অসমৰ ৰাজনীতিত নিৰ্বাচনৰ বতাহ তীব্ৰ হৈ পৰিছে। আজি একাধিক বিষয়ক লৈ মুখ্যমন্ত্ৰী ড০ হিমন্ত বিশ্ব শৰ্মাৰ গুৰুত্বপূৰ্ণ মন্তব্য। নাম নোলোৱাকৈয়ে জ্ঞানশ্ৰী বৰা আৰু কুংকী চৌধুৰীক কটাক্ষ কৰে মুখ্যমন্ত্ৰীয়ে। লগতে CJP, ৰাইজৰ দল আৰু AJPৰ ৰাজনৈতিক স্থিতিক লৈও প্ৰশ্ন উত্থাপন কৰে মুখ্যমন্ত্ৰীয়ে।
সংবাদমেলত মুখ্যমন্ত্ৰীয়ে কয় যে এই নেতাসকলে বিভিন্ন ৰাজনৈতিক দলৰ সভাত অংশগ্ৰহণ কৰি এক ধৰণৰ ‘খিচিৰি’ পৰিস্থিতিৰ সৃষ্টি কৰিছে। তেওঁ কয়, ‘ মই কোনখন স্মাৰকৰ উত্তৰ দিম, বুজা নাই’। নাম নোলোৱাকৈ জ্ঞানশ্ৰী বৰাৰ ৰাজনৈতিক গতিবিধিক লৈ মুখ্যমন্ত্ৰীয়ে কটাক্ষ কৰি কয় যে তেওঁ কেতিয়াবা CJPৰ সভাত, কেতিয়াবা ৰাইজৰ দলৰ মিটিঙত আৰু কেতিয়াবা AJPৰ কাৰ্যসূচীত দেখা যায়। জ্ঞানশ্ৰী বৰা কেতিয়াবা CJPত যায়, কেতিয়াবা ৰাইজৰ দলৰ মিটিঙত যায়, আকৌ কেতিয়াবা AJPত যায়।’
‘এটা পৰিয়ালে কুংকীক নেতা বনাবলৈ লাগি আছে’
কুংকী চৌধুৰীক লৈ মুখ্যমন্ত্ৰীয়ে আন এক তাৎপৰ্যপূৰ্ণ মন্তব্য কৰে। তেওঁ কয় যে এটা পৰিয়ালে কুংকী চৌধুৰীক নেতা হিচাপে প্ৰতিষ্ঠা কৰাৰ চেষ্টা চলাই আছে।
অৱশ্যে মুখ্যমন্ত্ৰীয়ে কাক বা কোনটো পৰিয়ালক উদ্দেশ্য কৰি এই মন্তব্য কৰিছে, সেয়া স্পষ্টকৈ উল্লেখ কৰা নাই।
CJPক লৈও সৰৱ মুখ্যমন্ত্ৰী
CJPৰ স্কুলে-স্কুলে চলোৱা কাৰ্যসূচীক লৈও মুখ্যমন্ত্ৰী ড০ হিমন্ত বিশ্ব শৰ্মাই সমালোচনা কৰে। তেওঁৰ দাবী, কেৱল স্কুলে-স্কুলে গৈ চৰকাৰক সমালোচনা কৰিলে বিশেষ লাভ নহ’ব।
তেওঁ কয়, “CJPয়ে স্কুলে-স্কুলে গৈ লাভ নাই।” অসমৰ ৰাইজৰ বিজেপিৰ ওপৰত অগাধ বিশ্বাস আছে বুলিও দাবী কৰে মুখ্যমন্ত্ৰীয়ে।
পলাশবাৰীৰ এখন বিদ্যালয়লৈ CJP যোৱাৰ প্ৰসংগ উত্থাপন কৰি মুখ্যমন্ত্ৰীয়ে কয় যে আজাৰাৰ বিদ্যালয়লৈ তেওঁলোক যোৱা নাই। তেওঁৰ মতে, ভাল বিদ্যালয় দেখুৱাবলৈ নহয়, নিৰ্বাচনী ৰাজনীতিৰ বাবেহে এনে কাৰ্যসূচী চলোৱা হৈছে।
‘গাঁৱৰ মানুহে আমাৰ ভাল কাম দেখিছে’
মুখ্যমন্ত্ৰীয়ে দাবী কৰে যে চৰকাৰৰ কাম-কাজ গাঁৱৰ সাধাৰণ মানুহে প্ৰত্যক্ষ কৰিছে। সেয়ে গাঁৱৰ মানুহে বিজেপিক সমৰ্থন কৰে বুলি তেওঁ মন্তব্য কৰে। তেওঁ কয়, “আমাৰ ভাল কামবোৰ গাঁৱৰ মানুহে দেখিছে। গতিকে গাঁৱৰ মানুহে আমাক ভাল পায়।”
CJPৰ কাৰ্যকলাপৰ প্ৰভাৱ সীমিত বুলি দাবী কৰি মুখ্যমন্ত্ৰীয়ে কয় যে তেওঁলোকে মাত্ৰ এমুঠিমান মানুহৰ মাজতে ঘূৰি ফুৰিছে। CJPয়ে উত্থাপন কৰা প্ৰতিটো কথাৰ ওপৰত চৰকাৰে সদায় প্ৰতিক্ৰিয়া প্ৰকাশ কৰি থাকিব নোৱাৰে বুলিও তেওঁ স্পষ্ট কৰে।
অগ্নিবীৰসকলৰ বাবে ডাঙৰ ঘোষণা মুখ্যমন্ত্ৰীৰ
ইফালে সংবাদমেলত অসমৰ অগ্নিবীৰসকলৰ বাবেও গুৰুত্বপূৰ্ণ ঘোষণা কৰে মুখ্যমন্ত্ৰী ড০ হিমন্ত বিশ্ব শৰ্মাই। মুখ্যমন্ত্ৰীয়ে ঘোষণা কৰে যে অসমত অগ্নিবীৰসকলৰ বাবে কেইবাটাও চৰকাৰী বিভাগৰ নিযুক্তিত ১২ শতাংশ সংৰক্ষণৰ ব্যৱস্থা কৰা হ’ব।
কোন কোন বিভাগত পাব সংৰক্ষণ?
মুখ্যমন্ত্ৰীৰ ঘোষণা অনুসৰি, অগ্নিবীৰসকলৰ বাবে—
অসম আৰক্ষীৰ জে’ল বিভাগৰ কনিষ্টবল পদ
অগ্নিনিৰ্বাপক বাহিনী
SDRF
বন বিভাগ
আবকাৰী বিভাগৰ কনিষ্টবল পদ
এইবোৰ নিযুক্তিত ১২ শতাংশ সংৰক্ষণ থাকিব
এই ঘোষণাই সেনাবাহিনীৰ অগ্নিবীৰ হিচাপে সেৱা আগবঢ়োৱাৰ পিছত ৰাজ্যত চাকৰি বিচৰা যুৱক-যুৱতীসকলৰ বাবে নতুন সুযোগ সৃষ্টি কৰিব বুলি আশা কৰা হৈছে।
মধুপুৰ সত্ৰলৈ প্ৰতিমাহে ১ লাখ টকা
ইফালে অসমৰ সত্ৰীয়া ঐতিহ্যৰ সৈতে জড়িত আন এক গুৰুত্বপূৰ্ণ ঘোষণাও কৰে মুখ্যমন্ত্ৰীয়ে। মধুপুৰ সত্ৰৰ দৈনন্দিন কাম-কাজ পৰিচালনাৰ বাবে ৰাজ্য চৰকাৰে প্ৰতিমাহে ১ লাখ টকাকৈ আগবঢ়াব বুলি ঘোষণা কৰে মুখ্যমন্ত্ৰী ড০ হিমন্ত বিশ্ব শৰ্মাই। এই ধনৰাশি সত্ৰখনৰ দৈনন্দিন পৰিচালনা আৰু বিভিন্ন কাম-কাজত ব্যৱহাৰ কৰা হ’ব।
বৰদোৱাৰ আৰ্হিত মধুপুৰতো বৃহৎ প্ৰকল্প
কেৱল মাহিলী আৰ্থিক সহায়তেই সীমাবদ্ধ নাথাকি কোচবিহাৰৰ মধুপুৰ সত্ৰতো বৰদোৱাৰ আৰ্হিত এটা বৃহৎ প্ৰকল্প স্থাপন কৰাৰ পৰিকল্পনা ৰাজ্য চৰকাৰৰ আছে বুলি মুখ্যমন্ত্ৰীয়ে জানিবলৈ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
