ছবিৰ শ্বুটিঙৰ সময়ত গুৰুতৰভাৱে আহত অভিনেতা কাৰ্তিক আৰিয়ান। একচন দৃশ্যৰ শ্বুটিং কৰি থকা অৱস্থাত আহত হয়। আঁঠুত গুৰুতৰ আঘাত পোৱাৰ পিছত ৩-৪ দিনৰ ভিতৰতে স্থানীয় চিকিৎসালয়ত ভৰ্তি কৰোৱা হয় অভিনেতাজনক। সম্প্ৰতি মুম্বাইৰ এখন ব্যক্তিগত চিকিৎসালয়ত চিকিৎসাধীন হৈ আছে তাৰকাগৰাকী।
সূত্ৰই অনুসৰি, ছবিখনৰ শ্বুটিং প্ৰায় অন্তিম পৰ্যায়ত উপনীত হৈছে। শ্বুটিঙৰ যোৱা দুদিন ধৰি কেইবাটাও হাই ভল্টেজ আৰু কঠিন একচনৰ দৃশ্য পৰিকল্পনা কৰিছিল পৰিচালকে। কাৰ্তিকেও এই বিশেষ দৃশ্যসমূহৰ বাবে আন্তঃৰাষ্ট্ৰীয় একচন প্ৰশিক্ষকৰ অধীনত কঠোৰ প্ৰশিক্ষণ লৈ আছিল। কিন্তু এটা কঠিন দৃশ্য প্ৰদৰ্শন কৰাৰ সময়ত আঁঠুত গুৰুতৰভাৱে আঘাতপ্ৰাপ্ত হয়। আঘাতৰ ভয়াৱহতা দেখি শ্বুটিং স্থগিত ৰখা হয় আৰু তেওঁক ততাতৈয়াকৈ চিকিৎসালয়লৈ প্ৰেৰণ কৰা হয়।
প্ৰডাকচন হাউছৰ ঘনিষ্ঠ এক সূত্ৰই জনোৱা মতে, “কাৰ্তিকক চিকিৎসালয়ত ভৰ্তি কৰা হৈছে আৰু অভিজ্ঞ চিকিৎসকৰ তত্বাৱধানত আছে। অহা এদিন বা দুদিনত তেওঁৰ আঁঠুৰ অস্ত্ৰোপচাৰ কৰা হ’ব। অস্ত্ৰোপচাৰৰ পিছত কেইদিনমান সম্পূৰ্ণ জিৰণি ল’বলৈ চিকিৎসকে পৰামৰ্শ দিছে। চিকিৎসাৰ পৰা সুস্থ হৈ উঠিলে তেওঁ পুনৰ শ্বুটিং চেটলৈ উভতি যাব।”
অস্ত্ৰোপচাৰ আৰু প্ৰাৰম্ভিক আৰোগ্য লাভৰ পিছত কিছুদিন বিৰতি ল’ব কাৰ্তিক। ডাক্তৰৰ পৰা গ্ৰীণ চিগনেল পালেহে তেওঁৰ পৰৱৰ্তী প্ৰজেক্ট অনুৰাগ বসুৰ নতুন ছবিখনৰ শ্বুটিং আৰম্ভ কৰাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
