তামুলপুৰ জিলাৰ গোৰেশ্বৰ-খৈৰাবাৰী পথত সংঘটিত হৈছে এক ভয়ংকৰ পথ দুৰ্ঘটনা। প্ৰায় ১২ হাজাৰ লিটাৰ পেট্ৰ’ল কঢ়িয়াই নিয়া এখন তেল পৰিবাহী টেংকাৰ দুৰ্ঘটনাত পতিত হয়। এই ভয়ংকৰ দুৰ্ঘটনাত কথমপি প্ৰাণ ৰক্ষা পৰে টেংকাৰখনৰ চালক চফেদ আলী আৰু হেণ্ডিমেন জাকিৰ আলীৰ।
প্ৰাপ্ত তথ্য অনুসৰি, কিছু সময় পূৰ্বে সংঘটিত হয় এই দুৰ্ঘটনাটো। টেংকাৰখনে গোৰেশ্বৰ হৈ ভেৰগাঁৱলৈ প্ৰায় ১২ হাজাৰ লিটাৰ পেট্ৰ’ল কঢ়িয়াই লৈ গৈ আছিল। সেই সময়তে গোৰেশ্বৰৰ চেউনী অঞ্চলত পথৰ দুৰাৱস্থাৰ বাবে টেংকাৰখন দুৰ্ঘটনাত পতিত হয়।
দুৰ্ঘটনাৰ ফলত টেংকাৰখনৰ পৰা পেট্ৰ’ল নিৰ্গত হ’বলৈ আৰম্ভ কৰে। ইয়াৰ ফলত সমগ্ৰ অঞ্চলটোত পেট্ৰ’লৰ তীব্ৰ গোন্ধ বিয়পি পৰে। পেট্ৰ’ল নিৰ্গত হোৱাৰ ঘটনাই অঞ্চলটোত অগ্নিকাণ্ডৰ আশংকা সৃষ্টি কৰিছে। ঘটনাৰ খবৰ লাভ কৰাৰ পাছতেই গোৰেশ্বৰ আৰক্ষী আৰু অগ্নিনিৰ্বাপক বাহিনীৰ লোক ঘটনাস্থলীত উপস্থিত হয়। পৰিস্থিতি নিয়ন্ত্ৰণ কৰাৰ লগতে নিৰাপত্তা নিশ্চিত কৰিবলৈ প্ৰয়োজনীয় ব্যৱস্থা গ্ৰহণ কৰা হৈছে। দুৰ্ঘটনাগ্ৰস্ত টেংকাৰখনৰ নম্বৰ হৈছে AS-01 HC 2527।
উল্লেখযোগ্য যে গোৰেশ্বৰৰ চেউনী অঞ্চলত পথৰ দুৰাৱস্থাৰ বাবে এই ভয়ংকৰ দুৰ্ঘটনা সংঘটিত হোৱা বুলি অভিযোগ উত্থাপন হৈছে। পথটোৰ বেয়া অৱস্থাই পুনৰ এবাৰ যাতায়াত ব্যৱস্থাৰ সুৰক্ষাক লৈ প্ৰশ্ন উত্থাপন কৰিছে। প্ৰায় ১২ হাজাৰ লিটাৰ পেট্ৰ’লভৰ্তি টেংকাৰ দুৰ্ঘটনাত পতিত হোৱাৰ ঘটনাই অঞ্চলটোত আতংকৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
