ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে ব্ৰিটেইনক লৈ কৰা এক মন্তব্যই নতুন বিতৰ্কৰ সৃষ্টি কৰিছে। ইজৰাইলৰ আৰ্মি ৰেডিঅ’ৰ এটা প’ডকাষ্ট সাক্ষাৎকাৰত নেতান্যাহুৱে ব্ৰিটেইনক ‘ইছলামিক ৰিপাব্লিক অব ব্ৰিটেইন’ বুলি অভিহিত কৰে। আনকি তেওঁ ধেমালিৰ সুৰত ব্ৰিটেইনক ‘পাৰমাণৱিক অ*স্ত্ৰ থকা প্ৰথমখন ইছলামিক ৰিপাব্লিক’ বুলিও উল্লেখ কৰে। সাক্ষাৎকাৰটোত ব্ৰিটেইনৰ সলনি হৈ থকা ৰাজনৈতিক পৰিৱেশ আৰু ইজৰাইলৰ সৈতে দেশখনৰ সম্পৰ্কৰ বিষয়ে আলোচনা কৰা হৈছিল।
উক্ত প্ৰসংগত নেতান্যাহুৱে প্ৰাক্তন ব্ৰিটিছ প্ৰধানমন্ত্ৰী উইনষ্টন চাৰ্চিলৰ পুত্ৰ ৰেণ্ডলফ চাৰ্চিলৰ প্ৰশংসা কৰে। ১৯৬৭ চনৰ ছয়দিনীয়া যুদ্ধৰ সময়ত ইজৰাইলৰ পক্ষত ৰেণ্ডলফ চাৰ্চিলে কৰা ইতিবাচক সংবাদ পৰিৱেশনৰ কথা উল্লেখ কৰি নেতান্যাহুৱে কয় যে আজিৰ ব্ৰিটেইনত তেনে পৰিস্থিতি বিচাৰি পোৱা কঠিন। ইয়াৰ পিছতে তেওঁ ব্ৰিটেইনক ‘ইছলামিক ৰিপাব্লিক’ বুলি উল্লেখ কৰে। সাক্ষাৎকাৰৰ সঞ্চালকেও ইউৰোপৰ আন দেশসমূহতো একেধৰণৰ পৰিৱৰ্তন দেখা গৈছে নেকি বুলি প্ৰশ্ন কৰে। নেতান্যাহুৱে এই কথাত সন্মতি প্ৰকাশ কৰি কয় যে কোনোবাই কৈছিল—‘পাৰমাণৱিক অ*স্ত্ৰ থকা প্ৰথমখন ইছলামিক ৰিপাব্লিক হ’ব ইছলামিক ৰিপাব্লিক অব গ্ৰেট ব্ৰিটেইন।’
নেতান্যাহুৰ এই মন্তব্যৰ পিছতে ব্ৰিটেইন চৰকাৰত তীব্ৰ অসন্তুষ্টি দেখা গৈছে। ব্ৰিটিছ চৰকাৰৰ এগৰাকী মুখপাত্ৰই মন্তব্যটো ‘সম্পূৰ্ণৰূপে অগ্ৰহণযোগ্য’ বুলি অভিহিত কৰাৰ লগতে বিষয়টো ইজৰাইল চৰকাৰৰ ওচৰত উত্থাপন কৰা হৈছে বুলি জানিবলৈ দিয়ে। নেতান্যাহুৰ মন্তব্যক ব্ৰিটেইনত ইছলামৰ প্ৰভাৱ বৃদ্ধি পাইছে বুলি দাবী কৰা সোঁপন্থী তথা অতি-সোঁপন্থী ৰাজনৈতিক বৰ্ণনাৰ সৈতে মিল থকা বুলি বহুতে মন্তব্য কৰিছে। অৱশ্যে ব্ৰিটেইনৰ মুঠ জনসংখ্যাৰ তুলনাত মুছলমান লোক এতিয়াও সংখ্যালঘু।
নেতান্যাহুৰ মন্তব্যত পাকিস্তানৰ প্ৰতিও পৰোক্ষ ইংগিত থকা বুলি ধাৰণা কৰা হৈছে। পাকিস্তানৰ চৰকাৰী নাম ‘ইছলামিক ৰিপাব্লিক অব পাকিস্তান’ আৰু দেশখন ১৯৯৮ চনৰ পৰা পাৰমাণৱিক শক্তিধৰ ৰাষ্ট্ৰ। সেয়েহে ‘ইছলামিক ৰিপাব্লিক’ আৰু ‘পাৰমাণৱিক অ*স্ত্ৰ’—এই দুয়োটা প্ৰসংগ একেলগে উল্লেখ কৰি নেতান্যাহুৱে পাকিস্তানৰ সৈতে তুলনা কৰাৰ চেষ্টা কৰা বুলি বিশ্লেষণ কৰা হৈছে।
ইফালে, শেহতীয়া সময়ত ব্ৰিটেইন আৰু ইজৰাইলৰ মাজৰ সম্পৰ্কতো যথেষ্ট মতভেদ দেখা গৈছে। বিশেষকৈ গাজা যুদ্ধক লৈ ব্ৰিটিছ চৰকাৰৰ অৱস্থান আৰু ইজৰাইলৰ নীতিৰ মাজত মতভেদ বৃদ্ধি পাইছে। ব্ৰিটেইনৰ প্ৰধানমন্ত্ৰী এণ্ডি বাৰ্নহামে গাজাত সংঘটিত ঘটনাক লৈ ইজৰাইল চৰকাৰৰ ওপৰত অধিক চাপ প্ৰয়োগ কৰাৰ প্ৰয়োজনীয়তাৰ কথা কৈ আহিছে। প্ৰধানমন্ত্ৰী পদ গ্ৰহণ কৰাৰ কিছুদিন পূৰ্বে তেওঁ গাজা যুদ্ধৰ প্ৰতি তেওঁৰ লেবাৰ পাৰ্টীৰ প্ৰাৰম্ভিক সঁহাৰিৰ বাবে দুঃখ প্ৰকাশ কৰি দলটোৱে বিষয়টোত অধিক ভাল ভূমিকা ল’ব লাগিছিল বুলি মন্তব্য কৰিছিল।
বাৰ্নহামে ৭ অক্টোবৰৰ হামাছৰ আক্ৰমণক ‘ভয়ংকৰ’ বুলি নিন্দা কৰাৰ লগতে ব্ৰিটেইনত সংঘটিত ইহুদী-বিৰোধী ঘটনাসমূহৰো সমালোচনা কৰিছিল। একে সময়তে গাজাত সংঘটিত ঘটনাক লৈ ইজৰাইল চৰকাৰৰ সমালোচনা কৰাটোও অত্যন্ত প্ৰয়োজনীয় বুলি তেওঁ উল্লেখ কৰিছিল। তেওঁ গাজাৰ সাধাৰণ নাগৰিক, বিশেষকৈ শিশুসকলৰ মৃত্যু আৰু মানৱীয় সংকটক লৈ গভীৰ উদ্বেগ প্ৰকাশ কৰি কৈছিল যে নিৰীহ পেলেষ্টাইনীয় লোকৰ মৃ*ত্যু অব্যাহত থকাটো কোনোপধ্যেই গ্ৰহণযোগ্য নহয়।
এনে এক স্পৰ্শকাতৰ ৰাজনৈতিক পৰিৱেশৰ মাজতে নেতান্যাহুৱে ব্ৰিটেইনক ‘ইছলামিক ৰিপাব্লিক’ বুলি কৰা মন্তব্যই দুয়োখন দেশৰ মাজৰ কূটনৈতিক সম্পৰ্কক লৈ নতুনকৈ চৰ্চাৰ সৃষ্টি কৰিছে। বিশেষজ্ঞসকলৰ মতে, গাজা যুদ্ধক কেন্দ্ৰ কৰি ইজৰাইল আৰু পশ্চিমীয়া দেশসমূহৰ মাজত মতপাৰ্থক্য বৃদ্ধি পোৱাৰ সময়ত নেতান্যাহুৰ এই মন্তব্যই সেই উত্তেজনা অধিক বৃদ্ধি কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
