এই দিনটোত দিনতেই নামি আহিব অমাৱস্যাৰ দৰে ঘোৰ এন্ধাৰ, কিন্তু কিয়

অহা ১২ আগষ্টত বিশ্বৰ কেইবাখনো দেশত এক বিৰল জ্যোতিৰ্বৈজ্ঞানিক ঘটনা সংঘটিত হ’ব। উক্ত দিনা পূৰ্ণ সূৰ্যগ্ৰহণৰ সময়ত কিছুমান অঞ্চলত দিনতে নিশাৰ দৰে আন্ধাৰ নামিব। এই ঘটনাত চন্দ্ৰই সম্পূৰ্ণৰূপে সূৰ্যক ঢাকি পেলোৱাৰ ফলত সূৰ্যৰ পোহৰ সাময়িকভাৱে বন্ধ হৈ পৰিব। যেতিয়া চন্দ্ৰ পৃথিৱী আৰু সূৰ্যৰ মাজেদি একে সৰলৰেখাত অতিক্ৰম কৰে তেতিয়া সূৰ্যগ্ৰহণ হয়। ফলত চন্দ্ৰৰ ছাঁ পৃথিৱীৰ এক সৰু অংশত পৰে আৰু সেই অঞ্চলৰ পৰা সূৰ্য সম্পূৰ্ণ বা আংশিকভাৱে আবৃত হোৱা দেখা যায়।

পূৰ্ণ সূৰ্যগ্ৰহণৰ সময়ত চাৰিওফালে এক বিশেষ ধূসৰ পোহৰৰ পৰিৱেশ সৃষ্টি হয়। তাপমাত্ৰা কিছু হ্ৰাস পায়, ছাঁবোৰ অস্বাভাৱিক কোণত দেখা যায় আৰু বহু চৰাই-চিৰিকতি বা জন্তুৱে ইয়াক সন্ধিয়া বুলি ভাবি নিজৰ আশ্ৰয়লৈ উভতি যায়। প্ৰাচীন সভ্যতাসমূহে এনে ঘটনাক পৃথিৱীৰ অন্ত বা দেৱতাসকলৰ সংকেত বুলি বিশ্বাস কৰিছিল যদিও আধুনিক বিজ্ঞানে ইয়াৰ প্ৰকৃত বৈজ্ঞানিক কাৰণ স্পষ্ট কৰিছে।

কিয় হয় পূৰ্ণ সূৰ্যগ্ৰহণ?

আমেৰিকাৰ মহাকাশ গৱেষণা সংস্থা নাছাৰ মতে, সূৰ্য চন্দ্ৰতকৈ প্ৰায় ৪০০ গুণ ডাঙৰ। কিন্তু সূৰ্য পৃথিৱীৰ পৰা চন্দ্ৰতকৈ প্ৰায় ৪০০ গুণ দূৰত অৱস্থিত। এই আশ্চৰ্যজনক সংযোগৰ ফলতেই পৃথিৱীৰ নিৰ্দিষ্ট অঞ্চলৰ পৰা চন্দ্ৰই সূৰ্যক সম্পূৰ্ণৰূপে ঢাকি পেলাব পাৰে। তেতিয়া সূৰ্যৰ বাহ্যিক বায়ুমণ্ডল, যাক ‘কৰ’না (Corona) বুলি কোৱা হয়, খালী চকুতো স্পষ্টকৈ দেখা যায়।

১২ আগষ্টৰ সূৰ্যগ্ৰহণ ক’ত দেখা যাব?

এই পূৰ্ণ সূৰ্যগ্ৰহণ প্ৰথমে উত্তৰ ৰাছিয়াৰ দূৰৱৰ্তী অঞ্চলত দেখা যাব। তাৰ পিছত গ্ৰীনলেণ্ড, আইচলেণ্ড, স্পেইন আৰু পৰ্তুগালৰ উত্তৰ-পূব অংশ অতিক্ৰম কৰি আগবাঢ়িব।

স্পেইনত এই গ্ৰহণ মূলতঃ উত্তৰৰ অ’ভিয়েডো চহৰৰ পৰা আৰম্ভ কৰি Mallorca দ্বীপলৈকে দেখা যাব। উল্লেখযোগ্য যে, এই গ্ৰহণৰ পথ স্পেইনৰ সেই অঞ্চলসমূহৰ ওপৰেদিও যাব, য’ত শেহতীয়াকৈ ভয়ংকৰ বনজুইৰ ঘটনা সংঘটিত হৈছিল। বিজ্ঞানীসকলৰ মতে, জলবায়ু পৰিৱৰ্তনৰ ফলত এনে বনজুইৰ আশংকা বৃদ্ধি পাইছে।

কিমান সময় ধৰি দেখা যাব?

স্পেইনত পূৰ্ণ সূৰ্যগ্ৰহণ সূৰ্যাস্তৰ ঠিক আগতে দেখা যাব আৰু ইয়াৰ স্থায়িত্ব দুমিনিটতকৈও কম হ’ব। উদাহৰণস্বৰূপে, উত্তৰ স্পেইনৰ বুৰ্গ’ছ (Burgos) চহৰত প্ৰায় ১ মিনিট ৪৮ ছেকেণ্ড ধৰি দিনতেই আন্ধাৰ নামিব। ৰাছিয়া আৰু গ্ৰীনলেণ্ডৰ কিছুমান অংশত এই সময় অলপ বেছি হ’লেও আঢ়ৈ মিনিটতকৈ কমেই থাকিব। অৱশ্যে এইবাৰৰ ১২ আগষ্টৰ পূৰ্ণ সূৰ্যগ্ৰহণ ভাৰতৰ পৰা দৃশ্যমান নহ’ব। সেয়েহে ভাৰতৰ লোকসকলে এই জ্যোতিৰ্বৈজ্ঞানিক ঘটনাটো প্ৰত্যক্ষভাৱে উপভোগ কৰিব নোৱাৰিব।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ