মধ্যপ্ৰাচ্যত সংঘটিত ইৰান-আমেৰিকাৰ যুদ্ধ সামৰিক পৰ্যায়ত অৱসান ঘটিলেও ইয়াৰ অৰ্থনৈতিক, সামাজিক আৰু মানৱীয় প্ৰভাৱ এতিয়াও সম্পূৰ্ণৰূপে শেষ হোৱা নাই। এই সন্দৰ্ভত ৰাষ্ট্ৰসংঘৰ UNDP-এ প্ৰকাশ কৰা এক প্ৰতিবেদনত বিশ্ব অৰ্থনীতিৰ দুৰ্বল গতি আৰু বৃদ্ধি পোৱা অনিশ্চয়তাৰ বাবে ভৱিষ্যতে কোটি কোটি লোক দাৰিদ্ৰ্যৰ কবলত পৰিব পাৰে বুলি গভীৰ উদ্বেগ প্ৰকাশ কৰিছে। UNDPৰ মতে, যদি বিশ্ব অৰ্থনীতিৰ মন্থৰ গতি অব্যাহত থাকে, তেন্তে উচ্চ-মধ্যম আয়ৰ মান অনুসৰি বিশ্বজুৰি অতিৰিক্ত ১.৭ কোটি লোক দাৰিদ্ৰ সীমাৰ তললৈ নামি যাব পাৰে। পৰিস্থিতি অধিক জটিল হৈ পৰিলে এই সংখ্যা ৪.৫ কোটিলৈ বৃদ্ধি পাব পাৰে। ইয়াৰ পূৰ্বে এপ্ৰিলত বিশ্ব বেংকে প্ৰকাশ কৰা এক প্ৰতিবেদনতো সতৰ্কবাণী দিয়া হৈছিল যে ইৰান-আমেৰিকাৰ সংঘাতৰ ফলত পশ্চিম এছিয়াত বৃদ্ধি পোৱা ভূ-ৰাজনৈতিক উত্তেজনাই বিশ্ব শক্তিৰ বজাৰ, সামগ্ৰীৰ মূল্য আৰু যোগান ব্যৱস্থাৰ ওপৰত সুদূৰপ্ৰসাৰী প্ৰভাৱ পেলাব পাৰে। যুদ্ধ শেষ হোৱাৰ পাছতো ইয়াৰ অৰ্থনৈতিক সংকটৰ প্ৰভাৱ বহুদিনলৈ থাকিব পাৰে বুলি বিশেষজ্ঞসকলে মত প্ৰকাশ কৰিছে।
উন্নয়নশীল দেশে বহন কৰিবলগীয়া হৈছে বৃহৎ আৰ্থিক বোজা
সংকটৰ সময়ত বহু উন্নয়নশীল দেশে ইন্ধনৰ মূল্যবৃদ্ধিৰ পৰা জনসাধাৰণ আৰু ব্যৱসায়িক প্ৰতিষ্ঠানসমূহক সুৰক্ষা দিবলৈ ৰাজ সাহায্য, মূল্য নিয়ন্ত্ৰণ, কৰ হ্ৰাস আৰু চাহিদা নিয়ন্ত্ৰণৰ দৰে বিভিন্ন ব্যৱস্থা গ্ৰহণ কৰিছিল। যদিও এই পদক্ষেপসমূহে কিছু সময়ৰ বাবে জনসাধাৰণক সকাহ দিয়ে, তথাপি ইয়াৰ বাবে চৰকাৰসমূহে বৃহৎ আৰ্থিক বোজা বহন কৰিবলগীয়া হৈছে। বিশেষকৈ আফ্ৰিকা মহাদেশত সাৰৰ যোগান ব্যাহত হোৱাৰ ফলত খাদ্য সুৰক্ষাৰ সংকট অধিক তীব্ৰ হোৱাৰ আশংকা কৰা হৈছে। আনহাতে, পূব এছিয়াৰ বহু দেশত শক্তি ৰাজ সাহায্যৰ জৰিয়তে মুদ্ৰাস্ফীতি কিছু নিয়ন্ত্ৰণত থাকিলেও চৰকাৰসমূহৰ ওপৰত আৰ্থিক চাপ উল্লেখযোগ্যভাৱে বৃদ্ধি পাইছে। UNDP-ৰ প্ৰতিবেদনত উল্লেখ কৰা অনুসৰি, ২০২৬ চনৰ শেষলৈ বিশেষকৈ জীৱাশ্ম ইন্ধন যেনে পেট্ৰ’ল, ডিজেল, প্ৰাকৃতিক গেছৰ ওপৰত বিশ্বজুৰি প্ৰদান কৰা ৰাজসাহায্যৰ পৰিমাণ এক ট্ৰিলিয়ন মাৰ্কিন ডলাৰতকৈ অধিক হ’ব পাৰে। যদি খাৰুৱা তেলৰ মূল্য প্ৰতি বেৰেল ১১০ মাৰ্কিন ডলাৰলৈ বৃদ্ধি পায়, তেন্তে এই ৰাজ সাহায্যৰ পৰিমাণ ১.৪৩ ট্ৰিলিয়ন ডলাৰলৈকে বৃদ্ধি পাব পাৰে। এনে পৰিস্থিতিয়ে বহু দেশৰ ৰাজহুৱা বিত্তীয় ব্যৱস্থাক অধিক সংকটৰ মুখলৈ ঠেলি দিব। বৰ্তমান বিশ্বৰ প্ৰায় অধিকাংশ দৰিদ্ৰ দেশ ঋণ সংকটত জৰ্জৰিত অথবা তেনে সংকটৰ উচ্চ আশংকাৰ সন্মুখীন হৈ আছে। ঋণ পৰিশোধৰ ব্যয় বৃদ্ধি আৰু চৰকাৰী সঞ্চয় হ্ৰাস পোৱাৰ ফলত বহু দেশে স্বাস্থ্য, শিক্ষা আৰু আন্তঃগাঁথনি উন্নয়নৰ দৰে গুৰুত্বপূৰ্ণ খণ্ডৰ পৰা ধন আঁতৰাই আন ক্ষেত্ৰত ব্যয় কৰিবলৈ বাধ্য হৈছে।
হ’ব পাৰে তীব্ৰ খাদ্য সংকট
আন এক উদ্বেগজনক দিশ হৈছে কৃষি খণ্ড। বিশ্ব বেংকৰ মূল্যায়ন অনুসৰি, চলিত বৰ্ষৰ শেষৰ ফালে সাৰৰ মূল্য প্ৰায় ৩১ শতাংশ বৃদ্ধি পোৱাৰ আশংকা কৰা হৈছে। ইয়াৰ ফলত কৃষকৰ উৎপাদন ব্যয় বৃদ্ধি, আয় হ্ৰাস আৰু কৃষি উৎপাদন কমি যোৱাৰ আশংকা ব্যক্ত কৰা হৈছে। খাদ্য যোগান ব্যৱস্থাত ব্যাঘাত ঘটিলে বিশ্বজুৰি প্ৰায় ৪.৫ কোটি লোক তীব্ৰ খাদ্য সংকটৰ সন্মুখীন হ’ব পাৰে। সামগ্ৰিকভাৱে চালে স্পষ্ট হয় যে ইৰান-আমেৰিকা সংঘাত প্ৰত্যক্ষভাৱে শেষ হ’লেও ইয়াৰ ফলত হোৱা অৰ্থনৈতিক আৰু সামাজিক সংঘাত এতিয়াও অব্যাহত আছে। এই সংকটৰ পৰা উত্তৰণৰ বাবে বিশেষকৈ দুৰ্বল আৰু উন্নয়নশীল দেশসমূহক শক্তিশালী বহুপাক্ষিক সহযোগিতা, সুদৃঢ় অৰ্থনৈতিক নীতি আৰু আন্তঃৰাষ্ট্ৰীয় সহায়ৰ প্ৰয়োজন। অন্যথা বিশ্বজুৰি দাৰিদ্ৰ্য, খাদ্য সংকট আৰু উন্নয়নৰ ক্ষেত্ৰত নতুন প্ৰত্যাহ্বানৰ সৃষ্টি হোৱাৰ আশংকা নুই কৰিব নোৱাৰি।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
