীৰ গুদামত অভিযান চলাই কেইবাশ কিলো আম জব্দ কৰিছে। আমকে ধৰি বিভিন্ন ফল কৃত্ৰিমভাৱে পকাবলৈ কেলছিয়াম কাৰ্বাইডৰ দৰে মানৱ দেহৰ বাবে হানিকাৰক কেমিকেল ব্যৱহাৰ কৰে তেনে অসাধু ব্যৱসায়ীয়ে। এনেধৰণৰ কেমিকেল বাৰে বাৰে ব্যৱহাৰৰ ফলত আপোনাৰ মূৰৰ বিষ, শ্বাস-প্ৰশ্বাসত কষ্ট পোৱা, বমি, পেটৰ বিষয়ৰ দৰে ৰোগত ভুগিব পাৰে।
এইকেইটা প্ৰকাৰেৰে চিনাক্ত কৰিব পাৰে প্ৰাকৃতিকভাৱে পকোৱা আম
বজাৰত পোৱা আমৰ ৰঙৰ জৰিয়তেও আপুনি আমটো প্ৰাকৃতিকভাৱে পকিছে নে কৃত্ৰিমভাৱে পকিছে ইয়াক চিনাক্ত কৰিব পাৰে। বজাৰত পোৱা গাঢ় হালধীয়া ৰঙৰ আমটো প্ৰাকৃতিকভাৱে পকোৱা আম নহবও পাৰে ইয়াৰ বিপৰীতে যদি আমটোৰ ৰং ঈষৎ হালধীয়া আৰু সেউজীয়া হয় সেই আমটো প্ৰাকৃতিকভাৱে পকাৰ সম্ভাৱনাই বেছি।
আমটো চুই চায়ো আপুনি ক’ব পাৰিব আমটো কি পদ্ধিতিৰে পকিছে। যদি আমটোৰ ওপৰভাগ অলপ টান কিন্তু অলপ যোৰকৈ হেঁচি দিলে ভিতৰভাগত প্ৰয়োজনতকৈ বেছি ঢিলা অনুভৱ কৰে তেনেহলে সেই আমটোও কৃত্ৰিমভাৱে পকোৱা হ’ব পাৰে। আনহাতে বজাৰত পোৱা বহু আমত আপুনি সৰু সৰু বিন্ধাৰ দৰে চিহ্ন বা দাগ দেখিব পাৰে। তেনেকুৱা দাগ বা চিহ্ন থকা আম আপুনি ভুলতো নিকিনিব। কিয়নো তেনে আম ইনজেকচনৰ দ্বাৰা ৰাসায়নিক দ্ৰব্য প্ৰয়োগ কৰি কৃত্ৰিমভাৱে পকোৱা হোৱাৰ আশংকাই অধিক।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
