অনলাইন পেমেণ্ট ব্যৱস্থা দৈনন্দিন জীৱনৰ এক অবিচ্ছেদ্য অংগ হৈ পৰিছে। যেতিয়া আমি অনলাইন পেমেণ্টৰ কথা কওঁ তেতিয়া প্ৰথমে ইউ পি আইৰ কথা মনলৈ আহে। সৰু দোকানৰ পৰা আৰম্ভ কৰি ডাঙৰ ব্যৱসায়লৈকে গুগল পে, ফোনপে সকলোতে ব্যৱহাৰ কৰা হয়। এতিয়া ইউ পি আই ব্যৱস্থাত এটা ডাঙৰ পৰিৱৰ্তন আহিব।
ভাৰতীয় ৰাষ্ট্ৰীয় পেমেণ্ট নিগমে ইউপিআই ব্যৱহাৰকাৰীৰ পেমেণ্টৰ গোপনীয়তা বৃদ্ধি আৰু সুৰক্ষা শক্তিশালী কৰাৰ বাবে নতুন নিৰ্দেশনা জাৰি কৰিছে।
কি পৰিৱৰ্তন হ’ব?
এনচিপিআইৰ নতুন নিয়ম অনুসৰি ছেপ্টেম্বৰৰ পৰা সকলো ইউপিআই এপ আৰু বেংকে কাৰিকৰী পৰিৱৰ্তন কৰিব লাগিব। ৪ ছেপ্টেম্বৰৰ পিছত ইউ পি আইৰ জৰিয়তে ধন প্ৰেৰণ কৰাৰ সময়ত আৰু সম্পূৰ্ণ মোবাইল নম্বৰ দেখা নাযায়। কেৱল ফোন নম্বৰৰ শেষৰ চাৰিটা অংকহে দেখা যাব। ইয়াৰ ফলত ব্যৱহাৰকাৰীৰ ব্যক্তিগত তথ্য তুলনামূলকভাৱে কম শ্বেয়াৰ হ’ব।
ছেপ্টেম্বৰৰ পৰা ইউপিআই পেমেণ্ট কিউআৰ ক’ড ব্যৱহাৰ কৰি কৰিলেও টকা পঠোৱা ব্যক্তি আৰু টকা লাভ কৰা ব্যক্তিৰ সম্পূৰ্ণ মোবাইল নম্বৰ দেখা নাযায়। অৰ্থাৎ এই ক্ষেত্ৰতো গোপনীয়তা বজাই ৰখা হ’ব। যদি আপুনি কোনো অচিনাকি ব্যক্তিক বা কোনো দোকানলৈ ধন দিয়ে, তেন্তে ইউপিআই ব্যৱহাৰকাৰীৰ ফোন নম্বৰ লুকাই থাকিব।
ডিজিটেল ব্যক্তিগত তথ্য সুৰক্ষা আইনৰ অধীনত ব্যক্তিগত তথ্যৰ গোপনীয়তা আৰু সুৰক্ষা নিশ্চিত কৰাৰ বাবে এই পদক্ষেপ গ্ৰহণ কৰা হৈছে। ইউপিআই পেমেণ্টৰ সময়ত অসংখ্য অবাঞ্চিত ফোন কলৰ অভিযোগ আৰু মোবাইল নম্বৰ সংগ্ৰহ কৰি প্ৰতাৰণা কৰাৰ চেষ্টাৰ ধাৰাবাহিক অভিযোগ পোৱাৰ পিছত এই পদক্ষেপ এনপিচিআইয়ে গ্ৰহণ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
