UAEৰ পৰা ইজৰাইললৈ যোৱা FLY DUBAIৰ এখন বিমানত ভাৰতীয় কেপ্টেইন স্মিট মচ্চৰক আক্ৰমণ কৰি বিমানখন দুৰ্ঘটনাগ্ৰস্ত কৰোৱাৰ অপচেষ্টা চলোৱা বিমানখনৰ ওমানী সহঃ পাইলটজনৰ পৰিচয়ো ৰাজহুৱা কৰিছে কৰ্তৃপক্ষই। ছৌদি আৰৱৰ সংবাদ মাধ্যম আল আৰবিয়াই সূত্ৰৰ উদ্ধৃতি দি প্ৰকাশ কৰা অনুসৰি, সহ-পাইলটজনৰ নাম হৈছে হামাম আলহামামী। প্ৰতিবেদনটোত দাবী কৰা হৈছে যে উগ্ৰবাদী দৃষ্টিভংগীৰ বাবে তেওঁক ওমানত বিমান চলোৱাৰ পৰা বাধা দিয়া হৈছিল।
আল আৰবিয়াৰ প্ৰতিবেদন অনুসৰি, আলহামামীয়ে জীৱনৰ এটা দীঘলীয়া সময় ওমানৰ বাহিৰত কটাইছিল। UAEলৈ অহাৰ পূৰ্বে তেওঁ ছিৰিয়াত যথেষ্ট সময় বাস কৰিছিল। সেই সময়ছোৱাত তেওঁ উগ্ৰবাদী মতাদৰ্শৰ সংস্পৰ্শলৈ অহাৰ অভিযোগ উত্থাপন হৈছে। এই কাৰণতে ওমানৰ বিমানসেৱা কৰ্তৃপক্ষই তেওঁৰ ওপৰত নিষেধাজ্ঞা আৰোপ কৰিছিল বুলি প্ৰতিবেদনটোত কোৱা হৈছে। ইয়াৰ পিছতে আলহামামীয়ে ওমান এৰি যায়। আমেৰিকাৰ সংবাদ মাধ্যম CNNৰ প্ৰতিবেদন অনুসৰি, FLY DUBAIৰ এই ওমানী সহ-পাইলটজনক যোৱা বছৰ ওমানৰ ৰাষ্ট্ৰীয় বিমান সংস্থাৰ চাকৰিৰ পৰা বৰ্খাস্ত কৰা হৈছিল। CNNৰ প্ৰতিবেদন অনুসৰি, উগ্ৰবাদী মতাদৰ্শৰ আশংকাৰ বাবে আলহামামীক বিমান প্ৰশিক্ষণৰ পৰা আঁতৰাই দিয়া হৈছিল। অৱশ্যে পিছত বিমান সংস্থাটোৰ ভিতৰতে তেওঁক আন এটা দায়িত্ব দিয়া হৈছিল বুলি সূত্ৰটোৱে দাবী কৰে। আন এটা সূত্ৰৰ মতে, আলহামামীৰ পিতৃ ওমানৰ আৰু মাতৃ ছিৰিয়াৰ। তেওঁৰ জন্ম সংযুক্ত আৰব আমিৰশ্বাহীত হৈছিল আৰু জীৱনৰ বহু বছৰ তেওঁ UAEতেই কটাইছিল।
ইজৰাইলৰ চেনেল ১২-এ প্ৰকাশ কৰা অনুসৰি, তদন্তকাৰী সংস্থাই আলহামামীৰ বিৰুদ্ধে আল কায়দাৰ মতাদৰ্শৰ সৈতে জড়িত হোৱাৰ আশংকা সন্দৰ্ভতো তদন্ত চলাইছিল। এই প্ৰক্ৰিয়াৰ সময়ত তেওঁ কেইবাজনো ধৰ্মীয় নেতাৰ সৈতে সাক্ষাৎ কৰা বুলি জানিব পৰা গৈছে। অৱশ্যে সেই নেতাসকলৰ পৰিচয় প্ৰকাশ কৰা হোৱা নাই। ইফালে ইজৰাইলী সংবাদ মাধ্যম i24 News-এ এমিৰেটছৰ এটা সূত্ৰৰ উদ্ধৃতি দি দাবী কৰিছে যে ওমানী সহ-পাইলটজনৰ বেগৰ পৰা পেলেষ্টাইন সমৰ্থক কিছু সামগ্ৰী উদ্ধাৰ কৰা হৈছিল। ইয়াৰ ভিতৰত ‘ফ্ৰী পেলেষ্টাইন’ গোটৰ পমফ্লেট আৰু অন্যান্য কিতাপো আছিল বুলি প্ৰতিবেদনটোত কোৱা হৈছে।
তদন্তৰ সৈতে জড়িত সূত্ৰৰ মতে, বৰ্তমান তদন্তকাৰী বিষয়াসকলে আলহামামীয়ে অকলে এই আক্ৰমণৰ চেষ্টা চলোৱা বুলি ধাৰণা কৰিছে। অৱশ্যে তদন্ত এতিয়াও চলি আছে। কৰ্তৃপক্ষই এই ঘটনাৰ উপৰি আন কোনো বিদেশী বিমান সংস্থাৰ বিমানৰ ক্ষেত্ৰতো একেধৰণৰ ভাবুকি সৃষ্টি হ’ব পাৰে নেকি, সেই বিষয়টোও পৰীক্ষা কৰি আছে। লগতে ইজৰাইলৰ তদন্তকাৰী সংস্থাসমূহে আলহামামী কেনেকৈ ফ্লাইডুবাইৰ বিমান ক্ৰুৰ সদস্য হ’বলৈ সক্ষম হ’ল, সেই বিষয়েও অনুসন্ধান চলাইছে। এই ঘটনাই ইজৰাইলৰ সৈতে আনুষ্ঠানিক কূটনৈতিক সম্পৰ্ক নথকা ওমানৰ এজন নাগৰিকক কেনেদৰে ইজৰাইললৈ অহা বিমানৰ ক্ৰুত কাম কৰাৰ অনুমতি দিয়া হৈছিল, সেই সন্দৰ্ভতো প্ৰশ্নৰ সৃষ্টি কৰিছে। অৱশ্যে ঘটনাটোৰ সম্পূৰ্ণ তথ্য তদন্ত শেষ হোৱাৰ পাছতহে স্পষ্ট হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
