আজিৰে পৰা শ্ৰীলংকাত অনুষ্ঠিত হৈছে ত্ৰিদেশীয়া ৫০ অভাৰৰ শৃংখলা। ইণ্ডিয়া A, শ্ৰীলংকা A আৰু আফগানিস্তান Aৰ মাজত অনুষ্ঠিত শৃংখলাটোত টীম ইণ্ডিয়াক নেতৃত্ব দিছে মুম্বাইৰ বাওঁহতীয়া বেটাৰ তিলক বৰ্মাই। ইংলেণ্ড আৰু আয়াৰলেণ্ড ভ্ৰমণৰ পূৰ্বে বৈভৱ সূৰ্যবংশীৰ বাবে এই ছিৰিজটো অনুশীলনৰ দৰে হ’ব। অৱশ্যে ত্ৰিদেশীয় ছিৰিজটোৰ আৰম্ভণি সুখকৰ নহ’ল বিস্ময় বালক বৈভৱ সূৰ্যবংশীৰ। শ্ৰীলংকাৰ ডাম্বুলা আন্তঃৰাষ্ট্ৰীয় ষ্টেডিয়ামত অনুষ্ঠিত আজিৰ মেচখনত প্ৰথমে বেটিং কৰি নিৰ্ধাৰিত ৫০ অভাৰত ৬ উইকেটতৰ বিনিময়ত ইণ্ডিয়া Aই সংগ্ৰহ কৰিছে ২৭৭ ৰান। বৈভৱে ১২ বলত ১৪ ৰান কৰিয়েই পেভিলিয়নমুখী হয়। বৈভৱৰ উপৰিও ইণ্ডিয়া Aৰ আনজন অপেনাৰ প্ৰভচিমৰণ সিঙেও সোনকালেই ক্ৰিজ এৰে। পাঞ্জাব কিংছৰ আন এজন চৰ্চাত থকা বেটাৰ প্ৰিয়াংশ আৰ্য়াই ৩২ ৰানৰ বৰঙণি আগবঢ়ায়। ইপিনে আঘাতৰ বাবে ইণ্ডিয়া A দলটোৰ সহঃ অধিনায়ক ৰিয়ান পৰাগ বাহিৰ হোৱাৰ পিছত দলত স্থান লাভ কৰা CSKৰ কেপ্টেইন ঋতুৰাজ গাইকোৱাডে দীৰ্ঘদিনৰ মূৰত বেটত ৰান পাইছে। ঋতুৰাজে ১১৪টা বলত ৩টা ছিক্সাৰ আৰু ৬টা চাৰিৰে ১০১ ৰান কৰে। অধিনায়ক তিলক বৰ্মাই ৯৭টা বলত সংগ্ৰহ কৰে ৬০ ৰান। শ্ৰীলংকাৰ মহম্মদ ছিৰাজে লাভ কৰে ৪টা উইকেট।
প্ৰত্যুত্তৰত ২৭৮ ৰানৰ লক্ষ্য আগত লৈ ক্ৰিজলৈ অহা শ্ৰীলংকাই দুৰ্দান্ত আৰম্ভণি ঘটায়ো অৱশেষত ২৬৯ ৰানতে থমকি ৰয়। এটা সময়ত শ্ৰীলংকাৰ স্কৰ আছিল ৫ উইকেইটৰ বিনিময়ত ১৯৫ ৰান। কিন্তু কলকাতা নাইট ৰাইডাৰ্ছৰ হৈ খেলা ইণ্ডিয়া Aৰ স্পীনাৰ অনুকুল ৰয়ৰ দুৰ্দান্ত স্পেলৰ সহায়ত এটাসময়ত তাছপাতৰ দৰে খহে শ্ৰীলংকান বেটাৰসকল। অনুকুল ৰয়ে ৪৯ ৰানৰ বিনিময়ত দখল কৰে ৬টাকৈ উইকেট। অনছুল কম্বোজ, অৰ্শ্বাদ খান, আয়ুস বদোনী আৰু শ্ৰুয়ান্স শ্বেডগেই দখল কৰে এটাকৈ উইকেট। ৰোমাঞ্চকৰ মেচখনত শ্ৰীলংকা Aক ৮ ৰানত পৰাস্ত কৰে ইণ্ডিয়া Aই। ১০১ ৰান ইনিংছটোৰ বাবে ঋতুৰাজ গাইকোৱাডক দিয়া হয় প্লেয়াৰ অব দ্য মেচৰ সন্মান।
এই প্ৰতিবেদখন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
