জুবিন গাৰ্গৰ ঘটনাক কেন্দ্ৰ কৰি চলি থকা তদন্ত আৰু আইনী প্ৰক্ৰিয়াৰ মাজতে চৰ্চালৈ আহিছে প্ৰৱাসী অসমীয়া তন্ময় ফুকনৰ নাম। ছিংগাপুৰৰ য়ট পাৰ্টীৰ সৈতে জড়িত তন্ময় ফুকনে আদালতত কেইবাদিনো ধৰি সাক্ষ্যদান কৰে। কিন্তু সাক্ষ্যদানৰ পাছত সংবাদ মাধ্যমৰ কেমেৰাৰ সন্মুখত নাহি গোপনে আদালত চৌহদৰ পৰা ওলাই যোৱা ঘটনাই নতুনকৈ প্ৰশ্নৰ সৃষ্টি কৰিছে।
ছিংগাপুৰৰ য়ট পাৰ্টীৰ মূল আয়োজক আছিল তন্ময়?
জুবিন গাৰ্গৰ ছিংগাপুৰ ভ্ৰমণ আৰু য়ট পাৰ্টীক লৈ ইতিমধ্যে বিভিন্ন আলোচনা চলি আহিছে। সেই য়ট পাৰ্টীৰ আয়োজনৰ সৈতে তন্ময় ফুকন জড়িত আছিল বুলি দাবী কৰা হৈছে।
জানিব পৰা মতে, ছিংগাপুৰৰ সেই সময়ছোৱাৰ ঘটনাৰ বিষয়ে বহু গুৰুত্বপূৰ্ণ তথ্য তন্ময়ৰ জ্ঞাত হ’ব পাৰে। বিশেষকৈ জুবিনৰ শেষ সময়ছোৱাৰ ঘটনাক লৈ তেওঁৰ সাক্ষ্যক গুৰুত্বপূৰ্ণ বুলি বিবেচনা কৰা হৈছে।
তন্ময় ফুকনে প্ৰায় চাৰি দিন ধৰি আদালতত সাক্ষ্যদান কৰে। কিন্তু সাক্ষ্যদানৰ সময়ত তেওঁ সংবাদ মাধ্যমৰ পৰা নিজকে আঁতৰাই ৰাখে। আদালতত প্ৰৱেশ কৰাৰ সময়তো তেওঁ মূল দুৱাৰৰ সলনি পিছফালৰ দুৱাৰ ব্যৱহাৰ কৰিছিল। সাক্ষ্যদান শেষ কৰাৰ পাছতো একেটা পথেৰে আদালত চৌহদৰ পৰা ওলাই যায়। কেমেৰাৰ সন্মুখত নাহি এনেদৰে গোপনে ওলাই যোৱা ঘটনাই স্বাভাৱিকতে বিভিন্ন মহলত চৰ্চাৰ সৃষ্টি কৰিছে।
তন্ময় ফুকন জুবিন গাৰ্গৰ অন্তিম সময়ৰ ঘটনাৰ প্ৰত্যক্ষদৰ্শী আছিল বুলি দাবী কৰা হৈছে। অৱশ্যে তেওঁৰ সাক্ষ্যত প্ৰকৃততে কি তথ্য প্ৰকাশ পাইছে, সেয়া আদালতৰ নথি আৰু তদন্তকাৰী সংস্থাৰ আনুষ্ঠানিক তথ্যৰ ওপৰতহে নিৰ্ভৰ কৰিব।
শ্যামকানু মহন্তৰ ঘনিষ্ঠ বুলি চৰ্চা
তন্ময় ফুকনৰ নাম শ্যামকানু মহন্তৰ সৈতে ঘনিষ্ঠ সম্পৰ্কৰ বাবেও চৰ্চালৈ আহিছে বুলি দাবী কৰা হৈছে। ছিংগাপুৰৰ অনুষ্ঠান আৰু জুবিনৰ ভ্ৰমণৰ সৈতে জড়িত বিভিন্ন বিষয়ত তেওঁলোকৰ যোগাযোগ আছিল নেকি, সেই বিষয়েও বিভিন্ন মহলত প্ৰশ্ন উত্থাপন হৈছে।
সাক্ষ্যদানক লৈ বিসংগতিৰ অভিযোগ
ইফালে তন্ময় ফুকনৰ সাক্ষ্যদানক লৈও বিভিন্ন বিসংগতিৰ অভিযোগ উত্থাপন হৈছে। অৱশ্যে এই বিসংগতি ক’ত আৰু কেনেধৰণৰ, সেই বিষয়ে আদালতৰ পৰা স্পষ্ট তথ্য প্ৰকাশ নোহোৱালৈকে কোনো সিদ্ধান্তত উপনীত হোৱা উচিত নহয়।
তদন্তত যদি তেওঁৰ বক্তব্যৰ সৈতে আন সাক্ষী বা তথ্য-প্ৰমাণৰ কোনো অমিল পোৱা যায়, তেন্তে তদন্তকাৰী সংস্থাই সেই বিষয়সমূহ পৃথকে পৰীক্ষা কৰিব পাৰে।
কিয় সংবাদ মাধ্যমৰ পৰা আঁতৰি থাকিল তন্ময়?
তন্ময় ফুকনে আদালতত সাক্ষ্যদানৰ সময়ত সংবাদ মাধ্যমৰ কেমেৰাৰ পৰা আঁতৰি থকাটোৱে এতিয়া বিশেষ চৰ্চা লাভ কৰিছে। কেমেৰা দেখি পলাল কৰে য়ট পাৰ্টীৰ মূল আয়োজক তন্ময়। তেওঁ পিছ দুৱাৰেৰে আদালতত সোমাই যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
