বান শুকাল, কিন্তু দুৰ্দশা কমা নাই ৰাইজৰ। নৰক যন্ত্ৰণা, আৱৰ্জনা, দুৰ্গন্ধই অশান্তিকৰ পৰিৱেশ সৃষ্টি কৰিছে চৌদিশে। এই বানে কেৱল মানুহৰ ঘৰে উটুৱাই নিয়া নাই! বহুতৰে সপোন ঠানবান কৰিলে হঠাতে অহা প্ৰলয়ংকাৰী বানে। ৰাজপথেই যেন এতিয়া একমাত্ৰ আশ্ৰয়স্থলী হৈ পৰিছে বহুতৰে বাবে।
কিন্তু এই বিপৰ্যয়ৰ সময়তে একাংশই লৈছে সুবিধা। জীয়ৰীক কইনাৰ সাঁজেৰে বিদায় দিবলৈ সাজু হৈছিল এহাল পিতৃ-মাতৃয়ে, পিছে জীয়ৰী কইনা হোৱাৰ পূৰ্বেই বানৰ মাজতে গঢ়াই থোৱা আ অলংকাৰ লৈ গ’ল চোৰে।
বানপানী হ্ৰাস পোৱাৰ পিছতে বেতবাৰীৰ লুথুৰি চেতিয়াগাঁৱৰ জিতু মালাকাৰৰ বাসগৃহত চুৰিকাণ্ড সংঘটিত হয়। চোৰে জিতু মালাকাৰৰ জীয়ৰী নিহাৰিকা মালাকাৰৰ বিয়াৰ বাবে তৈয়াৰ কৰা সকলো আ-অলংকাৰ লৈ যায়। বানে সকলো সপোন চূৰ্ণ-বিচূৰ্ণ কৰাৰ সময়তে চোৰে অপাৰেচনৰ বাবে সাঁচি থোৱা ৭০ হাজাৰ টকাও লৈ উধাও হয়।
জীয়ৰী নিহাৰিকা মালাকাৰৰ ডিচেম্বৰ মাহত বিয়াৰ দিন ধাৰ্য্য কৰা হৈছিল। পিতৃয়ে ই-ৰিক্সা চলোৱাৰ লগতে হাজিৰা কৰি পৰিয়াৰটো পোহপালন কৰিছিল, কিন্তু জীয়ৰীৰ বাবে এপদ-দুপদকৈ আ-অলংকাৰ গোটোৱা জীতুৰ ঘৰত চকু পৰে চোৰৰ। সকলো হেৰুৱাই এতিয়া কান্দোনত ভাগি পৰিছে পৰিয়ালটো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
