সমগ্ৰ দেশতে আজি ৮০সংখ্যক স্বাধীনতা দিৱস উদযাপন কৰা হৈছে। স্বাধীনতা দিৱস উপলক্ষে প্ৰধানমন্ত্ৰী নৰেন্দ্ৰ মোদীয়ে লালকিল্লাত ৰাষ্ট্ৰীয় পতাকা উত্তোলন কৰি দেশবাসীক উদ্দেশ্যি ভাষণ প্ৰদান কৰে। লালকিল্লাত অনুষ্ঠিত এই মূল অনুষ্ঠানত চৰকাৰ আৰু বিৰোধী শিবিৰৰ বহু কেইগৰাকী বিশিষ্ট নেতা-নেত্ৰী উপস্থিত থাকে। কিন্তু এইবাৰ অনুষ্ঠানটোত কংগ্ৰেছ নেতা তথা লোকসভাৰ বিৰোধী দলপতি ৰাহুল গান্ধী উপস্থিত নথকাক লৈ ৰাজনৈতিক বিতৰ্কৰ সৃষ্টি হৈছে।
লালকিল্লাৰ অনুষ্ঠানত কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষামন্ত্ৰী ৰাজনাথ সিং, বিত্তমন্ত্ৰী নিৰ্মলা সীতাৰমণ আৰু বৈদেশিক পৰিক্ৰমা মন্ত্ৰী এছ জয়শংকৰকে ধৰি কেন্দ্ৰীয় চৰকাৰৰ বহু কেইগৰাকী শীৰ্ষ নেতা উপস্থিত থাকে। ইয়াৰ উপৰি ভাৰতৰ মুখ্য ন্যায়াধীশ (CJI) সূৰ্য কান্ত, মুখ্য নিৰ্বাচন আয়ুক্ত জ্ঞানেশ কুমাৰ, ৰাষ্ট্ৰীয় নিৰাপত্তা উপদেষ্টা (NSA) অজিত ডোভাল, প্ৰধানমন্ত্ৰীৰ মুখ্য সচিব পি কে মিশ্ৰ আৰু শক্তিকান্ত দাসৰ দৰে শীৰ্ষ বিষয়াসকলেও অনুষ্ঠানটোত অংশগ্ৰহণ কৰে।
‘ৰাহুল গান্ধী উদণ্ড, অহংকাৰী’
ৰাহুল গান্ধী অনুষ্ঠানটোত উপস্থিত নথকাক লৈ কেন্দ্ৰীয় শিক্ষা মন্ত্ৰী প্ৰহ্লাদ যোশীয়ে তীব্ৰ প্ৰতিক্ৰিয়া প্ৰকাশ কৰে। তেওঁ কয় যে স্বাধীনতা দিৱস আৰু গণৰাজ্য দিৱসক দলীয় ৰাজনীতিৰ ঊৰ্ধ্বত ৰখা উচিত। প্ৰহ্লাদ যোশীৰ মতে, প্ৰধানমন্ত্ৰীয়ে স্বাধীনতা দিৱসৰ দিনা ভাষণ প্ৰদান কৰাৰ সময়ত তেওঁ কেৱল কোনো এটা দলৰ নেতা নহয়, বৰং দেশৰ প্ৰধানমন্ত্ৰী হিচাপেহে দেশবাসীক সম্বোধন কৰে। তেওঁ অভিযোগ কৰে যে বিগত কেইবছৰমান ধৰি ৰাহুল গান্ধী আৰু মল্লিকাৰ্জুন খাৰ্গেৰ নেতৃত্বাধীন কংগ্ৰেছে এনে অনুষ্ঠানৰ পৰা আঁতৰি থকাৰ পৰম্পৰা সৃষ্টি কৰিছে। তেওঁ ৰাহুল গান্ধীৰ এই আচৰণক ‘অপৰিপক্বতা’, ‘উদণ্ডতা’ আৰু ‘অহংকাৰ’ৰ ফল বুলি মন্তব্য কৰে। লগতে বিৰোধী দলৰ নেতাসকলক এনে ৰাষ্ট্ৰীয় অনুষ্ঠানত উপস্থিত থাকিবলৈ আহ্বান জনাই প্ৰহ্লাদ যোশীয়ে কয় যে এই ধৰণৰ পৰম্পৰা অব্যাহত ৰখাটো উচিত নহয়।
‘চিন্তাধাৰা সমাজক বিভাজিত কৰা ধৰণৰ’
ইফালে বিজেপিৰ মুখপাত্ৰ প্ৰদীপ ভাণ্ডাৰীয়েও সামাজিক মাধ্যম Xৰ জৰিয়তে ৰাহুল গান্ধীক সমালোচনা কৰে। তেওঁ প্ৰশ্ন উত্থাপন কৰে যে দেশবাসীক প্ৰতিনিধিত্ব কৰা কোনো ‘প্ৰকৃত দেশপ্ৰেমী’ নেতাই স্বাধীনতা দিৱসৰ দৰে গুৰুত্বপূৰ্ণ ৰাষ্ট্ৰীয় অনুষ্ঠানৰ পৰা আঁতৰি থাকিব পাৰেনে? ভাণ্ডাৰীয়ে অভিযোগ কৰে যে ৰাহুল গান্ধীয়ে লালকিল্লাৰ অনুষ্ঠানৰ পৰা দূৰত্ব বজাই ৰখাৰ আঁৰত ‘বন্দে মাতৰম’ৰ প্ৰতি তেওঁৰ অপছন্দৰ বিষয়টো জড়িত হৈ আছে। তেওঁ লগতে ৰাহুল গান্ধী লোকসভাৰ বিৰোধী দলপতিৰ পদৰ বাবে উপযুক্ত নহয় বুলিও মন্তব্য কৰে। বিজেপি মুখপাত্ৰগৰাকীয়ে ৰাহুল গান্ধীৰ চিন্তাধাৰাক সমাজক বিভাজিত কৰা আদৰ্শৰ সৈতে তুলনা কৰি তীব্ৰ আক্ৰমণ চলায়।
স্বাধীনতা দিৱসৰ দৰে ৰাষ্ট্ৰীয় অনুষ্ঠানত বিৰোধী দলৰ শীৰ্ষ নেতাৰ অনুপস্থিতিক কেন্দ্ৰ কৰি বিজেপিয়ে কৰা এই মন্তব্যই দেশৰ ৰাজনীতিত নতুন বিতৰ্কৰ সূচনা কৰিছে। ৰাষ্ট্ৰীয় অনুষ্ঠানত ৰাজনৈতিক মতভেদৰ ঊৰ্ধ্বত থাকি সকলো পক্ষৰ অংশগ্ৰহণ কৰা উচিত নে নহয়—এই বিষয়টোকে লৈ এতিয়া ৰাজনৈতিক মহলত চৰ্চা চলিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
