আজৱ ঘটনা! এগৰাকী মহিলা ৯ মহীয়া গৰ্ভৱতী, কিন্তু গৰ্ভত নাই সন্তান

পাকিস্তানৰ কৰাচীত সংঘটিত হৈছে এক অস্বাভাৱিক ঘটনা। এগৰাকী মহিলাই নিজকে ৯ মাহৰ গৰ্ভৱতী বুলি দাবী কৰি ২৭ আগষ্টত নাজিমাবাদৰ হামদৰ্দ হাস্পতালত সন্তান প্ৰসৱৰ বাবে উপস্থিত হৈছিল। পৰিয়ালৰ হাতত থকা আল্ট্ৰাছাউণ্ড ৰিপ’ৰ্টতো ৩৮ সপ্তাহৰ গৰ্ভাৱস্থাৰ কথা উল্লেখ আছিল। চিকিৎসালয়ত পৰীক্ষা কৰাৰ পিছত মহিলাগৰাকীৰ চি-চেকচন কৰাৰ সিদ্ধান্ত লোৱা হয়। কিন্তু অস্ত্ৰোপচাৰৰ সময়ত চিকিৎসকে আচৰিত হৈ দেখে যে মহিলাগৰাকীৰ গৰ্ভত কোনো সন্তানেই নাই। ইয়াৰ পিছতে চিকিৎসালয়ত হুলস্থুলৰ সৃষ্টি হয় আৰু পৰিয়ালে চিকিৎসালয়খনৰ বিৰুদ্ধে অভিযোগ উত্থাপন কৰে। ঘটনাস্থলীত আৰক্ষী উপস্থিত হৈ তদন্ত আৰম্ভ কৰে।

আৰক্ষীৰ তদন্তত প্ৰকাশ পোৱা অনুসৰি, মহিলাগৰাকীৰ বিৱাহৰ প্ৰায় তিনি বছৰ হৈছিল যদিও সন্তান নাছিল। সন্তান জন্ম দিয়াৰ বাবে পৰিয়াল আৰু সমাজৰ পৰা অহা হেঁচাৰ বাবেই তেওঁ গৰ্ভৱতী হোৱা বুলি মিছাকৈ কৈছিল। আনকি গৰ্ভধাৰণ নিশ্চিত কৰা বুলি দাবী কৰা আল্ট্ৰাছাউণ্ড ৰিপ’ৰ্টো ভুৱা হোৱাৰ সন্দেহ প্ৰকাশ কৰা হৈছে। পিছত চৰকাৰী চিকিৎসালয় আৰু আগা খান হাস্পতালত কৰা পৰীক্ষাৰ জৰিয়তে মহিলাগৰাকী কেতিয়াও গৰ্ভৱতী হোৱা নাছিল বুলি নিশ্চিত হোৱা বুলি আৰক্ষীয়ে জানিবলৈ দিয়ে। অৱশেষত মহিলাগৰাকীয়েও আৰক্ষীৰ আগত ভুৱা গৰ্ভধাৰণৰ কথা স্বীকাৰ কৰা বুলি দাবী কৰিছে আৰক্ষীয়ে।

ইফালে, হামদৰ্দ হাস্পতালৰ স্ত্ৰীৰোগ বিভাগৰ মুৰব্বী ডাঃ অঞ্জুম আৰা হাছানে কয় যে মহিলাগৰাকীয়ে আল্ট্ৰাছাউণ্ডৰ ৰিপ’ৰ্ট দেখুৱাইছিল আৰু চিকিৎসা পৰীক্ষাৰ লগতে CTG কৰাৰ পিছত অস্ত্ৰোপচাৰৰ সিদ্ধান্ত লোৱা হৈছিল। চিকিৎসালয়খনৰ মতে, তেওঁলোকে পূৰ্বে দাখিল কৰা ৰিপ’ৰ্টৰ ওপৰত ভিত্তি কৰিয়েই চিকিৎসা আগবঢ়াইছিল। ঘটনাটোৱে অৱশ্যে চিকিৎসালয়খনৰ ওপৰতো গুৰুত্বপূৰ্ণ প্ৰশ্ন উত্থাপন কৰিছে—চি-চেকচনৰ পূৰ্বে গৰ্ভধাৰণ আৰু গৰ্ভত শিশুৰ উপস্থিতি চিকিৎসালয়খনে স্বতন্ত্ৰভাৱে নিশ্চিত কৰিছিল নে নাই?

চিকিৎসা বিশেষজ্ঞসকলৰ মতে, চি-চেকচনৰ দৰে অস্ত্ৰোপচাৰৰ পূৰ্বে ৰোগীৰ শাৰীৰিক পৰীক্ষা, চিকিৎসাৰ ইতিহাস, প্ৰয়োজনীয় ৰক্ত পৰীক্ষা, আল্ট্ৰাছাউণ্ড আৰু শিশুৰ হৃদস্পন্দন আদি পৰীক্ষা কৰি গৰ্ভাৱস্থা নিশ্চিত কৰাটো অত্যন্ত গুৰুত্বপূৰ্ণ। বৰ্তমান আৰক্ষীয়ে হামদৰ্দ হাস্পতালৰ নথি-পত্ৰ আৰু কৰ্মচাৰীসকলৰ বক্তব্য সংগ্ৰহ কৰিছে। সমগ্ৰ তদন্তৰ প্ৰতিবেদন সিন্ধ স্বাস্থ্যসেৱা আয়োগক দাখিল কৰা হ’ব আৰু চিকিৎসালয়খনৰ কোনো গাফিলতি হৈছিল নেকি, সেই সিদ্ধান্ত সংশ্লিষ্ট কৰ্তৃপক্ষই ল’ব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ