ক্ৰিকেটাৰ ৰবিচন্দ্ৰন অশ্বিনৰ ঘৰত আৰক্ষীৰ দল

ভাৰতৰ প্ৰাক্তন ক্ৰিকেটাৰ ৰবিচন্দ্ৰন অশ্বিনে নিজৰ Youtube চেনেলৰ বাবে ঘৰত ভিডিঅ’ ৰেকৰ্ডিং কৰি থকাৰ সময়তে হঠাৎ তেওঁৰ ঘৰত আৰক্ষী উপস্থিত হয়। ভাৰত আৰু শ্ৰীলংকাৰ মাজত চলি প্ৰথমখন টেষ্ট মেচক লৈ সাংবাদিক বিমল কুমাৰৰ সৈতে ভিডিঅ’ ৰেকৰ্ডিং কৰি আছিল অশ্বিন। সেই সময়তে তেওঁৰ ছিকিউৰিটি গাৰ্ডে তেওঁক ফোন কৰি ঘৰত আৰক্ষী অহাৰ কথা জনায়। প্ৰথমতে অশ্বিনে গাৰ্ডৰ ফোনটোক গুৰুত্ব দিয়া নাছিল। কিন্তু গাৰ্ডে একেৰাহে ফোন কৰি থকাৰ লগতে তেওঁৰ পত্নীয়েও ফোন কৰাত অৱশেষত অশ্বিনে ফোনটো উঠায়। তেতিয়াহে তেওঁ জানিব পাৰে যে তেওঁৰ ঘৰৰ দুৱাৰত আৰক্ষী উপস্থিত হৈছে। ফলত কিছু সময়ৰ বাবে ভিডিঅ’ ৰেকৰ্ডিং বন্ধ কৰিবলগীয়া হয়। অশ্বিনে সাংবাদিক বিমল কুমাৰৰ সৈতে পুনৰ ভিডিঅ’ ৰেকৰ্ডিং আৰম্ভ কৰাৰ পিছত বিমল কুমাৰে ধেমেলীয়াকৈ সুধিলে—“আপুনি এনে কি কৰিলে যে আপোনাক ধৰিবলৈ আৰক্ষী ঘৰত উপস্থিত হ’ল?” ইয়াৰ পিছতে অশ্বিনে আৰক্ষী তেওঁৰ ঘৰত কিয় আহিছিল সেই কথা নিজেই প্ৰকাশ কৰে।

কিয় অশ্বিনৰ ঘৰত আৰক্ষী আহিছিল?

অশ্বিনে জনোৱা মতে, তেওঁৰ পাছপ’ৰ্টৰ সৈতে জড়িত কামৰ বাবেই আৰক্ষী তেওঁৰ ঘৰত উপস্থিত হৈছিল। তেওঁ ভিছাৰ বাবে নিজৰ পাছপ’ৰ্ট জমা দিছিল আৰু সেই পাছপ’ৰ্টৰ ভেৰিফিকেশ্যন সম্পৰ্কীয় কামৰ বাবেই আৰক্ষীৰ লোক তেওঁৰ ঘৰত আহিছিল। অশ্বিনে কয়, “মোৰ ঘৰৰ ছিকিউৰিটিৰ পৰা মোক কেইবাটাও ফোন আহিছিল। সাধাৰণতে তেওঁলোকে ইমান ফোন নকৰে। মোৰ পত্নীয়েও ফোন কৰাত মই সুধিলোঁ, কি হৈছে? তেতিয়া তেওঁ ক’লে—‘দুৱাৰত আৰক্ষী থিয় হৈ আছে।’ আচলতে মই ভিছাৰ বাবে পাছপ’ৰ্ট জমা দিছিলোঁ, সেইটো লৈয়ে তেওঁলোক আহিছিল।” অশ্বিনৰ এই কথা শুনি বিমল কুমাৰে ধেমেলীয়াকৈ মন্তব্য কৰে যে অশ্বিনৰ দৰে পৰিচিত ব্যক্তিৰ নাম দেখিলেই হয়তো সকলো কাম হৈ যায়, আৰক্ষীৰ ভেৰিফিকেশ্যনৰ দৰে বিষয় সাধাৰণ মানুহৰ বাবেহে। ইয়াৰ উত্তৰত অশ্বিনে কয় যে তেওঁ সাধাৰণ জীৱন যাপন কৰিয়েই ভাল পায়।

অশ্বিনে কয়, “মই সাধাৰণ জীৱন যাপন কৰিব বিচাৰোঁ, সেয়েহে সাধাৰণভাৱেই থাকোঁ।” আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰাৰ পিছতো অশ্বিনে ক্ৰিকেটৰ সৈতে সম্পৰ্ক অব্যাহত ৰাখিছে। নিজৰ ইউটিউব চেনেলৰ জৰিয়তে তেওঁ বিভিন্ন ক্ৰিকেটীয় বিষয়, খেলৰ বিশ্লেষণ আৰু সমসাময়িক ঘটনাক লৈ নিজৰ মতামত প্ৰকাশ কৰি আহিছে।

৩৯ বছৰীয়া ৰবিচন্দ্ৰন অশ্বিনে ভাৰতৰ হৈ ১০৬খন টেষ্ট, ১১৬খন এদিনীয়া আন্তঃৰাষ্ট্ৰীয় আৰু ৬৫খন টি-২০ আন্তঃৰাষ্ট্ৰীয় মেচ খেলিছে। টেষ্টত তেওঁৰ নামত ৫৩৭টা উইকেট, এদিনীয়াত ১৫৬টা আৰু টি-২০ আন্তঃৰাষ্ট্ৰীয়ত ৭২টা উইকেট আছে। ভাৰতীয় ক্ৰিকেটৰ এগৰাকী সফল অলৰাউণ্ডাৰ হিচাপে অশ্বিনে আন্তঃৰাষ্ট্ৰীয় ক্ৰিকেটত নিজৰ এক বিশেষ স্থান গঢ়ি তুলিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ