চীনৰ পিপলছ লিবাৰেচন আৰ্মি এয়াৰ ফ’ৰ্চে ৰাছিয়াক অতিক্ৰম কৰি বিশ্বৰ দ্বিতীয় বৃহত্তম আৰু শক্তিশালী বায়ুসেনা হিচাপে পৰিগণিত হৈছে। সামৰিক শক্তিৰ বৈশ্বিক ভাৰসাম্যত হোৱা অন্যতম গুৰুত্বপূৰ্ণ পৰিৱৰ্তন হিচাপে ইয়াক ধৰা হৈছে। সম্প্ৰতি আমেৰিকাৰ পিছতে চীনৰ হাতত আছে সবাটোকৈ আধুনিক যুদ্ধবিমান। অ’পেন-ছ’ৰ্চ মিলিটাৰী এভিয়েশ্যন অনুসৰি চীনৰ হাতত ১১০ৰ পৰা ১৩০টা ফাইটাৰ ফৰ্মেচন আছে, য’ত প্ৰায় ২,০০০ৰ পৰা ২,৫০০খন যুদ্ধ বিমান অন্তৰ্ভুক্ত। কেৱল সংখ্যাৰ ফালৰ পৰাই নহয়, চীনে নিজৰ যুদ্ধবিমানসমূহৰ গুণগত মান আৰু প্ৰযুক্তিগত সক্ষমতাও অবিৰতভাৱে উন্নত কৰি আছে, যাৰ ফলত দেশখন ধীৰে ধীৰে আমেৰিকাৰ সমকক্ষ শক্তি হিচাপে নিজকে প্ৰতিষ্ঠা লাভ কৰিবলৈ সক্ষম হৈছে।
চীনৰ বায়ুসেনাই পিছ পেলালে ৰাছিয়াক
বিশ্বৰ দ্বিতীয় বৃহত্তম বায়ুসেনা হিচাপে চীনৰ উত্থান কোনো আকস্মিক ঘটনা নহয়; ই হৈছে প্ৰায় এক দশকজুৰি চলি অহা এক সুপৰিকল্পিত কৌশলৰ ফল। এই সময়ছোৱাত চীনে নিজৰ ঘৰুৱা এৰোস্পেচ উদ্যোগক ব্যাপকভাৱে আধুনিকীকৰণ কৰিছে। উৎপাদন ক্ষমতা বৃদ্ধিৰ লগতে ইণ্টিগ্ৰেটেড চেন্সৰ যুদ্ধ ব্যৱস্থা, ষ্টেল্থ বিমান আৰু ইলেক্ট্ৰনিক যুদ্ধ প্ৰযুক্তিৰ বিকাশত বিশেষ গুৰুত্ব দি আহিছে চীনে। বিশেষকৈ ইণ্ডো-পেচিফিক অঞ্চলত সম্ভাৱ্য শক্তিশালী প্ৰতিদ্বন্দ্বীৰ সৈতে সংঘাতৰ সম্ভাৱনাক মনত ৰাখিয়েই এই উন্নয়নমূলক পদক্ষেপসমূহ গ্ৰহণ কৰা হৈছে। বৰ্তমান এই অঞ্চলত সামৰিক শক্তিৰ ক্ষেত্ৰত চীনৰ সমকক্ষ কোনো দেশ নাই। বিশ্ব পৰিসৰত চীনৰ মুখামুখি হ’ব পৰা প্ৰধান মহাশক্তি হৈছে আমেৰিকা আৰু ৰাছিয়া।
চীন বনাম ৰাছিয়াৰ বায়ুসেনা
বিভিন্ন প্ৰতিৰক্ষা আৰু বায়ুসেনাৰ বিমান চলাচল বিষয়ক তথ্য অনুসৰি, চীনৰ PLAAFৰ হাতত মুঠ প্ৰায় ৩,৭৩৩ খন বিমান আছে। ইয়াৰ ভিতৰত ২,১৮৪তকৈও অধিক যুদ্ধ সক্ষম প্লেটফৰ্ম আৰু প্ৰায় ২,০০০খন যুদ্ধবিমান অন্তৰ্ভুক্ত। এই বিমানসমূহ তাইৱান, দক্ষিণ চীন সাগৰ, জাপান আৰু পশ্চিম প্ৰশান্ত মহাসাগৰীয় অঞ্চলৰ বিভিন্ন অপাৰেচনেল থিয়েটাৰত নিয়োজিত আছে। ইয়াৰ বিপৰীতে, ৰাছিয়াৰ এয়াৰ’স্পেচ ফ’ৰ্চৰ হাতত অনুমানিক ১,৩০০ৰ পৰা ১,৫০০খন যুদ্ধবিমান আছে। ইউক্ৰেইন যুদ্ধ, নাটোৰ সৈতে চলি থকা উত্তেজনা, দীৰ্ঘদিনীয়া ক্ষতি, ঔদ্যোগিক বাধা আৰু বিভিন্ন নিষেধাজ্ঞাৰ ফলত ৰাছিয়াৰ সামৰিক বিমান শক্তি কিছু পৰিমাণে পূৰ্বৰ তুলনাত হ্ৰাস পাইছে।
এই ৰেংকিঙত ভাৰতীয় বায়ুসেনাৰ স্থান কিমান?
WDMMAৰ গ্ল’বেল এয়াৰ পাৱাৰ ৰেংকিং অনুসৰি, ভাৰতীয় বায়ুসেনা (IAF) বিশ্বৰ চতুৰ্থ বৃহত্তম বায়ুসেনা। এই ৰেংকিং কেৱল বিমানৰ সংখ্যাৰ ওপৰত ভিত্তি কৰি নিৰ্ধাৰণ কৰা নহয়। ইয়াত ‘True Value Rating (TvR)’ নামৰ এক বিশেষ মূল্যায়ন পদ্ধতি ব্যৱহাৰ কৰা হয়, য’ত বিমানৰ আধুনিকতা, লজিষ্টিক সুবিধা, পাইলটসকলৰ প্ৰশিক্ষণ আৰু স্থানীয় উৎপাদন ক্ষমতা (যেনে তেজস যুদ্ধবিমানৰ নিৰ্মাণ) আদি বিষয়সমূহ বিবেচনা কৰা হয়। WDMMA আৰু Flight Globalৰ তথ্য অনুসৰি ভাৰতীয় বায়ুসেনাৰ হাতত যুদ্ধবিমান, পৰিবহণ বিমান, হেলিকপ্টাৰ আৰু প্ৰশিক্ষণ বিমান মিলাই মুঠ প্ৰায় ১,৭০০ৰ পৰা ১,৯০০খন সামৰিক বিমান আছে। ইয়াৰ ভিতৰত ৫০০খনতকৈ অধিক হৈছে যুদ্ধবিমান।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
