পাঞ্জাবত চলি থকা SIRৰ পিছত প্ৰকাশ পোৱা খচৰা ভোটাৰ তালিকাৰ পৰা ৰাজ্যসভাৰ সাংসদ ৰাঘৱ চাড্ডাৰ নাম কৰ্তন কৰাক লৈ ৰাজনৈতিক বিতৰ্কৰ সৃষ্টি হৈছে। ভোটাৰ তালিকাত তেওঁৰ নাম ASDD—Absent, Shifted, Deceased and Duplicate শিতানৰ অন্তৰ্গত কৰা হৈছে। অৰ্থাৎ তেওঁক স্থানান্তৰিত হোৱা ভোটাৰ হিচাপে চিহ্নিত কৰা হৈছে।
ৰাঘৱ চাড্ডাই এই ঘটনাক ৰাজনৈতিক প্ৰতিশোধ বুলি অভিযোগ কৰিছে। তেওঁৰ মতে, তেওঁৰ ভোটাৰ পৰিচয় পত্ৰ মোহালিত পঞ্জীয়ন হৈ আছে আৰু তেওঁ পাঞ্জাবৰ পৰা ৰাজ্যসভালৈ নিৰ্বাচিত হোৱা সাংসদ। বিশেষকৈ ২০২৬ চনৰ এপ্ৰিলত আম আদমি পাৰ্টি ত্যাগ কৰি বিজেপিত যোগদান কৰাৰ পিছতে এই ঘটনা ঘটাত তেওঁৰ অভিযোগক লৈ চৰ্চা বৃদ্ধি পাইছে। তেওঁৰ সৈতে আপৰ আন ছয়জন ৰাজ্যসভাৰ সাংসদেও বিজেপিত যোগদান কৰিছিল। অৱশ্যে আপে চাড্ডাৰ অভিযোগ অস্বীকাৰ কৰিছে। দলটোৰ মতে, SIR হৈছে নিৰ্বাচন আয়োগৰ প্ৰক্ৰিয়া আৰু ইয়াত ৰাজ্য চৰকাৰৰ কোনো ভূমিকা নাই। ইফালে আপে আন এটা অভিযোগো উত্থাপন কৰিছে। দলটোৰ দাবী অনুসৰি, দিল্লীৰ ভোটাৰ তালিকাত ৰাঘৱ চাড্ডাৰ নাম পুৰণি তাৰিখ দেখুৱাই সংযোজন কৰাৰ চেষ্টা চলিছিল। বিষয়টো নিৰ্বাচন আয়োগৰ সন্মুখত উত্থাপন কৰাৰ পিছতে সেই প্ৰক্ৰিয়া বন্ধ কৰা হয় বুলি আপে দাবী কৰিছে।
SIRৰ সময়ত পাঞ্জাবৰ খচৰা ভোটাৰ তালিকাৰ পৰা প্ৰায় ২০.৬৬ লাখ ভোটাৰৰ নাম বাদ পৰিছে। এই সংখ্যা SIR আৰম্ভ হোৱাৰ আগৰ মুঠ ভোটাৰৰ প্ৰায় ৯.৭ শতাংশ। কিন্তু এই কথাটো মনত ৰখাটো অতি জৰুৰী যে এতিয়া প্ৰকাশ কৰা তালিকাখন চূড়ান্ত ভোটাৰ তালিকা নহয়, খচৰা তালিকাহে। যিসকলৰ নাম খচৰা তালিকাত নাই, তেওঁলোকে নিজৰ নাম পুনৰ অন্তৰ্ভুক্ত কৰাৰ বাবে দাবী আৰু আপত্তি দাখিল কৰিব পাৰে। পাঞ্জাবত এই প্ৰক্ৰিয়াৰ অন্তিম তাৰিখ ১২ ছেপ্টেম্বৰ ২০২৬। ইয়াৰ পিছত অক্টোবৰ মাহত চূড়ান্ত ভোটাৰ তালিকা প্ৰকাশ কৰাৰ কথা আছে।
SIRৰ পৰা নাম কৰ্তন হোৱাৰ পিছতে ৰাঘৱ চাড্ডাৰ ৰাজ্যসভাৰ পদ খাৰিজ হ’ব নেকি? বুলি উত্থাপন হৈছে প্ৰশ্ন। এই ক্ষেত্ৰত ৰাঘৱ চাড্ডাৰ কোনো চিন্তাৰ কাৰণ নাই। সাধাৰণতে কোনো সাংসদৰ নাম ভোটাৰ তালিকাৰ পৰা বাদ পৰিলে তেওঁৰ সাংসদ পদো যাব বুলি ধাৰণা হ’ব পাৰে। কিন্তু ৰাজ্যসভাৰ ক্ষেত্ৰত আইনখন অলপ বেলেগ। জনপ্ৰতিনিধিত্ব আইন, ১৯৫১ৰ ধাৰা ৩ অনুসৰি ৰাজ্যসভাৰ সদস্য হ’বলৈ এজন ব্যক্তিৰ নাম ভাৰতৰ যিকোনো সংসদীয় সমষ্টিৰ ভোটাৰ তালিকাত থাকিলেই হয়। ২০০৩ চনৰ সংশোধনীৰ পিছত ৰাজ্যসভাৰ সাংসদ হোৱা ৰাজ্যখনৰ ভোটাৰ হোৱাটো বাধ্যতামূলক নহয়। সেয়ে পাঞ্জাবৰ ভোটাৰ তালিকাৰ পৰা চাড্ডাৰ নাম আঁতৰিলেও, যদি তেওঁৰ নাম দিল্লী বা ভাৰতৰ আন কোনো সংসদীয় সমষ্টিৰ ভোটাৰ তালিকাত বৈধভাৱে থাকে, তেন্তে কেৱল পাঞ্জাবৰ তালিকাৰ পৰা নাম বাদ পৰাৰ বাবে তেওঁৰ ৰাজ্যসভাৰ সদস্যপদ শেষ নহয়।
ভাৰতীয় সংবিধানৰ ১০২ নং অনুচ্ছেদত সংসদৰ সদস্যক অযোগ্য ঘোষণা কৰাৰ বিভিন্ন ভিত্তি উল্লেখ কৰা হৈছে। যেনে— চৰকাৰৰ অধীনত অযোগ্য লাভৰ পদত অধিষ্ঠিত হোৱা, উপযুক্ত আদালতে মানসিকভাৱে অযোগ্য ঘোষণা কৰা, দেউলীয়া হোৱা, বিদেশী নাগৰিকত্ব গ্ৰহণ কৰা, সংসদে প্ৰণয়ন কৰা কোনো আইনৰ অধীনত অযোগ্য হোৱা। ইয়াৰ উপৰি দলত্যাগ বিৰোধী আইন অৰ্থাৎ সংবিধানৰ দশম অনুসূচীৰ অধীনতো কোনো সাংসদ অযোগ্য হ’ব পাৰে। আনহাতে, কোনো সাংসদে সদনৰ অনুমতি অবিহনে একেৰাহে ৬০ দিন সদনৰ বৈঠকত উপস্থিত নাথাকিলে সংশ্লিষ্ট সদনে তেওঁৰ আসন খালী ঘোষণা কৰিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
