চলিত IPL শেষ হোৱাৰ এমাহ সম্পূৰ্ণ নৌহওতেই আহিছে ২০২৭ৰ IPLৰ খবৰ। আগন্তুক বৰ্ষৰ পৰা IPLৰ মেচৰ সংখ্যা বৃদ্ধি কৰা হ’ব বুলি ওলোৱা খবৰ সন্দৰ্ভতো BCCIৰ সচিব দেৱজিৎ শইকীয়াই তথ্য সদৰী কৰিছে। কেইবাটাও ৰাষ্ট্ৰীয় সংবাদ মাধ্যমত আগন্তুক IPLৰ সম্প্ৰসাৰণ ঘটি ৭৪খন মেচৰ পৰা ৯৪খন মেচলৈ বৃদ্ধি হ’ব বুলি খবৰ প্ৰকাশ পাইছিল।
কেতিয়াৰ পৰা কিমান দিনলৈ হ’ব IPL 2027?
BCCIৰ সচিব দেৱজিৎ শইকীয়াই এই সন্দৰ্ভত সদৰী কৰে যে IPLৰ ব্যৱসায়িক তথা প্ৰতিযোগিতামূলক পৰ্বৰ অন্তিম সময়ত বেয়া বতৰৰ প্ৰভাৱ এৰাবলৈ আগন্তুক ছিজনৰ পৰা প্ৰতিযোগিতাখন ১০ মাৰ্চৰ ওচৰে-পাজৰে আৰম্ভ কৰি ১৫ মে’ৰ ভিতৰত সমাপ্ত কৰাৰ সম্ভাৱনা আছে। অৱশ্যে, আন্তঃৰাষ্ট্ৰীয় ক্ৰিকেট সূচীৰ সীমাবদ্ধতাৰ বাবে বৰ্তমানৰ ৭৪খন মেচৰ পৰা IPLৰ সম্প্ৰসাৰণ কৰাৰ কোনো পৰিকল্পনা নাই। শইকীয়াই লগতে কয় যে-‘এইবাৰ IPL ২৯ মাৰ্চত আৰম্ভ হৈছিল আৰু ৩১ মে’ত সমাপ্ত হৈছিল। কিন্তু ১৫ মে’ৰ পিছৰ সময়ছোৱাত ভাৰতৰ বিশেষকৈ কিছুমান অঞ্চলত বৰষুণ হোৱাৰ আশংকা থাকে, যাৰ বাবে দলসমূহৰ পইণ্ট তালিকাত ইয়াৰ প্ৰভাৱ পৰে। আনহাতে, অত্যধিক গৰমৰ বাবেও খেলুৱৈ, দৰ্শক আৰু সমৰ্থকসকলে বিভিন্ন অসুবিধাৰ সন্মুখীন হয়। সেয়ে BCCI আৰু IPL গভাৰ্নিং কাউন্সিলৰ মাজত প্ৰতিযোগিতাখন মাৰ্চৰ মধ্যভাগৰ পৰা আৰম্ভ কৰিব পাৰি নেকি এই সন্দৰ্ভত আলোচনা চলি আছে। যাৰ ফলত IPLৰ প্লে অফ আৰু ফাইনেলৰ সময়ত বেয়া বতৰৰ প্ৰভাৱৰ পৰা দলসমূহে ৰক্ষা পৰে। মেচৰ সংখ্যা বৃদ্ধিৰ প্ৰসংগত শইকীয়াই স্পষ্টভাৱে কয় যে, ‘বৰ্তমান ৭৪খন মেচৰ পৰা ৯৪খনলৈ বৃদ্ধি কৰাৰ কোনো পৰিকল্পনা নাই। আন্তঃৰাষ্ট্ৰীয় ক্ৰিকেটৰ ব্যস্ত সূচী, বিভিন্ন দেশৰ খেলুৱৈসকলৰ উপলব্ধতা আৰু ICCৰ অন্যান্য প্ৰতিযোগিতা বিবেচনা কৰিলে IPLৰ সময়সীমা দুমাহৰ অধিক বৃদ্ধি কৰাটো সম্ভৱ নহয়।’
ICCৰ সদস্য দেশৰ খেলুৱৈৰ প্ৰতিও গুৰুত্ব দিব লাগিব
শইকীয়াই উল্লেখ কৰে যে-International Cricket Council-ৰ সদস্য দেশসমূহৰ স্বাৰ্থকো গুৰুত্ব দিব লাগিব। Australia, England, New Zealand, South Africa আৰু West Indiesৰ বহু খেলুৱৈয়ে IPLত অংশগ্ৰহণ কৰে। সেয়ে তেওঁলোকৰ দ্বিপাক্ষিক ছিৰিজ আৰু অন্যান্য আন্তঃৰাষ্ট্ৰীয় প্ৰতিযোগিতাসমূহত ব্যাঘাত নঘটোৱাটোও সমানে গুৰুত্বপূৰ্ণ। তেওঁ লগতে কয় যে-বৰ্তমানৰ পৰিস্থিতিত IPLক দুমাহৰ সময়সীমাৰ ভিতৰতে সীমাবদ্ধ ৰাখি ৭৪খন মেচ অনুষ্ঠিত কৰাটোৱেই বাস্তৱসন্মত। সেয়ে অদূৰ ভবিষ্যতে মেচৰ সংখ্যা বৃদ্ধি কৰাৰ কোনো সম্ভাৱনা দেখা নাযায়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
