এতিয়া ফুটবলৰ জ্বৰত আক্ৰান্ত সমগ্ৰ বিশ্ব। কাৰণ ১১ জুনৰ পৰা আমেৰিকা, মেক্সিকো আৰু কানাডাত অনুষ্ঠিত হ’ব ফুটবল বিশ্বকাপ। সমগ্ৰ বিশ্বৰ লগতে ভাৰততো ফুটবল বিশ্বকাপৰ প্ৰভাৱ বাৰুকৈয়ে পৰিছে। যদিও ফুটবল বিশ্বকাপত ভাৰতে এতিয়ালৈ খেলাৰ বাবে যোগ্যতা অৰ্জন কৰিব পৰা নাই। ভাৰতত ফুটবলতকৈ ক্ৰিকেটৰ জনপ্ৰিয়তা বেছি। ফুটবলৰ তুলনাত ক্ৰিকেটৰ জৰিয়তে ভাৰতে লাভো কৰিছে আকাশলংঘী সফলতা। ঠাইভেদে, পৰিৱেশভেদে খেলৰ জনপ্ৰিয়তা কম-বেছি থাকে। এয়া নতুন কথা নহয়। কিন্তু এবিধ খেলৰ লগত আনবিধক তুলনা কৰি উপলুঙা কৰাটো কিমান সমীচিন?
নীলিম কুমাৰে কোৱাৰ দৰে সঁচাই অকৰ্মণ্য খেল নেকি ক্ৰিকেট?
ফুটবল বিশ্বকাপৰ আলমত অসমৰ জনপ্ৰিয় কবি নীলিম কুমাৰে এটা কবিতা লিখিছে। অৱশ্যে কবিতাটোত ফুটবল বিশ্বকাপৰ কথা উল্লেখ কৰিলেও কবিতাটোৰ ভিতৰৰ বিষয়বস্তু বেলেগ। কিন্তু কবিতাটোৰ এটা ঠাইত তেওঁ ফুটবলক শ্ৰেষ্ঠ দেখুৱাবলৈ গৈ ক্ৰিকেটক অকৰ্মণ্য খেল হিচাপে লিখিছে, যাক লৈ ক্ৰিকেট অনুৰাগীৰ মাজত এতিয়া অসন্তুষ্টি দেখা গৈছে। কবি আৰু কবিতাৰ ভাষা বেলেগ হ’লেও, কবিতাত ভাষাৰ সাংকেতিক ব্যৱহাৰ থাকিলেও কিছুমান নিৰ্দিষ্ট শব্দৰ ব্যৱহাৰে অনুৰাগীৰ মনত কষ্ট দিব পাৰে।
সাম্প্ৰতিক সময়ত অসম তথা ভাৰতৰ বিভিন্ন অঞ্চলত বিভিন্ন ধৰণৰ ঘটনা ঘটিবলৈ লৈছে। যিবোৰক লৈ চিন্তত হৈয়েই হয়টো নীলিম কুমাৰে শেহতীয়াকৈ লিখিছে কবিতাটো। কবিতাটোত নীলিম কুমাৰে বিভিন্ন সমস্যাক উত্থাপন কৰি এই পৰ্যন্ত ভাৰতে বিশ্বকাপ ফুটবলত যোগ্যতা কৰিব নোৱাৰাটোকো আক্ষেপ কৰিছে। একেদৰে তেওঁ দুৰ্নীতি, লুণ্ঠন, সাম্প্ৰদায়িক সংঘৰ্ষৰ কথাও উল্লেখ কৰিছে কবিতাটোত। তেওঁ ‘হিন্দুৱে ভাৰতৰ হাত কাটিছে, মুছলমানে ভৰি কাটিছে’ বুলি এঠাইত উল্লেখ কৰিছে। সেয়ে ভাৰতে ফুটবল খেলিব নোৱাৰে বুলি উল্লেখ কৰিছে। তাৰমানে এগৰাকী বিশেষভাৱে সক্ষম লোকে ফুটবল খেলিব নোৱাৰে! বিশেষভাৱে সক্ষম ব্যক্তি এগৰাকীৰ মনত এই কথাটোৱে দুখ নিদিবনে? ফুটবলক প্ৰশংসা কৰিবলৈ গৈ নীলিম কুমাৰে ক্ৰিকেটক অকৰ্মণ্য খেল বুলি কৈছে। ক্ৰিকেট ভাৰতত বহুলভাৱে জনপ্ৰিয় খেল। কোটি কোটি ভাৰতীয়ৰ হৃদয়ত আছে ক্ৰিকেট। নীলিম কুমাৰৰ ভাষাত ‘পংগু’ এজনে ফুটবল খেলিব নোৱাৰে কিন্তু ক্ৰিকেটে তেনে এগৰাকী বিশেষভাৱে সক্ষম ব্যক্তিৰ খেলুৱৈ সুলভ মনটোত হাঁহি বিৰিঙাই ক্ৰিকেট খেলাৰ সুবিধা কৰি দিছে। বিশেষভাৱে সক্ষম ব্যক্তিৰ ক্ৰিকেট বিশ্বকাপতো সেয়ে ভাৰতে পাৰদৰ্শিতা দেখুৱাই চেম্পিয়ন হৈছে। ক্ৰিকেটে সকলোকে দিছে সেই সুবিধা। তিনিবাৰকৈ ODI বিশ্বকাপ(এবাৰ মহিলা, দুবাৰ পুৰুষ) আৰু ৩ বাৰকৈ T20 বিশ্বকাপ জয় কৰা ভাৰতৰ অজস্ৰ অনুৰাগীৰ বাবে ক্ৰিকেট কেতিয়াও অকৰ্মণ্য খেল হ’ব নোৱাৰে।
এবিধ খেলক শ্ৰেষ্ঠ দেখুবলৈ গৈ আন এবিধ খেলক উপলুঙা কৰাটো কবিতাৰ কেনে ভাষা বুজিবলৈ কঠিন। কোটি কোটি ভাৰতীয়ৰ হৃদয়ত স্থান পোৱা খেলবিধ কেনেকৈ অকৰ্মণ্য হ’ব পাৰে? তাৰমানে অসমৰ জনপ্ৰিয় কবিগৰাকীৰ মতে কোটি কোটি ভাৰতীয় যিয়ে ক্ৰিকেটক প্ৰিয় খেল হিচাপে ভাবে তেওঁলোকৰ চিন্তাধাৰাও অকৰ্মণ্য নেকি? ভাৰতকে ধৰি ক্ৰিকেট খেলা বিশ্বৰ বিভিন্ন প্ৰান্তৰ অনুৰাগীৰ মাজত চৰ্চাত থাকিবলৈ সক্ষম হোৱা অসম সন্তান ৰিয়ান পৰাগো তেনেহলে নীলিম কুমাৰৰ মতে অকৰ্মণ্য নেকি? মহিলা বিশ্বকাপ বিজয়ী অসম কন্যা উমা চেত্ৰীও তেনেহলে নীলিম কুমাৰৰ মতে অকৰ্মণ্য নেকি?
নীলিম কুমাৰৰ কবিতাটো হুবহু তলত দিয়া হ’ল
বিশ্বকাপ ফুটবল
============
নীলিম কুমাৰ
ভাৰতবৰ্ষ, তোমাৰ এখন হাত কাটিলে হিন্দুৱে
এখন ভৰি কাটিলে মুছলমানে
বিশ্বকাপ ফুটবল খেলিবা কেনেকৈ ভাৰতবৰ্ষ ?
হে ভাৰতবৰ্ষ
খেলিব পাৰিলাহেঁতেন তুমি
দুৰ্নীতিৰ বিশ্বকাপ
খেলিব পাৰিলাহেঁতেন তুমি হিংসা লুণ্ঠন ৷
গুজৰাট গুজৰাট
তুমিতো হ’ব পাৰিলাহেঁতেন কেপ্তেইন ৷
খেলিব পাৰিলাহেঁতেন বিশ্বকাপ সাম্প্ৰদায়িকতা ,
সাম্প্ৰদায়িক ভক্ত সকলৰ প্ৰেকটিচ শেষ হৈছেনে সোধা ৷ সোধা
সপোনতো সোণৰ বুট জোতা দেখাৰ
অধিকাৰ নাই তোমাৰ সন্তানৰ
হে ভাৰতবৰ্ষ , ইমান দুৰ্কপলীয়া আমি!
কাঢ়ি নিলে কোনে আমাৰ বুকুৰ হৰ্ষ
কাঢ়ি নিলে কোনে আমাৰ খেলাৰ বস্ত্ৰ?
আমিওতো খেলিছিলোঁ ৰবাব টেঙা
ফিফা এই কথা তুমি জানানে
ঠিক ব্ৰাজিলৰ দৰেই !
ব্ৰাজিল এতিয়া বহু দূৰ পালেগৈ
কিমান দূৰ পালেগৈ সেই ৰবাব টেঙা
টিভিৰ পৰ্দাত মনিব নোৱাৰি …
তথাপি বিশ্বকাপ ফুটবল চাবলৈ যাম
যদিও মোৰ সৰ্বাংগ তেজে তুমৰলি
যদিও মোৰ সৰ্বাংগত হিংসাৰ আঁচোৰ
বিশ্বকাপ ফুটবল চাবলৈ যাম ৷
মেক্সিকো আৰু কানাডা ,
তোমালোকৰ ৰেলৱে প্লেটফৰ্মত
ৰাতি কটাবলৈ
মোৰ কাৰণে দুফুট ঠাই নহ’বনে ?
বিশ্বকাপ ফুটবল চাবলৈ যাম
বিশ্বকাপ ফুটবল চাবলৈ যাম
সমগ্ৰ পৃথিৱী য’ত হাউলি পৰিব ,
নাচি থাকিব য’ত খেলুৱৈ দেশৰ পতাকাবোৰ
তালৈ মই আমাৰ ত্ৰিৰংগাখন
কেনেকৈ লৈ যাম জেপত ?
ভাৰতবৰ্ষ , ইমান দুৰ্কপলীয়া আমি
বিশ্ববেংকৰ ভিক্ষাৰী ,
তোমাৰ হাত এখন কাটিলে হিন্দুৱে
ভৰি এখন কাটিলে মুছলমানে
তথাপি বিশ্বকাপ ফুটবল চাবলৈ যাম
তোমাক মই দূৰৰ পৰাই চিনি পাম
হে কিলিয়ান এমবাপে , সোণৰ বুটৰ অধিকাৰী ৷
চিনি পাম লিয়েনাল মেছি আৰু
ৰোনাল্ডো তোমালোককো …
মোৰ তেজত বিচৰণ কৰা তোমালোক৷
তোমালোকৰ চাল চলনৰ সংজ্ঞা জানো মই ৷
মই যে ভালপাওঁ ফুটবল
মই যে ভালপাওঁ শক্তিশালী ফুটবল ,
ক্ৰিকেটৰ দৰে অকৰ্মণ্য খেলা নহয় !
কোকাকোলা
তোমাৰ লগত মই নাযাওঁ
বিশ্বকাপ চাবলৈ ৷
এডিডাচ
তোমাৰ লগতো নাযাওঁ ৷
ফিফা ,তুমি মোক এটা ফ্ৰী টিকট দিবানে
গেলাৰীৰ এচুকত মই চুপচাপ বহি থাকিম
কোনেও মোক চিনি নাপাব
আাকঁবাক কৰি ল’ম মুখত ,
লাগিলে ভাৰতবাসী বুলি
মই পৰিচয় নিদিম কাকো ৷
ফিফা , তুমি মোক এটা ফ্ৰী টিকট
দিবানে ?
দিবানে কোৱা
নহ’লে মই মনে মনে
চোৰৰ দৰে খেলপথাৰত সোমাম ৷
এজন ফুটবলপ্ৰেমিক এই অপৰাধত
ফিফা তুমি শাস্তি দিব পাৰিবানে ?
যেনেকৈয়ে মই উপস্থিত নহওঁ
মেক্সিকো কানাডা আৰু আমেৰিকা
মোক আদৰিবলৈ সাজু থাকা বা নাথাকা
বিশ্বকাপ ফুটবল চাবলৈ যাম ৷
মনত ৰাখিবা
দৰিদ্ৰ দেশেও ফুটবল ভালপায় ৷
মোৰ দৰে আটাইতকৈ দৰিদ্ৰজনেও !
ভাৰতবৰ্ষ ,
তুমি কিবা ক’বা ?
তোমাৰ যন্ত্ৰণা নাই
তোমাৰ এখন হাত কাটিলে হিন্দুৱে
এখন ভৰি কাটিলে মুছলমানে ,
তুমি কি কোনোদিনেই
বিশ্বকাপ ফুটবল খেলিবলৈ নোৱাৰিবা ভাৰত ?
নোৱাৰিবা ?
নোৱাৰিবা ?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
