বিপদত পৰিছে টীম ইণ্ডিয়াৰ T20 সংস্কৰণৰ নৱনিযুক্ত ভাৰপ্ৰাপ্ত অধিনায়ক তিলক বৰ্মা আৰু নিৰ্ভৰযোগ্য পেচাৰ মহম্মদ ছিৰাজ। হায়দৰাবাদৰ এখন প্ৰীমিয়াৰ লীগ সন্দৰ্ভত দুই হায়দৰাবাদী ক্ৰিকেটাৰ আইনী মেৰপেচত সোমাই পৰাৰ আশংকা ঘনীভূত হৈছে। দৰাচলতে তেলেংগানা ক্ৰিকেট এছ’চিয়েশ্যনে টীম ইণ্ডিয়াৰ ক্ৰিকেটাৰ তিলক বৰ্মা, মহম্মদ ছিৰাজসহ কেইবাজনৰো বিৰুদ্ধে এখন আইনী জাননী জাৰি কৰিছে। তিলক বৰ্মা, ছিৰাজৰ উপৰিও পূৰ্ব ভাৰতীয় ক্ৰিকেটাৰ অম্বাতি ৰায়ুডু, অভিনেতা বিজয় দেৱৰকোণ্ডা আৰু ভেংকটেশ দগ্গুবাটিকো TCA-এ প্ৰেৰণ কৰিছে জাননী। TCAৰ অভিযোগ অনুসৰি, হায়দৰাবাদ ক্ৰিকেট এছ’চিয়েশ্যন দ্বাৰা আয়োজন কৰা প্ৰস্তাৱিত TG20 লীগখন ভাৰতীয় ক্ৰিকেট নিয়ন্ত্ৰণ ব’ৰ্ডৰ প্ৰয়োজনীয় অনুমোদন নোহোৱাকৈ অনুষ্ঠিত কৰা হৈছে। যাৰ পৰিপ্ৰেক্ষিতত HCA-এ আয়োজন কৰা লীগখনক অবৈধ আৰু অনুমোদনবিহীন বুলি অভিহিত কৰিছে।
হায়দৰাবাদ ক্ৰিকেট এছ’চিয়েশ্যনৰ বিৰুদ্ধে গুৰুতৰ অভিযোগ TCAৰ
TCA-ই দাবী কৰা অনুসৰি HCA-এ পূৰ্বতে বহুবাৰ এই লীগখনৰ নাম সলনি কৰিছে। HCA-ই লীগখনৰ পূৰ্বতে ৰখা নামসমূহ আছিল Telangana Premier League, TTL, TG20 Premier League আৰু বৰ্তমান নতুনকৈ লীগখনৰ নাম দিছে TG20। কিন্তু নিয়ম অনুসৰি BCCIৰ অধীনত এখন ফ্ৰেঞ্চাইজী ভিত্তিক প্ৰীমিয়াৰ লীগ চলাবলৈ যি বিধিগত অনুমোদন আৰু গঠনগত প্ৰক্ৰিয়া থাকিব লাগে, সেই নিয়ম হায়দৰাবাদ ক্ৰিকেট এছ’চিয়েশ্যনে পূৰণ কৰা নাই। TCAৰ সাধাৰণ সম্পাদক গুৰুৱা ৰেড্ডীৰ অভিযোগ মতে- BCCIৰ নিয়ম অনুসৰি কোনো ৰাজ্যিক লীগ পৰিচালনা কৰিবলৈ এডমিনিষ্ট্ৰেটিভ পৰিষদৰ নিৰ্বাচন সাধাৰণ সভাৰ দ্বাৰা হ’ব লাগে, লগতে সভাপতিৰ নিৰ্বাচনো নিয়ম অনুসৰি হ’ব লাগে, কিন্তু হায়দৰাবাদ ক্ৰিকেট এছ’চিয়েশ্যনে এই নিয়মৰো উলংঘা কৰিছে। TCA-এ এইটোও দাবী কৰিছে যে HCA-এ ক্ৰীড়া বিকাশৰ বাবে দিয়া আগৰ নিৰ্দেশনাও পালন কৰা নাই। তেওঁলোকে লগতে অভিযোগ কৰিছে যে এই লীগৰ সৈতে জড়িত হৈ তাৰকাসকলক ব্যৱহাৰ কৰি জনসাধাৰণক বিভ্ৰান্ত কৰা হৈছে। জাননীত উল্লেখ কৰা অনুসৰি, HCA-এ BCCIৰ অনুমতি অবিহনে বিভিন্ন কৰ্প’ৰেট প্ৰতিষ্ঠানৰ সৈতে ব্যৱসায়িক চুক্তি কৰিছে আৰু BCCIৰ অনুমোদন নোলোৱাকৈ লীগখন আয়োজনৰ চেষ্টা চলাইছে। TCA-এ লীগখনৰ বৈধতা আৰু তাৰকাসকলৰ সমৰ্থনে জনসাধাৰণৰ ওপৰত পেলাব পৰা প্ৰভাৱ সম্পৰ্কে উদ্বেগ প্ৰকাশ কৰিছে। TCA-এ স্পষ্টকৈ কৈছে যে যদি সংশ্লিষ্ট তাৰকা খেলুৱৈ আৰু অন্যান্য জড়িত ব্যক্তি এই লীগৰ সৈতে সংযুক্ত হৈ থাকে, তেন্তে তেওঁলোকে আদালতৰ দ্বাৰস্থ হ’ব আৰু আইনী ব্যৱস্থা গ্ৰহণ কৰিব। এই মুহূৰ্তলৈকে মহম্মদ ছিৰাজ, অম্বাতি ৰায়ডু, তিলক বর্মা বা বিজয় দেৱৰকোণ্ডাই এই অভিযোগ বা জাননী সন্দৰ্ভত কোনো ৰাজহুৱা মন্তব্য দিয়া নাই।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
