জাপানৰ প্ৰধানমন্ত্ৰী ছানায়ে টাকাইশ্বি শীঘ্ৰেই ১ জুলাইত ভাৰত ভ্ৰমণলৈ আহিব। জাপানৰ প্ৰথমগৰাকী মহিলা প্ৰধানমন্ত্ৰীৰূপে ইতিহাসৰ পাতত নিজৰ নাম লিখিবলৈ সক্ষম হোৱা ছানায়ে টাকাইশ্বিয়ে পোনে পোনে গুৱাহাটীত পদাৰ্পণ কৰিব। চীনৰ কটাক্ষ সমালোচক দেশসমূহৰ অন্যতম হিচাপে পৰিচিত জাপানৰ প্ৰধানমন্ত্ৰী ছানায়ে টাকাইশ্বিক চীনে নিজৰ অন্যতম ডাঙৰ কূটনৈতিক প্ৰতিদ্বন্দ্বী হিচাপে গণ্য কৰে। জাপানৰ প্ৰধানমন্ত্ৰীগৰাকীৰ এই ভ্ৰমণত তেওঁৰ সৈতে প্ৰায় ৫০ জন শীৰ্ষ জাপানীজ ব্যৱসায়ী তথা অন্যান্য চৰকাৰী বিষয়া অসমলৈ আহিব। খবৰ অনুসৰি, ভাৰত-জাপান শীৰ্ষ সন্মিলনত অংশগ্ৰহণ কৰিবলৈ অহা জাপানৰ প্ৰধানমন্ত্ৰীগৰাকীক ভাৰতৰ প্ৰধানমন্ত্ৰী নৰেন্দ্ৰ মোদীসহ অসমৰ মুখ্যমন্ত্ৰী হিমন্ত বিশ্ব শৰ্মাই অসমত আদৰণি জনাব। গুৱাহাটীত অনুষ্ঠিত হ’ব লগীয়া এই বৈঠকত দুয়োখন দেশৰ মাজত ঔদ্যোগিক সহযোগিতা বৃদ্ধিৰ সম্ভাৱনা, বিনিয়োগ আৰু অৰ্থনৈতিক অংশীদাৰিত্বৰ বিষয়ে আলোচনা হোৱাৰ সম্ভাৱনা আছে। লগতে ভাৰত-জাপান প্ৰতিৰক্ষা সম্পৰ্ক অধিক শক্তিশালী কৰাৰ সন্দৰ্ভতো বৈঠকত গুৰুত্বপূৰ্ণ আলোচনা হ’ব পাৰে।
গুৱাহাটীত অনুষ্ঠিত হ’ব ভাৰত-জাপান শীৰ্ষ সন্মিলন
গুৱাহাটীত অনুষ্ঠিত হ’বলগীয়া এই শীৰ্ষ বৈঠকত অংশগ্ৰহণ কৰিবলৈ জাপানৰ প্ৰধানমন্ত্ৰীগৰাকীয়ে ভাৰতলৈ আহিব। তেওঁৰ সৈতে অহা ব্যৱসায়িক প্ৰতিনিধি দলত জাপানৰ আগশাৰীৰ বহু কোম্পানীৰ শীৰ্ষ বিষয়াসকল উপস্থিত থাকিব। ইয়াৰ ভিতৰত Suzuki Motor Corporationৰ তোশ্বিহিৰো ছুজুকি, ITOCHU Corporation আৰু টয়োটাৰ উচ্চপদস্থ বিষয়াও জাপানৰ প্ৰধানমন্ত্ৰীগৰাকীৰ এই ভ্ৰমণৰ সংগী হ’ব। এই বৈঠকৰ পৰা গুৱাহাটী তথা অসমে বিশেষভাৱে লাভান্বিত হোৱাৰ পূৰ্ণ সম্ভাৱনা আছে। অসম তথা উত্তৰ পূবত জাপানৰ এই আগশাৰীৰ কোম্পানীসমূহে বিভিন্ন উদ্যোগ স্থাপনৰ জৰিয়তে দুয়োখন দেশৰ ব্যৱসায়িক সম্পৰ্ক সুদৃঢ় কৰাৰ লগতে অসমৰ নিবনুৱা যুৱক-যুৱতীসকলৰ বাবেও নিয়োগ সম্পৰ্কীয় বিভিন্ন সুবিধাৰ দুৱাৰ অনাগত দিনত মুকলি হ’ব বুলি আশা কৰিব পাৰি। উল্লেখ্য যে, প্ৰধানমন্ত্ৰী হিচাপে এইটোৱেই হ’ব টাকাইশ্বিৰ প্ৰথম ভাৰত ভ্ৰমণ। ইয়াৰ আগতে দক্ষিণ আফ্ৰিকাত অনুষ্ঠিত G20 শীৰ্ষ সন্মিলন আৰু ফ্ৰান্সত অনুষ্ঠিত G7 শীৰ্ষ সন্মিলনৰ সময়তো মোদী আৰু টাকাইশ্বিৰ সাক্ষাৎ হৈছিল।
ভাৰত-জাপান যৌথ সামৰিক কাৰ্যকলাপ বৃদ্ধিৰ লক্ষ্য
জাপানৰ সামৰিক শক্তি বৃদ্ধিত গুৰুত্ব দিয়া ছানায়ে টাকাইশ্বিক ৰাষ্ট্ৰীয় সুৰক্ষা আৰু বৈদেশিক নীতিৰ ক্ষেত্ৰত কঠোৰ মনোভাৱৰ নেত্ৰী হিচাপে জনা যায়। তেওঁ জাপানৰ সামৰিক সক্ষমতা বৃদ্ধি কৰাক অগ্ৰাধিকাৰ দিছে। টাকাইশ্বি চৰকাৰে চীনক জাপানৰ বাবে অন্যতম ডাঙৰ সুৰক্ষা প্ৰত্যাহ্বান বুলি বিবেচনা কৰে। সেইবাবে ইণ্ডো-পেচিফিক অঞ্চলত স্থিতিশীলতা বজাই ৰাখিবলৈ ভাৰত-জাপানৰ শক্তিশালী অংশীদাৰিত্ব অতি প্ৰয়োজনীয় বুলি তেওঁ বিশ্বাস কৰে। উল্লেখযোগ্য যে, বিগত দুটা দশকত ভাৰত আৰু জাপানৰ সম্পৰ্ক যথেষ্ট মজবুত হৈছে। দুয়োখন দেশে যৌথ সামৰিক কাৰ্যকলাপ, প্ৰযুক্তিগত সহযোগিতা আৰু বিভিন্ন তথ্য বিনিময়ৰ ক্ষেত্ৰতো একেলগে কাম কৰি আহিছে।
অধিক শক্তিশালী হ’ব পাৰে প্ৰতিৰক্ষা সহযোগিতা
জাপানৰ প্ৰধানমন্ত্ৰী ছানায়ে টাকাইশ্বিৰ এই ভ্ৰমণৰ সময়ত ভাৰত-জাপান প্ৰতিৰক্ষা সহযোগিতাক নতুন শিখৰলৈ লৈ নিয়াৰ চেষ্টা কৰিব দুয়োখন দেশে। সংবাদমাধ্যমৰ খবৰ অনুসৰি, জাপানে ভাৰতক উন্নত ‘মোগামি ক্লাছ’ যুদ্ধজাহাজৰ প্ৰস্তাৱ আগবঢ়াব পাৰে। ‘মেক ইন ইণ্ডিয়া’ আঁচনিৰ অধীনত প্ৰযুক্তি হস্তান্তৰৰ জৰিয়তে এই যুদ্ধজাহাজ ভাৰততেই নিৰ্মাণ কৰাৰ বিষয়েও আলোচনা হ’ব পাৰে। ইয়াৰ উপৰিও, এই যুদ্ধজাহাজত ভাৰতৰ ‘ব্ৰহ্মছ’ ক্ষেপণাস্ত্ৰ সংযোজনৰ বাবে প্ৰয়োজনীয় কাৰিকৰী পৰিৱৰ্তন কৰিবলৈও জাপান আগ্ৰহী বুলি জানিব পৰা গৈছে। যদি এই চুক্তি সম্পন্ন হয়, তেন্তে ভাৰতীয় নৌসেনাৰ সামৰিক ক্ষমতা যথেষ্ট বৃদ্ধি পাব বুলি বিশেষজ্ঞসকলে মত প্ৰকাশ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
