দুবাৰকৈ ODI বিশ্বকাপ চেম্পিয়ন ৱেষ্ট ইণ্ডিজ ক্ৰিকেট দলটো ধৰাবাহিকভাৱে নিম্নগামী হৈয়েই আছে। গেৰী, ছোবাৰ্ছ, ভিভ ৰিচাৰ্ডছ, ক্লাইভ লয়ড, গোমছ, মাইকেল হোল্ডিং, ব্ৰায়ান লাৰা, ক্ৰিছ গেইলৰ দৰে কিংবদন্তী ক্ৰিকেটাৰ উপহাৰ দিয়া দলটোৱে ক্ৰমাগতভাৱে তিনিটাকৈ ODI বিশ্বকাপত পোনপটীয়াকৈ বিশ্বকাপত যোগ্যতা অৰ্জন কৰাত ব্যৰ্থ হৈছে। এই কিংবদন্তীসকলৰ ওপৰিও সাম্প্ৰতিক সময়তো নিকোলাছ পুৰান, পোলাৰ্ড, নাৰিন, ৰোমাৰিঅ ছেফাৰ্ডৰ দৰে খেলুৱৈ সমগ্ৰ বিশ্বৰ ক্ৰিকেটৰ টুৰ্নামেণ্টসমূহত দপদপাই আছে, তাৰ পিছতো আগন্তুক ২০২৭ চনৰ এদিনীয়া বিশ্বকাপৰ বাবে পোনপটীয়াকৈ যোগ্যতা অৰ্জন কৰাত সম্পূৰ্ণৰূপে ব্যৰ্থ হৈছে কেৰিবিয়ান দলটোৱে। ICCৰ কাট অব ডেটৰ ভিতৰত ৰেংকিঙৰ শীৰ্ষ আঠটাৰ ভিতৰত স্থান নিশ্চিত কৰিব নোৱাৰাৰ বাবে ৱেষ্ট ইণ্ডিজে একেৰাহে তৃতীয়বাৰৰ বাবে এদিনীয়া বিশ্বকাপৰ বাবে মূল প্ৰতিযোগিতাত প্ৰৱেশ কৰিবলৈ কোৱালিফায়াৰত খেলিব লাগিব।
ৱেষ্ট ইণ্ডিজৰ ভাগ্য বহুলাংশে নিৰ্ভৰ কৰিছিল আফগানিস্তান আৰু আয়াৰলেণ্ডৰ মাজত অনুষ্ঠিত হোৱা পাঁচখন এদিনীয়া শৃংখলাৰ ফলাফলৰ ওপৰত। শৃংখলাটোত যদি আয়াৰলেণ্ডে আফগানিস্তানক ৪-১ বা ৫-০ ত পৰাস্ত কৰিলেহেঁতেন তেতিয়া ৱেষ্ট ইণ্ডিজৰ পোনপটীয়াকৈ বিশ্বকাপত যোগ্যতা অৰ্জন কৰাৰ আশা সজীৱ হৈ থাকিলহেঁতেন। অৱশ্যে তেতিয়াও কেৰেবিয়ান দলটোৰ সমষ্ট আশা নিৰ্ভৰ কৰিলহেঁতেন টীম ইণ্ডিয়াৰ ওপৰত। কিয়নো ভাৰতৰ বিৰুদ্ধে ৱেষ্ট ইণ্ডিজে আগন্তুক ২৭ ছেপ্টম্বৰৰ পৰা তিনিখন ODI মেচৰ শৃংখলাত অৱতীৰ্ণ হ’ব। যদিহে এই শৃংখলাটোত ৱেষ্ট ইণ্ডিজে ভাৰতক শৃংখলাটোত পৰাস্ত কৰিলেহেঁতেন তেতিয়া পোনপটীয়াকৈ যোগ্যতা অৰ্জন কৰিব পাৰিলেহেঁতেন। কিন্তু ভাৰতৰ মাটিত ৱেষ্ট ইণ্ডিজৰ এই যাত্ৰাও যথেষ্ট কঠিনেই হলহেঁতেন। আফগানিস্তানে আয়াৰলেণ্ডৰ বিৰুদ্ধে শৃংখলা জয় কৰি ৰেংকিঙত উন্নতি ঘটোৱাৰ লগে লগে ৱেষ্ট ইণ্ডিজৰ সকলো সমীকৰণ ধূলিস্যাৎ হৈ পৰিল।
আফগানিস্তান আৰু আয়াৰলেণ্ডৰ মাজত অনুষ্ঠিত হোৱা শৃংখলাৰ প্ৰথমখন এদিনীয়া বৰষুণৰ বাবে বাতিল হোৱাৰ বিপৰীতে দ্বিতীয়খন মেচত আফগানিস্তানে একপক্ষীয় প্ৰদৰ্শন আগবঢ়াই আয়াৰলেণ্ডক ৯২ ৰানত পৰাস্ত কৰে। এই জয়েৰে আফগানিস্তানে ICC ৰেংকিঙত নিজৰ স্থান যথেষ্ট শক্তিশালী কৰি অষ্টম স্থান দখল কৰে। আগন্তুক ODI বিশ্বকাপত আয়োজক হিচাপে দক্ষিণ আফ্ৰিকা আৰু জিম্বাবুৱেই পোনপটীয়াকৈ যোগ্যতা অৰ্জন কৰাৰ বিপৰীতে ৰেংকিঙৰ ভিত্তিত ভাৰত, অষ্ট্ৰেলিয়া, ইংলেণ্ড, নিউজীলেণ্ড, পাকিস্তান, শ্ৰীলংকা, বাংলাদেশ আৰু আফগানিস্তানে পোনপটীয়াকৈ যোগ্যতা অৰ্জন কৰিছে। আগন্তুক ODI বিশ্বকাপত মুঠ ১৪টা দলে অংশগ্ৰহণ কৰিব। গতিকে বাকী থকা ৪টা দলে যোগ্যতা অৰ্জনকাৰী টুৰ্নামেণ্টৰ ভিত্তিত বিশ্বকাপ খেলিবলৈ সুযোগ পাব। ২০২৭ৰ ২২ ফেব্ৰুৱাৰীৰ পৰা আৰম্ভ হবলগীয়া বিশ্বকাপৰ যোগ্যতা অৰ্জনকাৰী টুৰ্নামেণ্টখনত ৱেষ্ট ইণ্ডিজৰ উপৰিও আয়ৰলেণ্ড, স্কটলেণ্ড, নেডাৰলেণ্ডছ, নামিবিয়া, UAE আদি দলে অংশগ্ৰহণ কৰিব।
ধাৰাবাহিকভাৱে দুৰ্বল প্ৰদৰ্শনৰ বাবে ৱেষ্ট ইণ্ডিজ ২০২৩ চনৰ এদিনীয়া বিশ্বকাপত যোগ্যতাই অৰ্জন কৰিব পৰা নাছিল ৱেষ্ট ইণ্ডিজ। পোনপটীয়াকৈ যোগ্যতা অৰ্জনত ব্যৰ্থ হোৱাৰ পিছত যোগ্যতা অৰ্জনকাৰী টুৰ্নামেণ্টৰ পৰাও বাহিৰ হৈছিল কেৰিবিয়ান দলটো। ইয়াৰ উপৰিও ২০১৯তো পোনপটীয়াকৈ যোগ্যতা অৰ্জনত ব্যৰ্থ হৈছিল ৱেষ্ট ইণ্ডিজ।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
