অহা ২২ জুনৰ পৰা আৰম্ভ হ’ব পৱিত্ৰ অম্বুবাচী মেলা। ইতিমধ্যেই নীলাচলৰ বুকুলৈ ভক্তিপ্ৰাণ ৰাইজৰ আগমন আৰম্ভ হৈছে। মন্দিৰ কৰ্তৃপক্ষৰ তথ্য অনুসৰি, ২২ জুন নিশা ৯ বাজি ৮ মিনিট ৪২ ছেকেণ্ডত পবিত্ৰ প্ৰবৃত্তি (Prabritti) ৰীতি সম্পন্ন হ’ব, যাৰ জৰিয়তে বাৰ্ষিক অম্বুবাচী মহাযোগৰ শুভাৰম্ভ হ’ব। এই ৰীতি আৰম্ভ হোৱাৰ পিছত অম্বুবাচী পালনকালত মন্দিৰৰ দুৱাৰ ভক্তসকলৰ বাবে বন্ধ থাকিব। ২৬ জুন সূৰ্যোদয়ৰ সময়ত ‘নিবৃত্তি’ (Nibrtti) ৰীতি অনুষ্ঠিত হ’ব। ইয়াৰ পিছতেই মন্দিৰৰ দুৱাৰ পুনৰ ভক্তসকলৰ বাবে মুকলি কৰা হ’ব।
এইবাৰ মা কামাখ্যাৰ আশীৰ্বাদ লাভৰ উদ্দেশ্যে এইবাৰো দেশ-বিদেশৰ প্ৰায় ৮ লাখৰো অধিক ভক্ত অসমলৈ আহিব বুলি আশা কৰা হৈছে। ভক্তসকলৰ সুবিধা, সুৰক্ষা আৰু সেৱাৰ বাবে অসম চৰকাৰ সম্পূৰ্ণৰূপে সাজু হৈ উঠিছে।
অম্বুবাচী হিন্দুধৰ্মৰ এক বছেৰেকীয়া উৎসৱ। জনবিশ্বাস মতে আহাৰ মাহত মৃগ শিৰা নক্ষত্ৰৰ তিনি পদ শেষ হ’লে চতুৰ্থ পাদৰপৰা আৰম্ভ কৰি আদ্যা নক্ষত্ৰৰ প্ৰথম পাদৰ ভিতৰত পৃথিৱী বা মা ধৰিত্ৰী ঋতুমতী হয়। এই সময়ত সেয়ে হিন্দুসকলে অম্বুবাচী পালন কৰা হয়। বছৰত সেই তিনিদিন কামাখ্যা মন্দিৰত কোনো পূজা-অৰ্চনা নকৰে। অম্বুবাচী মেলাৰ সৈতে জড়িত এই বিশেষ নিয়মসমূহ জানক।
অম্বুবাচীৰ প্ৰথম তিনিদিন চুৱা, চতুৰ্থদিনা শুদ্ধি বুলি কোৱা হয় ৷ অম্বুবাচী সমগ্ৰ উত্তৰ-পূব ভাৰততে পালন কৰা হয়৷ অম্বুবাচীৰ সময়ছোৱাত হাল বোৱা, কোনো ধৰণৰ মাংগলিক কাৰ্য সম্পন্ন কৰা নহয় ৷ এই সময়ছোৱাত মঠ-মন্দিৰৰ দুৱাৰসমূহ বন্ধ থাকে ৷ ঘৰুৱা নীতি নিয়মৰ ক্ষেত্ৰত, মাটিত কোনোধৰণৰ আচাৰ বা টেঙাজাতীয় সামগ্ৰী, লগতে লোহাৰ সামগ্ৰী ৰখা নহয় ৷
অম্বুবাচীৰ প্ৰবৃত্তিৰ লগে লগে কামাখ্যা ধামৰ দুৱাৰ বন্ধ ৰখা হয়।ফলস্বৰূপে, সেইকেইদিন দেৱী দৰ্শন নিষিদ্ধ ৷ চতুৰ্থ দিনত মন্দিৰ খোলাৰ লগে লগে দেৱীৰ স্নান, পূজা, প্ৰভৃতি সমাপন হোৱাৰ পৰাহে দৰ্শকে দেৱীক দৰ্শন কৰিব পাৰে ৷ পূব ভাৰতৰ দৰে অন্যান্য প্ৰান্তৰ দৰে কামাখ্যা ধামৰো ব্ৰাহ্মণ বিধৱাসকলে অম্বুবাচী প্ৰবৃত্তিৰ পৰা নিবৃত্তিৰ পিছতো দেৱীৰ ভোগ শেষ নোহোৱা পৰলৈকে ফলাহাৰ গ্ৰহণ কৰি থাকে ৷ চুৱাৰ কেইদিন সৰ্প ভয় নিবাৰণৰ বাবে দুগ্ধপান কৰে ৷ ইঘৰে-সিঘৰলৈ ফল-মূল আগবঢ়ায়, প্ৰবৃত্তিৰ আগতে কলহত পানী জমা কৰি কলপাতৰ ওপৰত তুলি থয়৷ ভাৰতৰ ভিন্ন প্ৰান্তৰ পৰা অহা (আজিকালি বিদেশৰ পৰাও আহে)লাখ লাখ ভক্তই তিনিওদিন কামাখ্যা মন্দিৰৰ চৌপাশে থাকি নাম-কীৰ্তন কৰে৷ মন্দিৰৰ বাহিৰতে ধূপ-দীপ জ্বলাই দেৱীক প্ৰণাম জনায় ৷ অম্বুবাচীৰ নিবৃত্তিৰ দিনা পাণ্ডাসকলে ভক্তসকললৈ আগবঢ়ায় ৰক্তবস্ত্ৰ ৷ দেৱীপীঠৰ পৰা অনা এই ৰক্তবস্ত্ৰ শৰীৰত ধাৰণ কৰিলে অভীষ্ট সিদ্ধি হোৱাৰ সম্ভাৱনা প্ৰৱল ৷ সেইবাবে পুৰুষে সেই ৰক্তবস্ত্ৰ সোঁহাতত বা ডিঙিত আৰু মহিলাসকলে বাঁওহাত বা ডিঙিত ধাৰণ কৰে ৷ এই কাপোৰ লগত ৰাখি আন ঠাইত জপ কৰিলেও মনৰ কামনা পূৰণ হোৱাৰ কথা কুব্জিকা তন্ত্ৰৰ সপ্তম পটলত বৰ্ণিত হৈছে ৷ এই ৰক্তবস্ত্ৰ ধাৰণ কৰি শ্মশান অথবা মৃতকৰ ঘৰলৈ যোৱাটো নিষিদ্ধ ৷ কামাখ্যা ধামৰ অম্বুবাচী মেলাই আন্তৰ্জাতিক আৰু জাতীয় সম্প্ৰীতি ৰক্ষা কৰাত ভালেখিনি অৰিহণা যোগাইছে ।
অস্বীকাৰ: এই লেখাত উল্লেখ কৰা প্ৰতিকাৰ/লাভ/পৰামৰ্শ আৰু বক্তব্যসমূহ কেৱল সাধাৰণ তথ্যৰ বাবেহে। এই বৈশিষ্ট্য প্ৰবন্ধৰ বিষয়বস্তু দৈনিক জাগৰণে সমৰ্থন নকৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
